1 Samwelĩ 25 - AMASAKO ABOYTRTRE WA NYAMUHANGA AWAKAHULAWA MO BIBLIA

Oluholo lwa Samwelĩ

¹ Neryo Samwelĩ mwahola; nʼAbaĩsraelĩ bosĩ mobayĩhĩndanĩa haguma, mobamulira, mobamuta omo nyũmba yiwe eRama. Neryo Dawĩdĩ mwahangana mwandagalira omo mbwarara yʼeParanĩ.

Nabalĩ na Abĩgaĩlĩ

² Kandi mohabya omundu eMaonĩ, nʼomũbĩrĩ wuwe abya eKarmelĩ; nʼomundu oyo abya muteke mukulu kutsibu, iniawite esyombũlĩ elfu ĩsatu, nʼesyombene elfu nguma; nʼoko mugulu oyo abya akatwa obweya bwʼesyombũlĩ siwe eKarmelĩ.

³ (Neryo erĩna lyʼomundu oyo lyabya Nabalĩ; nʼerĩna lyʼomũkalĩ wuwe Abĩgaĩlĩ; kandi omũkalĩ oyo abya wʼamenge, kandi ĩnĩ wʼobũsũ bũkomĩre. Nĩkwa omundu oyo abya wʼeritima nʼomubi omo mikolere yiwe; kandi abya wʼekĩtũnga kya Kalebũ.)

⁴ Neryo Dawĩdĩ mowĩra omo mbwarara ngoko Nabalĩ abya akatwa obweya bwʼesyombũlĩ siwe.

⁵ Neryo Dawĩdĩ mwatuma abalwana buwe ĩkũmĩ, kandi Dawĩdĩ mwabwirabo ati, Muhetukire eKaramelĩ, muye eyiri Nabalĩ, mũnyĩbũkĩraye ye omo lĩna lyage.

⁶ Neryo mwasyabũga muti, Obuholo bubye nawe, nʼobuholo bubye oko kĩtũnga kyawe, nʼobuholo bubye oko byosĩ uwite.

⁷ Neryo nabĩrĩowa kʼuwite abatwĩ bʼobweya; nʼabalĩsya bawe mobabya netu, kandi sitwetatsumabo, kutse sibetabula kindu omugulu gosĩ babya eKaramelĩ.

⁸ Ũbũlaye abalwana bawe, nabo basyakubwirakyo. Neryo Uleke abalwana babane erĩsĩmwa omo meso wawe; kusangwa twamahĩka oko kiro kyowene. Kĩsĩ-kĩsĩ, uhe abagombe bawe, nʼomugala wawe Dawĩdĩ ekyasyabanika omo byala byawe.

Nabali akanigira Dawĩdĩ

⁹ Nʼomugulu abalwana ba Dawĩdĩ bahĩka, mobabwira Nabalĩ ebĩnywa byosĩ ebyo omo lĩna lya Dawĩdĩ, neryo mobalinda.

¹⁰ Neryo Nabalĩ mwasũbĩrya bagombe ba Dawĩdĩ ati, Dawĩdĩ nindi kwehĩ? Na mugala wa Yese nindi kwehĩ? Hali bagombe bangi oko biro ebĩ abakatswa obuli mundu oko mukama wuwe.

¹¹ Nage nasyĩmya mandu wage, nʼamagetsi wage, nʼesĩswĩ syage, esĩkerĩre esyo indiakerera abatwĩ bage bʼobweya nʼerihabyo oko bandu abo ndasĩ eyo bakalũa kwehĩ?

¹² Neryo abalwana ba Dawĩdĩ mobasuba omo nzira yabo, mobasubula, mobasa mobamubwira ebĩnywa byosĩ ebĩ,

¹³ Na Dawĩdĩ mwabwira abalume buwe ati, Mũyĩkũndĩkeko obuli mundu omũyalĩ wuwe; na Dawĩdĩ naye mwayĩkũndĩkako mũyalĩ wuwe. Nʼabalume nga magana ani mobahetuka enyũma sya Dawĩdĩ; nʼamagana abiri mobasĩgala nʼebindu.

Abĩgaĩlĩ akasigulira Dawĩdĩ

¹⁴ Nĩkwa omuguma wʼabalwana mwabwira Abĩgaĩlĩ, omũkalĩ wa Nabalĩ, ati, Lebaya, Dawĩdĩ mwakatuma bakwenda bakalũa omo mbwarara, erĩsyaramũkya omukama wetu; naye abirihayirabo.

¹⁵ Nĩkwa abalume abo mobatuyira ndeke kutsibu, kandi motutatsumwa, kandi motutabula kindu esyondambĩ syosĩ twabya nabo, omugulu twabya omolĩ.

¹⁶ Mobabya lũhĩmbo ũkwʼĩtwe omo kiro nʼomo musibo omugulu twabya nabo erĩrĩsya esyombũlĩ.

¹⁷ Na lino Uminye ũganĩraye ekyo gukandikola kusangwa ebibi byabirikandayirirwa oko mukama wetu, nʼoko kĩtũnga kiwe kyosĩ. Kusangwa Nabalĩ ni mundu mutya-mutya, nʼomundu siangabũga naye.

¹⁸ Neryo Abĩgaĩlĩ mwanguha, mwĩmya mandu magana abiri (200), nʼehihanda hibiri hyʼebĩnyũ, nʼesyombũlĩ ĩtanu esĩsĩnzĩre, nʼesyondengĩ ĩtanu syʼengano ĩkalangĩre, nʼemikololo ĩgana yʼebĩnyũ (100), nʼemibumbo magana abiri yʼomũtĩnĩ, neryo mwahekyabyo esyopunda.

¹⁹ Kandi mwabũga nʼabalwana buwe, ati, Muye embere syage; lebaya, ngandibakwamirira. Nĩkwa mwatabwira ĩba wuwe Nabalĩ.

²⁰ Neryo omugulu agenda oko punda yiwe, nʼeriandagala oko kitambi kyʼekitwa, neryo lebaya, Dawĩdĩ nʼabandu buwe mobandagalira eyo ali; naye mwahĩndana nabo.

²¹ Nĩkwa Dawĩdĩ ĩnĩamabĩbũga ati, Monzo kwenene indiategeraya busa ebyosĩ omundu oyũ awite omo mbwarara, isihetabula kindu nʼekiguma kyʼoko byosĩ biwe, naye abĩrĩnyĩsũbũlĩrya ebibi busana nʼebibuya.

²² Nyamuhanga akolere esyonzĩgũ sya Dawĩdĩ, na kwilaba aho nibya, nga nasyatasĩga omwana wʼobulume nʼomuguma oko bosĩ buwe erĩhĩka omo ngyakya bukakya.

²³ Nʼomugulu Abĩgaĩlĩ alangira Dawĩdĩ, mwanguha mwakĩma oko punda yiwe, mwawa oko bũsũ buwe embere sya Dawĩdĩ, mwayũnamya ahisi.

²⁴ Kandi mwawa oko bisando biwe mwabũga ati, mukama wage, ekibi ekyo kinyibyeko, ĩngye kinabyeko. Kĩsĩ-kĩsĩ Uleke omutsana wawe abũgĩre omo matwĩ wawe, kandi nawe uhulikirire ebĩnywa byʼomutsana wawe.

²⁵ Kĩsĩ-kĩsĩ, Suleke omukama wage akalangira omundu mutya-mutya ono ye Nabalĩ; kusangwa ngoko erĩna liwe liri, kwʼane atya. Nabalĩ lyo lĩna liwe nʼobũkĩrũ buli naye; nĩkwa ĩngye mutsana wawe, mondalola oko balwana bʼomukama wage, abo watuma.

²⁶ Neryo lino, mukama wage, ngoko Mwami Mukulu aliho, kandi ngoko ekĩrĩmũ kyawe kiriho, ngoko Mwami Mukulu abĩrĩkũkakĩrya erĩũta omusasi, nʼerĩyĩkĩsĩrya omo byala byawe, neryo lino abayĩgũ bawe, nʼabakatsũtsĩra omukama wage yo nabi, babye nga Nabalĩ.

²⁷ Na lino olũsũnzo olũ omugombe wawe akaletera omukama wage, ahabawe abalwana abakakwama omukama wage.

²⁸ Kĩsĩ-kĩsĩ ubuyire erĩlolo lyʼomugombe wawe wʼobũkalĩ; kusangwa Omwami Mukulu kwenene asyahĩmbĩra omukama wage enyũmba ĩsĩkĩre, kusangwa omukama wage akalwa malwa wʼOmwami Mukulu; kandi erĩlolo siryendisyabanika umʼuwe ebiro byawe byosĩ.

²⁹ Nomo mundu angahangana erikukwamirira, nʼerisonda-sonda erĩkwĩta, engebe yʼomukama wage yasyaboherwa omo mufuko wʼabaliho haguma nʼOmwami Mukulu Nyamuhanga wawe; nʼesyongebe syʼabayĩgũ bawe, asyagusasyo ngʼerĩbwe erĩkalũa omo kahu kʼomũjeledĩ.

³⁰ Neryo Omwami Mukulu asyabya abikola omukama wage ngʼebibuya byosĩ ebyo abirikwahũlĩrya, nʼerikuyira mo mũtabalĩ uku Ĩsraelĩ,

³¹ neryo ekĩ sikyangabya ndwĩkale ukʼuwe, kutse ekyangagalya omutima wʼomukama wage, kutse busana nʼerĩũta omusasi hate ekikaleka, kutse busana nʼomukama wage angayĩkĩsya. Kandi omugulu Omwami Mukulu amabikolera omukama wage yo ndeke, neryo Wibuke omugombe wawe wʼobũkalĩ.

³² Neryo Dawĩdĩ mwabũga na Abĩgaĩlĩ ati, Omwami Mukulu, Nyamuhanga wa Ĩsraelĩ, apipawe oyuliakutuma erĩhĩndana nage mũnabwĩre;

³³ Nʼamenge wawe atsumulawe, nawe utsumulawe, kusangwa wabĩrĩnyĩkakĩrya oko musango wʼomusasi mũnabwĩre, kandi okwʼĩyĩkĩsya omo byala byage.

³⁴ Kusangwa kwenene, ngoko Mwami Mukulu, Nyamuhanga wa Ĩsraelĩ aliho, oyo wabĩrĩnyĩkakĩrya erikukola nabi, utalyanyanguhira okwʼĩsyahĩndana nage, kwenene sĩhangasĩgere uku Nabalĩ okwʼikya lyʼengyakya omwana nʼomuguma wʼobulume.

³⁵ Neryo Dawĩdĩ mwangirira omo byala biwe mwʼebindu ebyo amuletera. Neryo mwabũga naye ati, Uhetukire oko nyũmba yawe nʼobuholo; langira, nabirihulikirira omulenge wawe, nabĩrĩkũlĩgĩra.

Oluholo lwa Nabalĩ

³⁶ Kandi Abĩgaĩlĩ mwahĩka eyiri Nabalĩ; neryo, lebaya, ĩnĩabĩrĩkokotya erirya ĩnene omo nyũmba yiwe, ngʼerirya ĩnene lyʼOmwami; nʼomutima wa Nabalĩ ĩnĩatsangĩre omwisi wuwe, kusangwa ĩnĩabĩrĩkũnda kutsibu; busana nʼekyo mwatamubwira kyahi, ekike kutse kinene, erĩhĩka okwʼikya lyʼengyakya.

³⁷ Neryo engyakya, omugulu ebĩnyũ byahwa uku Nabalĩ, omũkalĩ wuwe mwamugambulira emyatsi eyĩ, nʼomutima wuwe mwalekula omwisi wuwe, neryo mwabya ngʼerĩbwe.

³⁸ Neryo habere hahwa nga biro ĩkũmĩ enyũma kwʼaho, Omwami Mukulu mwaswĩrya Nabalĩ, neryo mwahola.

Dawĩdĩ akahĩkaya Abĩgaĩlĩ

³⁹ Neryo omugulu Dawĩdĩ owa ko Nabalĩ abirihola, mwabũga ati, Omwami Dawĩdĩ akahalaya Saũlo kandi Mukulu apipawe, kusangwa abĩrĩkĩsya omwatsi wʼebĩtsũmĩ byage omo byala bya Nabalĩ, kandi abĩrĩkakĩrya omugombe wuwe erikola ebibi. Nʼerikola nabi lya Nabalĩ, Omwami Mukulu abĩrĩsũbyalyo oko mutwe wuwe. Kandi Dawĩdĩ mwatuma erĩyabũlya busana na Abĩgaĩlĩ busana nʼerĩmũhĩkya.

⁴⁰ Nʼomugulu abagombe ba Dawĩdĩ bahĩka eyiri Abĩgaĩlĩ eKarmelĩ, mobamubwira bati, Dawĩdĩ abiritutuma ukʼuwe ati, Ayakũhĩkaye.

⁴¹ Neryo mwahangana, mũnamĩrya obũsũ buwe bwʼahisi, ati, Lebaya, omutsana wʼobũkalĩ wawe ni mutsana wʼerĩerya ebisando byʼabagombe bʼomukama wage.

⁴² Neryo Abĩgaĩlĩ mwanguha, mwahangana, mwagenda oko punda, haguma nʼabalembya buwe batanu abamukwama; kandi mwakwama abakwenda ba Dawĩdĩ, neryo mwabya mũkalĩwe.

Dawĩdĩ akahĩkaya Ahĩnoamũ

⁴³ Dawĩdĩ mwahĩkya Ahĩnoamũ nibya owʼeYezreelĩ; nʼababiri bosĩ mobabya bakalĩ buwe.

⁴⁴ Nĩkwa Saũlo iniamabiha mwali wuwe Mĩkalĩ, omũkalĩ wa Dawĩdĩ, uku Paltĩ mugala wa Laĩsĩ, oyo wabya wʼeGalĩmũ.