1 Samwelĩ 24 - AMASAKO ABOYTRTRE WA NYAMUHANGA AWAKAHULAWA MO BIBLIA

Dawĩdĩ akaganyira Saũlo

¹ Neryo omugulu Saũlo asubula okwʼikwama Abafĩlĩstĩnĩ mwabwirwa ambu Dawĩdĩ ali omo mbwarara yʼeEngedĩ.

² Neryo Saũlo mwĩmya balume elfu ĩsatu abayisogawa omo Ĩsraelĩ yosĩ, neryo mwayasonda-sondya Dawĩdĩ nʼabandu buwe embere wʼOlukuka lwʼEsyombene Syʼomolĩ.

³ Kandi Saũlo mwahĩka oko bĩyĩte byʼesyombũlĩ omo nzira, ahabya omwangalũ; neryo Saũlo mwingiramo eriya emboko. Nĩkwa Dawĩdĩ nʼabalume buwe babya bĩkere oko mũheryo wʼomwangalũ.

⁴ Nʼabandu ba Dawĩdĩ mobamubwira bati, Lebaya, lero ekiro ekyo Mwami Mukulu akwahũlĩraya, ati, Lebaya; nasyahĩra enzĩgũ yawe omo byala byawe, wasyamukola ngoko Ũkaganĩraya uti lyowene oko meso wawe. Neryo Dawĩdĩ mwahangana, mwatwa omũsĩke wʼekanzu ya Saũlo bũbĩso-bĩso.

⁵ Neryo enyũma wʼaho, omutima wa Dawĩdĩ mwamũhĩsĩrĩranĩa, kusangwa iniabirisara oko kanzu ya Saũlo.

⁶ Neryo mwabwira balume buwe ati, Omwami Mukulu anyĩkakĩraye erikola omwatsi oyũ oko mukama wage, omũhakabĩbwa wʼOmwami Mukulu, erimusumbira ebyala byage, kundi nĩ mũhakabĩbwa wʼOmwami Mukulu.

⁷ Neryo Dawĩdĩ mwakakĩrya bandu buwe nʼebĩnywa ebĩ, kandi mwatalĩga bakagulukira Saũlo. Neryo Saũlo mwahangana, mwalũa omo mwangalũ, mwagenda oko lugendo luwe.

⁸ Enyũma wʼaho Dawĩdĩ naye mwahangana mwalũa omo mwangalũ, neryo mwabirikira Saũlo ati, mukama wage mwami! Nʼomugulu Saũlo akebera enyũma, Dawĩdĩ mũnamĩrya obũsũ buwe bwʼahisi, mwamũnamira.

⁹ Neryo Dawĩdĩ mwabwira Saũlo ati, Ukahulikirira ebĩnywa byʼabandu busana nakĩ kwehĩ? Abakabũga bati, Lebaya, Dawĩdĩ akasonda erikukola nabi.

¹⁰ Lebaya, mũnabwĩre ameso wawe abĩrĩyĩreberya ngoko Mwami Mukulu abĩrĩkũhĩra mũnabwĩre omo byala byage omo mwangalũ; nʼabandi bati nyĩkwĩte, nĩkwa mongakuganyira; nyiti, sindiendisumba ebyala byage erĩĩta omukama wage; kusangwa nĩ mũhakabĩbwa wʼOmwami Mukulu.

¹¹ Kandi, tata wage, lebaya omutsotso wʼekanzu yawe goyũ omo byala byage; kusangwa indyasara omutsotso wʼekanzu yawe, kandi mondetakwĩta, kandi Uminye, ulangire ko hate kibi kutse pono omo byala byage, kandi sinditakukola nabi, nomo gukasonda-sonda erĩtolya engebe yage erĩlũsya yoho.

¹² Omwami Mukulu atswere omo katĩkatĩ kage nawe, kandi Omwami Mukulu anyĩkĩsĩraye iwe; nĩkwa ebyala byage sibyendisyabya ukʼuwe.

¹³ Ngʼomũsyo wʼabakera ati, Omo babi mũkalũa ebibi; nĩkwa ebyala byage sibyendisyalwa nawe.

¹⁴ Ko mwami wa Ĩsraelĩ akahongokerandi kwehĩ? Ukakwamirirandi kwehĩ? ekĩholerya kyʼembwa, kutse ekisito kiguma kwehĩ?

¹⁵ Neryo Omwami Mukulu abye mũtswerĩ, atwe olubanza omo katĩkatĩ kage nawe, kandi alangire, imire omwatsi wage, kandi anyĩlamaye omo byala byawe.

Saũlo akaleka Dawĩdĩ

¹⁶ Neryo omugulu Dawĩdĩ abuga erĩkanĩrya Saũlo yʼebĩnywa ebĩ, Saũlo mwabũga ati, Kʼoyũ ni mulenge wawe, iwe Dawĩdĩ mugala wage kwehĩ? Neryo Saũlo mwasumba omulenge wuwe, mwalira.

¹⁷ Neryo mwabwira Dawĩdĩ, ati, Uwe uli mutunganene kwilaba ngye; kusangwa Wabirinyikolera ebibuya, nĩkwa ĩngye nabirikukolera nabi.

¹⁸ Nawe wabĩrĩtũlago mũnabwĩre ngoko Wabirinyikolera ekibuya, kusangwa omugulu Omwami Mukulu anyĩhĩra omo byala byawe, mũtanyĩta.

¹⁹ Kusangwa omundu ameya enzĩgũ yiwe, anganamuleka erigenda buholo kwehĩ? Neryo Omwami Mukulu akuhembe bibuya busana nʼebyo wabiringolera mũnabwĩre.

²⁰ Na lino, lebaya, nyĩnasĩ kwenene kʼukandisyabya mwami, nʼobwami bwa Ĩsraelĩ bwasyasĩkĩbwa omo byala byawe.

²¹ Neryo lino ũnyĩlahĩrĩraye oko Mwami Mukulu kʼutendĩsyaherya bana bage enyũma wage, kandi ĩsĩwendĩsyaherya erĩna lyage erĩlũa omo kĩtũnga kya tata.

²² Neryo Dawĩdĩ mwalahĩrĩrya Saũlo. Neryo Saũlo mwayigendera eka wuwe; nĩkwa Dawĩdĩ nʼabalume buwe mobiruka mobaya ahakagatĩre aho.