1 Samwelĩ 19 - AMASAKO ABOYTRTRE WA NYAMUHANGA AWAKAHULAWA MO BIBLIA

Yonatana akimira Dawĩdĩ

¹ Neryo Saũlo mwabwira Yonatana mugala wuwe, nʼabagombe buwe bosĩ ati, bĩte Dawĩdĩ. Nĩkwa Yonatana, mugala wa Saũlo, mwasĩma Dawĩdĩ yo ndeke.

² Neryo Yonatana mwabwira Dawĩdĩ ati, Saũlo, tata wage akasonda erĩkwĩta. Nĩkwa ngakwombomberaya Ũyĩtegaye omo ngyakya, Wĩkale ahabĩsamĩre, ũyĩbĩse.

³ Nage ngandisyahuluka eriimana aho mũsĩke uku tata omolĩ aho uli, nage ngandĩkũkanĩrya na tata wage; kandi namalangira omwatsi iningandisyakubwira.

⁴ Neryo Yonatana mwahalambira Dawĩdĩ uku Saũlo ĩse, ati, Omwami siakole omugombe wuwe Dawĩdĩ yo nabi, kusangwa sialitakukola nabi, kandi kusangwa emĩbĩrĩ yiwe ni mibuya kutsibu ukʼuwe.

⁵ Kusangwa mwatsama engebe yiwe omo byala biwe, mwĩta Omũfĩlĩstĩnĩ oyo, nʼOmwami Mukulu mwakola erilama ĩnene busana nʼAbaĩsraelĩ bosĩ; mowalangirakyo, kandi mowatsema; ko busana nakĩ ukasonda erĩhalya oko musasi owate ko musango, nʼerĩĩtĩra Dawĩdĩ yo busa kwehĩ?

⁶ Neryo Saũlo mwahulikirira omulenge wa Yonatana. Neryo Saũlo mwalahĩrya, ati, Ngoko Mwami Mukulu aneho, Dawĩdĩ sĩendĩsyĩtwa.

⁷ Neryo Yonatana mwabirikira Dawĩdĩ, kandi Yonatana mwamũmĩnyĩsya emyatsi yosĩ eyo. Kandi Yonatana mwaleta Dawĩdĩ ahali Saũlo, neryo mwasyabya embere siwe, ngʼerĩmbere.

Saũlo akalenga erĩĩta Dawĩdĩ omwʼĩtũmo engendo yʼakabiri

⁸ Neryo mohabya amalwa kandi; na Dawĩdĩ mwahongoka, mwalwa nʼAbafĩlĩstĩnĩ, kandi mwĩtabo bwĩte bimene, nabo mobamusaga mobatibita.

⁹ Nʼekĩrĩmũ kibi ekyatumawa nʼOmwami Mukulu mokyabya uku Saũlo, ĩnĩanĩkere omo nyũmba yiwe inianawite okwʼĩtũmo omo byala biwe; na Dawĩdĩ iniakawata enanga omo byala biwe.

¹⁰ Neryo Saũlo mwalenga eritsimita Dawĩdĩ omwʼĩtũmo erimutsindikira oko lũhĩmbo; nĩkwa mwayihengeka okwʼĩtũmo lya Saũlo, na Saũlo mwatsimita olũhĩmbo lʼomwʼĩtũmo; neryo Dawĩdĩ mwatibita, mwabala omo kiro ekyo.

¹¹ Kandi Saũlo mwatuma abakwenda omo nyũmba ya Dawĩdĩ, erĩyamũlĩmbya, nʼerĩmwĩta omo ngyakya. Na Mĩkalĩ muka Dawĩdĩ, mwamubwira, ati, Wamatĩndalamya obuyingo bwawe omo kiro kino, omo ngyakya ĩwasyĩtwa.

¹² Neryo Mĩkalĩ mwakĩmya Dawĩdĩ omwʼĩdĩrĩsa; neryo mwagenda, mwatibita, mwabala.

¹³ Neryo Mĩkalĩ mwĩmya ekĩsosekanĩo, mwahĩrakyo omo ngyingo, kandi mwahĩra ekisegemero kyʼobweya bwʼembene oko mutwe wakyo, neryo mwaswikakyo emyenda.

¹⁴ Kandi omugulu Saũlo atuma abakwenda eriyatsimba Dawĩdĩ, Mĩkalĩ mwabũga ati, Alwere.

¹⁵ Neryo Saũlo mwatuma abakwenda erĩyalebya Dawĩdĩ, ati, Mumutelulire aho nyiri oko ngyingo yiwe, nyĩmwĩte.

¹⁶ Nʼomugulu abakwenda bahĩkamo, kwesĩ, ĩkye kĩsosekanĩo kĩlwe omo ngyingo, nʼomusegemero gʼobweya bwʼembene oko mutwe wayo.

¹⁷ Neryo Saũlo mwabũga na Mĩkalĩ ati, Ko busana nakĩ wamanyiteba utya, nʼerĩbalya enzĩgũ yage, neryo abirinyitswako kwehĩ? Neryo Mĩkalĩ mwasũbĩrya Saũlo, ati, mwanyibwira ati, Uleke nyigende; nangakwĩtĩrakĩ kwehĩ?

Saũlo akakwamirira Dawĩdĩ

¹⁸ Neryo Dawĩdĩ mwatibita mwabala mwahĩka eyiri Samwelĩ eRama, kandi mwamubwira ebyosĩ ebyo Saũlo amukolera. Neryo Dawĩdĩ na Samwelĩ mobayĩkala eNayotĩ.

¹⁹ Neryo mobabwira Saũlo bati, Lebaya, Dawĩdĩ ali eNayotĩ eRama.

²⁰ Neryo Saũlo mwatuma abakwenda eriyahamba Dawĩdĩ; neryo omugulu balangira endeko yʼabamĩnyererĩ bakaminyerera, na Samwelĩ iniahangeneho mo mukulu wabo, Omũlĩmũ wa Nyamuhanga mwahĩka oko bakwenda ba Saũlo, nabo mobaminyerera nibya.

²¹ Nʼomugulu Saũlo atũlĩrawago, mwatuma abandi bakwenda, kandi nabo nibya mobaminyerera. Kandi Saũlo mwatuma bakwenda engendo yʼakasatu, kandi mobaminyerera nibya.

²² Neryo Saũlo ĩyowene-wene mwaya eRama, mwahĩka oko kitehero kinene kyʼeSekũ; neryo mwabũlya ati, Ko Samwelĩ na Dawĩdĩ bali hahi kwehĩ? Neryo omundu muguma mwabũga ati, Lebaya, bali eNayotĩ eRama.

²³ Neryo Saũlo mwaya eNayotĩ eRama; nʼOmũlĩmũ wa Nyamuhanga mwamũhĩkako nibya, neryo mwalolya embere, iniakaminyerera erĩhĩka aho ahĩkĩra eNayotĩ eRama.

²⁴ Neryo Saũlo nibya mwayambula kwʼesyongimba siwe, mwaminyerera embere sya Samwelĩ, kandi mwalambama ahisi ho ndũmbũ omo musibo gosĩ, nʼekiro kyosĩ ekyo. Kikaleka ĩbabũga, bati, Ko Saũlo naye ali omo katĩkatĩ kʼabamĩnyererĩ kwehĩ?