1 Samwelĩ 21 - AMASAKO ABOYTRTRE WA NYAMUHANGA AWAKAHULAWA MO BIBLIA

Ahĩmelekĩ akawatĩkaya Dawĩdĩ

¹ Neryo Dawĩdĩ mwahĩka eNobũ uku Ahĩmelekĩ omũhererĩ; kandi Ahĩmelekĩ mwasa erimusangana akatitimana, mwabũga naye ati, Uli ĩwowene busana nakĩ, kandi suli na mundu kwehĩ?

² Neryo Dawĩdĩ mwabwira omũhererĩ Ahĩmelekĩ, ati, Omwami abirimba omũbĩrĩ, ati, Suleke mundu akaminya omũbĩrĩ ogo ngakutumira nʼogo ngakulayira, nage nabirituma abalwana bo halebe.

³ Neryo uwitekĩ omo byala byawe kwehĩ? Umba mandu atanu omo byala byage, kutse ekyo wanganabana.

⁴ Nʼomũhererĩ mwasũbĩrya Dawĩdĩ ati, Sihali bundu obubegerwe, nĩkwa hali bundu bũbũyĩrĩre; abalwana nga balwe bayĩrerekĩre oko bakalĩ.

⁵ Neryo Dawĩdĩ mwasũbĩrya omũhererĩ, ati, Kwenene abakalĩ babirirerekwa ũkwʼĩtwe oko biro bisatu ebĩ; omugulu nahongoka, abalwana balwe babũyĩrĩre, nomo lũnalwe lugendo lwʼebiro byosĩ; na lino abalwana babiriyibika mo babũyĩrĩre ndeke kwilaba aho.

⁶ Neryo omũhererĩ mwamuha mandu abũyĩrĩre; kusangwa sihabya mandu, wa nʼamandu wʼerĩkanganĩa, awalũsĩbawa embere syʼOmwami Mukulu, erĩsũbyaho amandu ahũhĩre ekiro alĩalũsĩbawaho.

Omũlĩngĩ ye Doegĩ

⁷ Oko kiro ekyo habya mundu muguma wʼomo bagombe ba Saũlo, oyo wakakĩrĩbawa embere syʼOmwami Mukulu; iniakahulawa mo Doegĩ Munya Edomũ, omukulu wʼabalĩsya ba Saũlo.

⁸ Kandi Dawĩdĩ mwabũlya Ahĩmelekĩ ati, Ko suwite hano okwʼĩtũmo kutse omũyalĩ omo byala byawe kwehĩ? Kusangwa sinditaleta omũyalĩ wage kutse ebindu byʼamalwa haguma nage, kusangwa omũbĩrĩ wʼOmwami aronda erĩangũhya.

⁹ Nʼomũhererĩ mwabũga, ati, Omũyalĩ wa Golĩata Omũfĩlĩstĩnĩ, oyo wĩtĩra omo musya wʼeEla, lebaya, alĩngĩrwe hano omo lukimba enyũma wʼeefodĩ. Wamanza erĩĩmyago, wĩmayego; kusangwa sihali gundi go nʼoyo musa hano. Na Dawĩdĩ mwabũga ati, Sihali gundi ngʼoyo; umbago.

Dawĩdĩ akasagira eGatĩ

¹⁰ Neryo Dawĩdĩ mwahangana, mwatibita ekiro ekyo busana nʼeriubaha Saũlo, mwaya eyiri Akĩsĩ omwami wʼeGatĩ.

¹¹ Neryo abagombe ba Akĩsĩ mobamubwira bati, Oyũ sĩ Dawĩdĩ omwami kihugo kwehĩ? Oyo basatira nʼeriimba bati, Saũlo abĩrita amaelfu wuwe, Na Dawĩdĩ amaelfu wuwe makũmĩ kwehĩ?

¹² Neryo Dawĩdĩ mwabika ebĩnywa ebĩ omo mutima wuwe, kandi mubaha kutsibu ye Akĩsĩ omwami wʼeGati.

¹³ Neryo mwahindula emigendere yiwe embere syabo mwayiyira ngʼomũsĩre omo byala byabo, nʼerĩkorya-korya oko syonyũyĩ syʼoko lũkyo, nʼerĩyĩtogongerya kʼolukonda omo nderũ siwe.

¹⁴ Neryo Akĩsĩ mwabwira bagombe buwe ati, Mũlebaye, mulangire omundu oyũ nĩ mũsĩre; muliandetera omundu oyũ busana nakĩ kwehĩ?

¹⁵ Ko nyĩbũlĩre basĩre, kikaleka imwaleta omundu oyũ erĩsyasĩrĩmĩra omo meso wage kwehĩ? kwʼomundu oyũ anganingira omo nyũmba yage kwehĩ?