1 Samwelĩ 26 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Neryo Abazĩfũ mobahĩka uku Saũlo eGĩbea, bati, Dawĩdĩ sĩayĩbĩsĩre oko kitwa kyʼeHakĩla, ekĩhererenĩe nʼembwarara kwehĩ?

² Neryo Saũlo mwahangana, mwandagalira omo mbwarara yʼeZĩfũ, iniane nʼabalume abayisogawa ba Ĩsraelĩ elfu ĩsatu haguma naye erisondera Dawĩdĩ yʼomo mbwarara yʼeZĩfũ.

³ Na Saũlo mwalalirira oko kitwa kyʼeHakĩla, ekĩhererenĩe nʼembwarara, hakũhĩ nʼembalu. Nĩkwa Dawĩdĩ mwĩkala omo mbwarara. Neryo omugulu alangira ko Saũlo akamukwama omo mbwarara,

⁴ Dawĩdĩ mwatuma abalĩngĩ, kandi mwaminya kwenene ko Saũlo abĩrĩhĩkayo.

⁵ Neryo Dawĩdĩ mwahangana, mwahĩka aho Saũlo alalirira; neryo Dawĩdĩ mwalangira aho Saũlo agotsere, na Abĩnerĩ mugala wa Nerĩ, omukulu wʼomulondo wuwe wʼabasĩrĩkanĩ; kandi Saũlo iniagotsere omo katĩkatĩ kʼekilaliriro nʼabandu babya balalĩrĩrĩ ĩbamũtĩmbĩreko.

⁶ Neryo Dawĩdĩ mwasũbĩrya mwabũga na Abĩmelekĩ Omũhĩtĩ, na Abĩsaĩ omugala wa Serũya, mugala wabo Yoabũ, ati, Nindi yukandiandagala nage oko kilaliriro eyiri Saũlo kwehĩ? Na Abĩsaĩ mwabũga ati, ĩngye ngandiandagala nawe.

⁷ Neryo Dawĩdĩ na Abĩsaĩ mobahĩka oko bandu omo kiro; neryo lebaya, Saũlo iniagotsere omo katĩkatĩ kʼekilaliriro inianeto, nʼerĩtũmo liwe ĩrĩnatsĩmbĩre omo kitaka hakũhĩ nʼomutwe wuwe; na Abĩnerĩ nʼabandu ibanagotsere ĩbanamũtĩmbĩreko.

⁸ Neryo Abĩsaĩ mwabwira Dawĩdĩ ati, Nyamuhanga abĩrĩhĩra enzĩgũ yawe omo byala byawe mũnabwĩre; neryo, kĩsĩ-kĩsĩ Uleke nyimutsimite omwʼĩtũmo erilabira omo kitaka ngendo nguma, sindiendimutsimita kabiri.

⁹ Nĩkwa Dawĩdĩ mwabwira Abĩsaĩ, ati, Sũmũheraye; kusangwa nindi wangatoka erisumbira ebyala biwe okwʼoyo Mwami Mukulu ayisoga, iniabya butsira musango kwehĩ?

¹⁰ Neryo Dawĩdĩ mwabũga nibya ati, Ngoko Mwami Mukulu aliho, Omwami Mukulu asyamutsimita; kutse ekiro kiwe kyʼerihola kyasyahĩka; kutse asyandagalira omo malwa, iniahola.

¹¹ Omwami Mukulu anyĩganaye erĩhĩra ebyala byage okwʼoyo Mwami Mukulu ayisoga, nĩkwa lino, ngakusaba, wĩmaye erĩtũmo eriri hakũhĩ nʼomutwe wuwe, nʼakasya kʼamagetsi, tugende.

¹² Neryo Dawĩdĩ mwĩmya erĩtũmo nʼakasya kʼamagetsi hakũhĩ nʼomutwe wa Saũlo; neryo mobayigendera, isihali mundu Wamalangira, kutse oyo wamaminya, kutse mohatabya oyo watsumbuka; kusangwa abosĩ babya omo tũgotserĩ, kusangwa ehĩgotserĩ hinene ehyalũa oko Mwami Mukulu ihyabirihambabo.

¹³ Neryo Dawĩdĩ mwasokera oko gundi mwisirya, mwahangana omo singi yʼekitwa hali; ihali omwanya munene omo katĩkatĩ kabo.

¹⁴ Neryo Dawĩdĩ mwabirikira bandu, na Abĩnerĩ mugala wa Nerĩ, ati, Iwe Abĩnerĩ, sũlĩsũbĩraya kwehĩ? Neryo Abĩnerĩ mwasũbĩrya ati, Uwendi uwe ukalakira omwami kwehĩ?

¹⁵ Neryo Dawĩdĩ mwabwira Abĩnerĩ ati, Suli mbangĩ kwehĩ? Kandi nindi yulingene nawe omo Ĩsraelĩ kwehĩ? Ko busana nakĩ sũlĩtateya omwami omukama wawe kwehĩ? Kusangwa omundu muguma mwakahĩka erĩĩta omwami omukama wawe.

¹⁶ Omwatsi uliakola syowene. Ngoko Mwami Mukulu aliho, mutolere erihola, kusangwa sĩmwetateya omukama wenyũ, oyo Mwami Mukulu ayisoga eribya mwami. Na lino mũlebaye erĩtũmo lyʼOmwami nga liri hahi, nʼakasya kʼamagetsi akabya ahali omutwe wuwe.

¹⁷ Neryo Saũlo mwaminya omulenge wa Dawĩdĩ, ati, Kwʼoyũ ni mulenge wawe, uwe mugala wage Dawĩdĩ kwehĩ? Neryo Dawĩdĩ mwabũga ati, Go nʼomulenge wage, uwe mwami, mukama wage.

¹⁸ Kandi mwabũga ati, Busana nakĩ omukama wage akakwamirira omugombe wuwe kwehĩ? Nakolĩrekĩ kwehĩ? Kutse erĩlolo eriri omo byala byage ni ryahi kwehĩ?

¹⁹ Nĩkwa lino kĩsĩ-kĩsĩ nyiti, omukama wage mwami ahũlĩkĩrĩraye ebĩnywa byʼomugombe wuwe. Amabya Omwami Mukulu ĩyũkakũkola-kolaya erilwa nage, alĩge ehongo; nĩkwa bamabya ini bandu, batakirawe embere syʼOmwami Mukulu; kusangwa bamanyihiga mũnabwĩre bati sinangamakirirana nʼomwandu wʼOmwami Mukulu, bati, Ugende, ukolere esindi nyamuhanga.

²⁰ Neryo lino Suleke omusasi wage akũtĩkĩra ehandi hate embere syʼOmwami Mukulu; kusangwa omwami wa Ĩsraelĩ aliasira erisonda-sonda akasito, ngʼomundu ukahiga engwali yʼomo bitwa.

²¹ Neryo Saũlo mwabũga ati, Nabĩrĩhalya; subula, uwe mugala wage Dawĩdĩ; kusangwa sindiendisyaswakukola nabi, kusangwa engebe yage yabiribya yʼenzwere yʼobũgulĩ omo meso wawe mũnabwĩre; lebaya nabere mũkĩrũ, nabĩrĩhalya kutsibu.

²² Neryo Dawĩdĩ mwasũbĩrya ati, Tungerera erĩtũmo, uwe mwami! omuguma oko balwana asokere eno enderyo.

²³ Kandi Omwami Mukulu asyaliha obuli mundu eritunganene riwe nʼobutaluha buwe; kusangwa Omwami Mukulu mwakakũhĩra omo byala byage mũnabwĩre, nage mondasonda erisumbira ebyala byage okwʼoyo Mwami Mukulu ayisoga eribya mwami.

²⁴ Kandi, lebaya, ngoko engebe yawe yĩlwe yʼobũgũlĩ bunene kutsibu omo meso wage, litya engebe yage yibye yʼobũgũlĩ bunene kutsibu omo meso wʼOmwami Mukulu, kandi anyĩlamaye omo malĩge wage gosĩ.

²⁵ Neryo Saũlo mwabwira Dawĩdĩ ati, Utsumulawe, omugala wage Dawĩdĩ; wasyakola nʼobũtokĩ, kandi wasyasĩngana kwenene. Neryo Dawĩdĩ mwayigendera ewuwe, na Saũlo mwasuba ewuwe.