1 Samwelĩ 18 - AMASAKO ABOYTRTRE WA NYAMUHANGA AWAKAHULAWA MO BIBLIA

Yonatana akanzana na Dawĩdĩ

¹ Neryo Dawĩdĩ abere abibuga erĩbũga na Saũlo, Yonatana mwanza Dawĩdĩ, kandi Yonatana mwamwanza ngoko ayanzĩre omo mutima.

² Neryo Saũlo mwĩmya Dawĩdĩ ekiro ekyo, mwataswamũlĩgĩra erisuba ewabo ĩse.

³ Neryo Yonatana na Dawĩdĩ mobalagana kusangwa mwamwanza ngoko ayanzĩre omo mutima.

⁴ Neryo Yonatana mwayambula ekanzu abya ambite, neryo mwahayo Dawĩdĩ, nʼebyambalo biwe byʼamalwa, nʼomũyalĩ wuwe, nʼobuta buwe, nʼomukoba wuwe.

⁵ Neryo Dawĩdĩ mwaya ehosĩ ko Saũlo amutuma, ĩnĩanayĩtondekĩre ndeke. Kandi Saũlo mwamuyira mo mukulu wʼabalume bʼamalwa, nʼekyo mokyatsemesya ameso wʼabandu bosĩ, nʼameso wʼabagombe ba Saũlo nibya.

Saũlo akahitana uku Dawĩdĩ

⁶ Neryo babere bakasa, omugulu Dawĩdĩ alũa okwʼĩta Omũfĩlĩstĩnĩ, abakalĩ mobahuluka omo mĩyĩ yosĩ ya Ĩsraelĩ, ibanemwimba nʼerisata, erĩhĩndana nʼomwami Saũlo, haguma nʼamasengo, haguma nʼobutseme, kandi haguma nʼesyonzenze.

⁷ Nʼabakalĩ mobimba bakawata esyonzenze, bati, Saũlo abĩrĩta amaelfu wuwe, Na Dawĩdĩ amaelfu wuwe makũmĩ.

⁸ Neryo Saũlo mwahiririkana kutsibu, nʼemĩbũge eyo moyĩtamũtsemesya; ati, Bamaganzira Dawĩdĩ yo maelfu makũmĩ, nage bamanyiganzira maelfu masa; hakĩsĩyakĩ ekyo atalyabana bute ibo nʼobwami kwehĩ?

⁹ Nʼerĩtsũka ekiro ekyo, Saũlo mwatsũka eribya akalola Dawĩdĩ yʼebitsule.

¹⁰ Neryo omo ngyakya wʼaho, ekĩrĩmũ kibi ekyo Nyamuhanga atuma mokyahĩka uku Saũlo nʼamaka, neryo mwabũga-bũgĩra omo nyũmba; na Dawĩdĩ naye mwawata enanga omo byala biwe, ngoko akanawatayo obuli kiro. Na Saũlo abya awite okwʼĩtũmo omo byala biwe;

¹¹ Neryo Saũlo mwagusa erĩtũmo; ĩnĩakabũga ati, Nganditsimita Dawĩdĩ erĩmũkolya oko lũhĩmbo. Na Dawĩdĩ mwayihengeka ngendo kabiri.

¹² Kandi Saũlo mubaha Dawĩdĩ, kusangwa Omwami Mukulu abya haguma naye, ĩnĩabĩrĩlũa uku Saũlo.

¹³ Kyaleka Saũlo ĩnĩalũsya Dawĩdĩ hakũhĩ naye nʼerimuyira mo mũsondolĩ wʼabasĩrĩkanĩ elfu; kandi Dawĩdĩ iniakasa nʼerisyahulukira embere syʼabandu.

¹⁴ Kandi Dawĩdĩ mwayitondeka ndeke omo nzira siwe syosĩ; kusangwa Omwami Mukulu abya haguma naye.

¹⁵ Nʼomugulu Saũlo alangira kwʼayĩtondekĩre ndeke, mwamubaha.

¹⁶ Nĩkwa Abaĩsraelĩ bosĩ nʼAbayũda mobanza Dawĩdĩ; kandi mwabya akasa nʼerisyahulukira embere syabo.

Merabũ akasĩgĩrawa Dawĩdĩ

¹⁷ Neryo Saũlo mwabwira Dawĩdĩ ati, Lebaya, mwali wage mukulu ye Merabũ yono, ngandikuhaye eribya mũkalĩ wawe; nĩkwa ekiguma kisa ubye mbangĩ busana nage, ulwire Omwami Mukulu. Kusangwa Saũlo ayibwira ati, Ebyala byage sibimubyeko, nĩkwa ebyala byʼAbafilĩstĩnĩ byo bilwe naye.

¹⁸ Kandi Dawĩdĩ mwabwira Saũlo ati, ko nage Ĩngyendi, nʼengebe yage nĩkĩ, kutse ekĩtũnga kyage omo Ĩsraelĩ, ekyangataleka inabya mukwe wʼOmwami kwehĩ?

¹⁹ Nĩkwa aho Dawĩdĩ angaherũkĩrye Merabũ mwali wa Saũlo, mwaherũkĩrĩbwa Adrĩelĩ Omũmeholatĩ.

²⁰ Neryo Mĩkalĩ, mwali wa Saũlo, mwanza Dawĩdĩ. Nakyo mokyabwirwa Saũlo, neryo mokyamutsemesya.

²¹ Neryo Saũlo mwabũga ati, Ngandimuhaye, iniabya kitego busana naye, neryo ebyala byʼAbafilĩstĩnĩ bibye nzĩgũ yiwe. Kyaleka Saũlo iniabwira Dawĩdĩ ati, Mũnabwĩre Ukandibya mukwe wage eryʼakabiri.

Dawĩdĩ akabya mukwe wa Saũlo

²² Kandi Saũlo mwahana bagombe buwe, ati bakanaye na Dawĩdĩ bũbĩsobĩso, babũge bati, Lebaya omwami akũsĩmĩre, nʼabagombe buwe bosĩ bakwanzĩre; ego lino ubye mukwe wʼOmwami.

²³ Nʼabagombe ba Saũlo mobabũgĩra ebĩnywa ebyo omo matwĩ wa Dawĩdĩ. Neryo Dawĩdĩ mwabũga ati, Mũkaganĩraya muti ni mwatsi muke eribya mukwe wʼOmwami kwehĩ? Mũnasĩ ko ndi mundu nzama nʼoyũtasĩbwe.

²⁴ Nʼabagombe ba Saũlo mobamũtũlĩrago bati, Dawĩdĩ kwʼabũgĩre atya.

²⁵ Na Saũlo mwabũga ati, Mubwire Dawĩdĩ muti, Omwami sĩanzĩre mũtahyo, nĩkwa ebĩtsũle ĩgana byʼAbafilĩstĩnĩ ayĩkĩsĩraye esyonzĩgũ syʼOmwami. Nĩkwa Saũlo aganĩraya erireka iniawa omo byala byʼAbafilĩstĩnĩ.

²⁶ Neryo omugulu abagombe buwe babwira Dawĩdĩ yʼebĩnywa ebĩ, mobyatsemesya Dawĩdĩ yo ndeke eribya mukwe wʼOmwami. Neryo ebiro ebyo isibiribyaberwa,

²⁷ Dawĩdĩ mwahangana mwahongoka, iye nʼabandu buwe, mobĩta omo Bafĩlĩstĩnĩ mo bandu magana abiri; na Dawĩdĩ mwaleta ebĩtsũle byabo, mobahabyo mwami omo miganzo ĩhĩkĩre, iniatoka eribya mukwe wʼOmwami. Na Saũlo mwamuha Mĩkalĩ mwali wuwe eribya mũkalĩwe.

²⁸ Neryo Saũlo mwalangira nʼeriminya ngoko Mwami Mukulu ali haguma na Dawĩdĩ; kandi ngoko Mĩkalĩ, mwali wa Saũlo, mwanza Dawĩdĩ,

²⁹ neryo Saũlo mubaha Dawĩdĩ kandi kutsibu. Busana nʼekyo Saũlo mwabya nzĩgũ ya Dawĩdĩ endambĩ yosĩ.

³⁰ Neryo abanya-mwami bʼAbafĩlĩstĩnĩ mobahongoka eriyalwa, neryo emigulu yosĩ babya bakahongoka, Dawĩdĩ mwayitondeka nʼamenge kwilaba bagombe bosĩ ba Saũlo; kyaleka erĩna liwe ĩryakũmayira.