1 Samwelĩ 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Amalwa nʼAbafĩlĩstĩnĩ Golĩata

¹ Oko mugulu oyo Abafĩlĩstĩnĩ mobahĩndanĩa emilondo yabo okwʼilwa; mobahĩndanĩbwa haguma eSoko, ewa Yũda, mobateka ekilaliriro omo katĩkatĩ kʼeSoko nʼeAzeka, oko Efese-damĩmũ.

² Na Saũlo nʼabalume ba Ĩsraelĩ mobahĩndana, mobateka ekilaliriro omo musya wʼeEla, mobategekanĩa malwa erilwa nʼAbafĩlĩstĩnĩ.

³ NʼAbafĩlĩstĩnĩ mobahangana oko kitwa oko luhande luguma, nʼAbaĩsraelĩ mobahangana oko kitwa oko lundi luhande; nʼomusya mwabya omo katĩkatĩ kabo.

⁴ Neryo embangĩ moyalũa omo kilaliriro kyʼAbafĩlĩstĩnĩ, iniakahulawa mo Golĩata, Omunya Gatĩ, nʼobuli buwe bwabya metere ĩbĩrĩ na sentĩmetre makũmĩ alinda na ndatu.

⁵ Kandi iniambite akakwa kʼomulinga oko mutwe wuwe, kandi iniambite obupa bwʼomulinga; nʼobũlĩto bwʼobupa obo bwabya bĩlo makũmĩ ndatu na munani.

⁶ Kandi iniambite oko mihimbi ebĩbambĩryo byʼomulinga, nʼerĩtũmo lyʼomulinga omo bitigo biwe.

⁷ Nʼolumango lwʼerĩtũmo liwe ĩlũsosĩre ngʼomugamba wʼomũlũkĩ wʼesyongohe; nʼekigembe kyʼerĩtũmo liwe kyabya kyʼekĩlo mwenda kyʼebyuma. Nʼomũhekĩ wʼengabo yiwe iniakagenda embere siwe.

⁸ Neryo mwimana mwabirikira oko milondo ya Ĩsraelĩ, ati, Ko muliasyateka endeko yʼamalwa busana nakĩ kwehĩ? Ko ĩngye Sindi Mũfĩlĩstĩnĩ nenyũ Simuli bagombe ba Saũlo kwehĩ? Muyisombolere omundu, anyandagalireko.

⁹ Amatoka erilwa nage nʼerĩnyĩta, netu twasyabya bakobe benyũ; nĩkwa namamũkĩnda nʼerĩmwĩta nenyũ mwasyabya bakobe betu nʼeritukolera.

¹⁰ Kandi Omũfĩlĩstĩnĩ mwabũga ati, Mũnabwĩre ngohaya emilondo ya Ĩsraelĩ; mumbe mundu tulwe haguma.

¹¹ Neryo omugulu Saũlo nʼAbaĩsraelĩ bosĩ bowa ebĩnywa byʼOmũfĩlĩstĩnĩ ebyo, mobahangahangya, nʼeriubaha kutsibu.

Dawĩdĩ amasĩnga Golĩata

¹² Nĩkwa Dawĩdĩ abya mugala wʼOmunya Efũratĩ wʼeBetelehemũ-yũda, iniakahulawa mo Yese; naye abya awite bagala munani; nʼomundu oyo abya mũsyakulu oko mugulu wa Saũlo, iniamakota omo katĩkatĩ kʼabandu.

¹³ Nʼabagala basatu ba Yese abakulu ibamakwamana na Saũlo bakayalwa; nʼamena wʼabagala basatu abo, abayalwa, omumbere abya Elĩabũ, nʼoyũmũsũbĩreko abya Abĩnadabũ, nʼowʼakasatu ni Sama.

¹⁴ Na Dawĩdĩ yo wabya mulere wa kubo; nʼabakulu basatu mobakwamana na Saũlo.

¹⁵ Neryo Dawĩdĩ mwabya akaya eyiri Saũlo nʼeriswasubula akayalĩsya esyombũlĩ syʼĩse wuwe eBetelehemũ.

¹⁶ NʼOmũfĩlĩstĩnĩ mwahĩka hakũhĩ omo tũtũtũ nʼomwʼĩgolo, akayĩkanganĩa ebiro makũmĩ ani nʼerihanganaho.

¹⁷ Kandi Yese mwabwira Dawĩdĩ mugala wuwe ati, Tatwalira bagala benyũ ekitiri kyʼengano yĩkalangĩre, nʼamandu ĩkũmĩ aya, utwalirebyo abagala benyũ lũba oko kilaliriro;

¹⁸ kandi utwalire omukulu wʼabasĩrũkanĩ elfu amasabũ awakamatĩre ĩkũmĩ aya, kandi Ũlebaye abagala benyũ nʼemibere balirimo, unyiretere omulage wabo.

¹⁹ Neryo Saũlo, nabo, nʼabandu bosĩ ba Ĩsraelĩ, babya omo musya wa Ela ibakalwa nʼAbafĩlĩstĩnĩ.

²⁰ Neryo Dawĩdĩ mwatsinduka omo ngyakya-ngyakya, mwasĩgĩra esyombũlĩ syʼomũteya, neryo mwahongoka, mwaheka ebindu ebyo ngoko Yese amuhana. Mwahĩka ahali endwiro, omugulu emilondo eyikalwa yabũgaya olukanda lwʼamalwa.

²¹ NʼAbaĩsraelĩ nʼAbafĩlĩstĩnĩ nabo mobayitondeka oko malwa, omulondo erilwa nʼomulondo.

²² Na Dawĩdĩ mwasĩga ebindu biwe omo byala byʼomũteya wʼebindu, neryo mwatibita eyiri emilondo yʼamalwa, mwahĩkaho mwakerya bagala babo.

²³ Abere akĩnakanaya nabo, lebaya, embangĩ eyo moyahuluka, yo Mũfĩlĩstĩnĩ wʼeGatĩ, oyukahulawa mo Golĩata, akalũa omo milondo yʼAbafĩlĩstĩnĩ, neryo mwabũga ebĩnywa ebyo; neryo Dawĩdĩ mowabyo.

²⁴ Kandi abalume bosĩ ba Ĩsraelĩ, omugulu balola oko mundu oyo, mobamusaga, mobubaha kutsibu.

²⁵ Nʼabalume ba Ĩsraelĩ mobabũga bati, Ko mwanamalangira omulume oyukahetuka kwehĩ? Kwenene akahetuka erĩkaba-kabya Abaĩsraelĩ. Kandi omundu oyo wasyamwĩta, omwami asyamũtekesya obuteke bunene, kandi asyamũherũkĩrya mwali, kandi asyaleka ekĩtũnga kyʼĩse wuwe ikyabya bwĩranda omo Baĩsraelĩ.

²⁶ Neryo Dawĩdĩ mwakanĩa nʼabandu ababya bimene hakũhĩ naye ati, Omundu oyo wasyĩta Omũfĩlĩstĩnĩ oyũ nʼerĩlũsya ekĩtsũmĩ kyʼoko Baĩsraelĩ asyakolerwakĩ kwehĩ? Kusangwa Omũfĩlĩstĩnĩ utabwene oyũ nindi oyukatsuma emilondo ya Nyamuhanga oyuliho kwehĩ?

²⁷ Nʼabandu mobamũsũbĩrya omo mũsĩndo oyũ bati, Ko kyanasyakolerwa kitya oko mundu oyo wasyamwĩta.

²⁸ Neryo Elĩabũ mukulu wuwe mowago kwʼanemũkanĩa nʼabandu; neryo Elĩabũ mwahiririkana nʼobuhitane uku Dawĩdĩ, neryo mwabũga ati, Ko busana nakĩ wandagalĩre eno kwehĩ? kandi ehĩbũlĩ ehiri omo mbwarara wamasĩgĩra hyondi kwehĩ? Nyĩnasĩ eriyihalamba lyawe, nʼobubi bwʼomutima wawe; kusangwa uliandagalira eno erĩsyalebya malwa.

²⁹ Neryo Dawĩdĩ mwabũga ati, Kwe namayira indi? Sĩnangabũlya kwehĩ?

³⁰ Neryo mwamuleka mwakebera ogundi mwabũga naye ebine ngʼebyo; nʼabandu mobamũsũbĩrya ngʼerĩmbere.

³¹ Neryo omugulu ebĩnywa ebyo Dawĩdĩ abũga byogũbawa, mobagambulirabyo embere sya Saũlo; naye mwamutumirako.

³² Neryo Dawĩdĩ mwabũga na Saũlo ati, Sihabye omundu oyukalembera kʼomutima busana naye; omugombe wawe akandiyalwa nʼOmũfĩlĩstĩnĩ oyũ.

³³ Neryo Saũlo mwabũga na Dawĩdĩ ati, Siwangatoka erihongokera Omũfĩlĩstĩnĩ oyũ nʼerilwa naye; kusangwa ukine mũlwana, naye ni mulume wʼamalwa erĩtsũka omo bũlwana buwe.

³⁴ Neryo Dawĩdĩ mwabũga na Saũlo, ati, Omugombe wawe abere akalĩsya esyombũlĩ syʼĩse wuwe, nʼomugulu endale kutse edubu syasa nʼeritsimba ekyana kyʼembũlĩ omo kĩhyo,

³⁵ monakwamayo, monaswĩryayo, nʼerĩnyegũlyayo omo buno bwayo; nʼomugulu yanyigulukira, monabakula esyonzununu syayo, monaswĩryayo monĩtayo.

³⁶ Omugombe wawe mwĩta esĩbĩrĩ syosĩ, endale nʼedubu, nʼOmũfĩlĩstĩnĩ utabwene oyũ akandibya nga nguma ya kusyo, kusangwa akatsuma emilondo ya Nyamuhanga oyuliho.

³⁷ Neryo Dawĩdĩ mwabũga ati, Omwami Mukulu oyo wanyĩlamaya omwʼĩganza lyʼendale, nʼomwʼĩganza lyʼedubu, asyandamya omo byala byʼOmũfĩlĩstĩnĩ oyũ. Na Saũlo mwabwira Dawĩdĩ ati, Genda, Omwami Mukulu akandibya nawe.

³⁸ Neryo Saũlo mwambalya Dawĩdĩ yʼebyambalo biwe, kandi mwahĩra akakwa kʼomulinga oko mutwe wuwe, kandi mwamwambalya obupa bwʼekyuma.

³⁹ Neryo Dawĩdĩ mwayikika omũyalĩ oko byambalo biwe, neryo mwalenga erigenda; kusangwa sialyatayirengabyo. Neryo Dawĩdĩ mwabũga na Saũlo ati, Sinangatoka erigenda na bino; kusangwa sinatabegerabyo. Neryo Dawĩdĩ mwayambula byoko.

⁴⁰ Neryo mwĩmya omũtso wuwe omo byala biwe, kandi mwayisombolera ehĩbwe hitanu ehikomerere omo kũsĩ, mwahĩrahyo omo ngunza yʼobũlĩsya eyo abya awiteko, omwʼĩsaho yiwe; nʼomũjeledĩ wuwe iniane omo byala biwe; neryo mwayĩtũnda hakũhĩ nʼOmũfĩlĩstĩnĩ.

⁴¹ NʼOmũfĩlĩstĩnĩ oyo mwayĩtũnda eyiri Dawĩdĩ; nʼomuhekĩ wʼengabo yiwe mwamubera embere.

⁴² Kandi omugulu Omũfĩlĩstĩnĩ akabangura ameso, mwalangira Dawĩdĩ, mwamupona; kusangwa iniakine mũlwana, iniakomerere, kandi iniawite obũsũ bowene.

⁴³ NʼOmũfĩlĩstĩnĩ mwabũga na Dawĩdĩ ati, Indi mbwa kikaleka iwanyasira nʼemyũtso kwehĩ? NʼOmũfĩlĩstĩnĩ mwatsuma Dawĩdĩ omo nyamuhanga siwe.

⁴⁴ Kandi Omũfĩlĩstĩnĩ mwabũga na Dawĩdĩ ati, Tasa, lero ngandigabira omũnyokũ wawe oko nyonyũ syʼomo kyanya, nʼesyonyama syʼomolĩ.

⁴⁵ Neryo Dawĩdĩ mwabwira Omũfĩlĩstĩnĩ, ati, Ukanyasira nʼomũyalĩ, nʼerĩtũmo, nʼakatũmo; nĩkwa ĩngye ngakwasira omo lĩna lyʼOmwami Mukulu wʼemilondo, Nyamuhanga wʼemilondo ya Ĩsraelĩ, yo gukatsuma.

⁴⁶ Mũnabwĩre Omwami Mukulu akandĩkũhĩra omo byala byage; nage ngandĩkwĩta, nʼerĩkũlũsya kʼomutwe wawe; kandi ngandiha ebĩnda byʼomulondo wʼAbafĩlĩstĩnĩ oko nyonyũ syʼomo kyanya nʼoko nyama syʼomolĩ mũnabwĩre; ekihugo kyosĩ kiminye ko hali Nyamuhanga omo Baĩsraelĩ,

⁴⁷ nʼendeko yosĩ eyĩ iminye Omwami Mukulu kwʼatelamĩraya omo mũyalĩ nʼerĩtũmo; kusangwa amalwa ni wʼOmwami Mukulu, naye yũkandĩbahĩra omo byala byetu.

⁴⁸ Neryo omugulu Omũfĩlĩstĩnĩ ayĩhanganaya, mwasa erĩhĩndana na Dawĩdĩ, neryo Dawĩdĩ mwanguha, mwatibita eyiri omulondo wʼamalwa erĩyahĩndana nʼOmũfĩlĩstĩnĩ oyo.

⁴⁹ Neryo Dawĩdĩ mwakola omo ngunza yiwe, mwalũsya mwʼakabwe, mwagusako omo mũjeledĩ, mwaswĩryako Omũfĩlĩstĩnĩ omo bũsũ buwe. Nʼakabwe ako mokongobereramo, na Golĩata mwayĩtũlĩka ahisi oko kitaka.

⁵⁰ Neryo Dawĩdĩ mwakĩnda Omũfĩlĩstĩnĩ yʼomo kabwe kʼomo kahu kʼomũjeledĩ, mwagomora Omũfĩlĩstĩnĩ, mwamwĩta; nĩkwa Dawĩdĩ siabya awite uku mũyalĩ omo byala biwe.

⁵¹ Neryo Dawĩdĩ mwanguha, mwimana endata wʼOmũfĩlĩstĩnĩ mwĩmya omũyalĩ wuwe, mwakulago omo lubo lwago, mwamwĩta, mwatwa omutwe wuwe go mugo. Neryo omugulu Abafĩlĩstĩnĩ balangira kwʼembangĩ yabo yamabihola, mobatibita.

⁵² Neryo abalume ba Ĩsraelĩ nʼAbayũda mobahangana, mobũta obogo, mobakwamirira Abafĩlĩstĩnĩ, erĩyahĩkĩrĩra eGatĩ, nʼoko syongyo syʼeEkronĩ. NʼAbafĩlĩstĩnĩ abakwa mobawa omo nzira ya Sarĩmũ, erĩhĩkerera eGatĩ, nʼeEkronĩ.

⁵³ Kandi abana ba Ĩsraelĩ mobasubula okwʼihiga Abafĩlĩstĩnĩ, mobahũnga ebilaliriro byabo.

⁵⁴ Neryo Dawĩdĩ mwĩmya omutwe wʼOmũfĩlĩstĩnĩ oyo, mwaletago eYerũsalema; nĩkwa mwahĩra ebindu biwe byʼamalwa omo hema yiwe.

Dawĩdĩ akakangĩbawa Saũlo

⁵⁵ Neryo omugulu Saũlo alangira Dawĩdĩ akayalwa nʼOmũfĩlĩstĩnĩ, mwabũga na Abĩnerĩ omũsondolĩ wʼemilondo yʼamalwa ati, Ko mũlwana oyũ ni mugala wandi kwehĩ? Na Abĩnerĩ mwabũga ati, Ngoko uneho, uwe mwami, Sĩnyasĩ.

⁵⁶ Neryo omwami mwabũga ati, Ũbũlaye omũlwana oyũ nga ni mugala wandi.

⁵⁷ Neryo omugulu Dawĩdĩ asubula okwʼĩta Omũfĩlĩstĩnĩ oyo, Abĩnerĩ mwamwĩmya mwamuleta embere sya Saũlo nʼomutwe wʼOmũfĩlĩstĩnĩ iniane omo byala biwe.

⁵⁸ Na Saũlo mwabũga naye ati, Uwe mũlwana uli mugala wandi kwehĩ? Na Dawĩdĩ mwasũbĩrya ati, Ingye indi mugala wʼomugombe wawe Yese Munya Betelehemũ.