1 Samwelĩ 23 - AMASAKO ABOYTRTRE WA NYAMUHANGA AWAKAHULAWA MO BIBLIA

Dawĩdĩ akalamaya eKeĩla

¹ Neryo mobabwira Dawĩdĩ bati, Lebaya Abafĩlĩstĩnĩ bakalwa nʼeKeĩla, ĩbanemũhũnga ebiri oko bibuga byʼerĩhũmbĩrako.

² Neryo Dawĩdĩ mwabũlya Omwami Mukulu, ati, Ko nyiyeyo nʼerilwa nʼAbafĩlĩstĩnĩ aba kwehĩ? Neryo Omwami Mukulu mwabwira Dawĩdĩ ati, Ugende Uyalwe nʼAbafĩlĩstĩnĩ, ũlamaye eKeĩla.

³ Nʼabandu ba Dawĩdĩ mobamubwira bati, Lebaya, eYũda eno tukubaha. Sitwendisyubaha kutsibu kwʼaho twamaya eKeĩla eriyalwa nʼemilondo yʼAbafĩlĩstĩnĩ kwehĩ?

⁴ Neryo kandi Dawĩdĩ mwabũlya Omwami Mukulu. NʼOmwami Mukulu mwamũsũbĩrya ati, Hangana wandagalire eKeĩla; kusangwa ngandĩhĩra Abafĩlĩstĩnĩ bʼomo byala byawe.

⁵ Neryo Dawĩdĩ nʼabalume buwe mobaya eKeĩla, mobalwa nʼAbafĩlĩstĩnĩ, mobanyega esyonde syabo, kandi mobĩtabo kutsibu. Na Dawĩdĩ mwalamya esyondũlanĩ syʼeKeĩla syʼatya.

⁶ Neryo omugulu Abĩatarĩ mugala wa Ahĩmelekĩ asagira eyiri Dawĩdĩ eKeĩla, mwandagala nʼeefodĩ omo byala biwe.

⁷ Neryo omugulu babwira Saũlo ambu Dawĩdĩ abĩrĩhĩka eKeĩla, Saũlo mwabũga ati, Nyamuhanga abĩrĩmũhĩra omo byala byage; kusangwa amayikingira, iniabiringira omo mũyĩ owawite esyongyo ĩbĩrĩ nʼemihomo.

⁸ Neryo Saũlo mwabirikira bandu bosĩ busana nʼamalwa, nʼeriandagalira eKeĩla, erigotera Dawĩdĩ nʼabandu buwe.

⁹ Kandi Dawĩdĩ anabya asĩ ko Saũlo abirimukandayirira omo kibi; neryo mwabwira Abĩatarĩ omũhererĩ, ati, Ulete hano eefodĩ.

¹⁰ Neryo Dawĩdĩ mwabũga ati, Uwe Mwami Mukulu, Nyamuhanga wa Ĩsraelĩ, omugombe wawe abĩrĩowa kwenene ngoko Saũlo akasonda erĩhĩka eKeĩla, erĩherya omũyĩ busana nage.

¹¹ Abalume bʼeKeĩla basyanyihotera omo byala biwe kwehĩ? Saũlo akandiandagala ngoko mugombe wawe abĩrĩowago kwehĩ? Uwe Mwami Mukulu, Nyamuhanga wa Ĩsraelĩ, ngakusaba nyiti, Ubwire omugombe wawe. Neryo Omwami Mukulu mwabũga, ati, Akandiandagala.

¹² Neryo Dawĩdĩ mwabũlya ati, Abalume bʼeKeĩla basyanyihotera nʼabandu bage omo byala bya Saũlo kwehĩ? Neryo Omwami Mukulu mwamubwira ati, Bakandikuhotera.

¹³ Neryo Dawĩdĩ nʼabalume buwe, ababya nga magana ndatu, mobahangana mobalũa eKeĩla, mobagenda ehosĩ batoka eriya. Neryo mokyabwirwa Saũlo ko Dawĩdĩ abiribala akalũa eKeĩla; neryo mũmbya eriyamuhiga.

Dawĩdĩ na Yonatana bakaswalagana

¹⁴ Neryo Dawĩdĩ mwĩkala omo mbwarara omo hakagatĩre, mwĩkala omo kihugo kyʼebitwa kyʼembwarara yʼeZĩfũ. Na Saũlo mwamusonda-sonda obuli kiro, nĩkwa Nyamuhanga mwatamũhĩra omo byala biwe.

¹⁵ Neryo Dawĩdĩ mwaminya ngoko Saũlo abirihongoka erisonda-sonda engebe yiwe omugulu Dawĩdĩ abya omo mbwarara yʼeZĩfũ eHoresĩ.

¹⁶ Neryo Yonatana, omugala wa Saũlo, mwahangana, mwaya eyiri Dawĩdĩ eHoresĩ, mwasĩkya omutima wa Dawĩdĩ uku Nyamuhanga.

¹⁷ Kandi mwamubwira ati, Sigubahe; kusangwa ebyala bya Saũlo tata wage sibyendisyakubana; nawe Wasyabya mwami wa Ĩsraelĩ, nage nasyabya wʼakabiri gʼukwʼiwe; na tata wage Saũlo anasĩ ekyo.

¹⁸ Neryo ibo ababiri mobalagana embere syʼOmwami Mukulu; na Dawĩdĩ mwĩkala eHoresĩ. Na Yonatana mwaya eka wuwe.

Saũlo akakwamirira Dawĩdĩ omo mbwarara

¹⁹ Neryo Abanya Zĩfũ mobasa ewa Saũlo eGĩbea, mobabũga, bati, Ko Dawĩdĩ sĩayĩbĩsĩre ũmwʼĩtwe ahakagatĩre eHoresĩ, omo kitwa kyʼeHakĩla, ekiri elutambi lwʼeyĩkwa lwʼembwarara yʼeYesĩmonĩ kwehĩ?

²⁰ Neryo lino, uwe mwami, Wandagale, ngʼomutima wawe kwʼakasonda eriandagala; neryo erĩmũhĩra omo byala byʼOmwami likandibya lyetu.

²¹ Neryo Saũlo mwabũga, ati, Mutsumulawe nʼOmwami Mukulu; kusangwa mwabirinyiganyira.

²² Mugende, mũyĩtegereraye ndeke, muminye aho akasiba, nʼoyo wabirimulolako eyo; kusangwa nabiribwirwa kwʼakakola nʼamenge kutsibu.

²³ Neryo mũlebaye obũbĩsamo buwe bosĩ obwʼakabĩsamamo, neryo musube eyo nyiri nʼeriminya, nage nasyagenda haguma nenyũ; neryo amabya ali omo kihugo, nasyamusonda-sondya omo katĩkatĩ kʼamaelfu gosĩ wa Yũda.

²⁴ Neryo mobahangana, mobaya eZĩfũ embere sya Saũlo; nĩkwa Dawĩdĩ nʼabandu buwe babya omo mbwarara yʼeMaonĩ eAraba ebwanga bwʼeLutambi lwʼeYĩkwa lwʼeYesĩmonĩ.

²⁵ Neryo omugulu Saũlo nʼabalume buwe bayamũsondaya, mobabwira Dawĩdĩ, neryo mwandagalira eyiri olukuka mwĩkala omo mbwarara yʼeMaonĩ. Neryo Saũlo omugulu owago, mwatolya Dawĩdĩ omo mbwarara yʼeMaonĩ.

²⁶ Na Saũlo mwagenda oko luhande olũ lwʼekitwa, na Dawĩdĩ nʼabalume buwe oko luhande lulya lwʼekitwa; kandi Dawĩdĩ mwanguha erisaga Saũlo, kusangwa Saũlo nʼabalume buwe mobatanga-tanganĩa Dawĩdĩ nʼabalume buwe erihambabo.

²⁷ Nĩkwa omukwenda mwahĩka uku Saũlo ati, Wanguhe wase, kusangwa Abafĩlĩstĩnĩ bamabinyega ekihugo.

²⁸ Neryo Saũlo mwasubula okwʼĩtolya Dawĩdĩ, mwayalwa nʼAbafĩlĩstĩnĩ. Kyaleka ibaluka aho mo Libwe Ryʼeribaliramo.

²⁹ Na Dawĩdĩ mwalũaho, mwĩkala ahakagatĩre hʼeEngedĩ.