1 Samwelĩ 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Dawĩdĩ akasagira ewʼAbafĩlĩstĩnĩ

¹ Neryo Dawĩdĩ mwabũga omo mutima wuwe ati, Ekiro kiguma nasyakwĩra omo byala bya Saũlo; ekibuya kwilaba busana nage niʼsagira omo kihugo kyʼAbafĩlĩstĩnĩ; neryo Saũlo asyaluha, eriswanyisonda-sondera omo kihugo kyosĩ kya Ĩsraelĩ; nage nasyabala nyitya ebyala biwe.

² Neryo Dawĩdĩ mwahangana, iye nʼabalume buwe magana ndatu ababya haguma naye, mobasokera ewa Akĩsĩ mugala wa Maokĩ, omwami wʼeGatĩ.

³ Na Dawĩdĩ mwĩkala haguma na Akĩsĩ eGatĩ, iye nʼabalume buwe, obuli mundu nʼekĩtũnga kiwe, ye Dawĩdĩ nʼabakalĩ buwe babiri, Ahĩnoamũ Omũyezreelĩ, na Abĩgaĩlĩ Omũkarmelĩ omũkalĩ wa Nabalĩ.

⁴ Neryo Saũlo mowa ambu Dawĩdĩ asagĩre eGatĩ; neryo mwataswamusonda-sondya.

Akĩsĩ akaha Dawĩdĩ yʼomũyĩ wʼeZĩklagĩ

⁵ Kandi Dawĩdĩ mwabwira Akĩsĩ, ati, Lino namabana eriganyirwa omo meso wawe, Uleke bambe ekibanza omo mĩyĩ yawe, inabana erĩĩkalayo; kusangwa busana nakĩ omugombe wawe angĩkala oko mũyĩ wʼobwami haguma nawe kwehĩ?

⁶ Neryo Akĩsĩ mwamuha eZĩklagĩ ekiro ekyo; kikaleka eZĩklagĩ ikyabya bwĩkalo bwʼabami ba Yũda erĩhĩka mũnabwĩre.

⁷ Nʼemiganzo yʼebiro ebyo Dawĩdĩ ĩkala omo kihugo kyʼAbafĩlĩstĩnĩ ni mwaka muguma gosĩ nʼemikera ĩnĩ.

Dawĩdĩ akayahũnga emĩyĩ yʼesyonzĩgũ

⁸ Neryo Dawĩdĩ nʼabalume buwe mobiruka, mobayahũnga Abagesũrĩ, nʼAbagĩrĩzĩ, nʼAbamalekĩ; kusangwa bo babya ndũlanĩ syʼekihugo ekyo, abatula kera eluhande lwʼeriya eSũrĩ erĩyahĩka omo kihugo kyʼeMĩsĩrĩ.

⁹ Na Dawĩdĩ mwahũnga ekihugo ekyo, mwatabalya mundu uliho mulume kutse mũkalĩ, kandi mwahũnga esyombũlĩ, nʼesyonde, nʼesyopunda, nʼesyongamia, nʼebyambalo; neryo mwasubula mwahĩka eyiri Akĩsĩ.

¹⁰ Neryo Akĩsĩ mwabũga ati, Mũnabwĩre ũlĩahũnga uku bahi kwehĩ? Na Dawĩdĩ mwabũga ati, Oko luhande lwʼeNegevĩ yʼeYũda, nʼoko Negevĩ yʼeYeremelĩ, nʼoko Negevĩ yʼAbakenĩ.

¹¹ Na Dawĩdĩ mwatabalya mundu uliho omulume kutse omũkalĩ, eriretabo eGatĩ, ati, Bakasyatwahula bati, Dawĩdĩ mwakola atya nʼatya, nʼemibere yiwe yabya itya omugulu gosĩ abya ĩkere omo kihugo kyʼAbafĩlĩstĩnĩ.

¹² Na Akĩsĩ mwĩkĩrĩrya Dawĩdĩ ati, Abirireka bandu buwe Baĩsraelĩ ĩbamũkwa esyonye; busana nʼekyo asyabya mugombe wage kera na kera.