1 Samwelĩ 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Saũlo akahalaya oko mũbĩrĩ ate wuwe

¹ Saũlo abya na myaka makũmĩ ani (40) omugulu atsũka eritabala; neryo mwatabala myaka makũmĩ asatu nʼĩbĩrĩ oko Baĩsraelĩ,

² Neryo Saũlo mwayisombolera balume elfu ĩsatu (3,000) ba Ĩsraelĩ, elfu ĩbĩrĩ (2,000) sya kubo babya haguma na Saũlo eMĩkĩmasĩ nʼoko kitwa kyʼeBetelĩ, na elfu nguma (1,000) yabya haguma na Yonatana eGĩbea ya Benyamĩna; nʼabandu abasaka mwatumabo obuli mundu omo hema yiwe.

³ Kandi Yonatana mwĩta abateya bʼAbafĩlĩstĩnĩ ababya eGeba; nʼAbafĩlĩstĩnĩ mobowago. Neryo Saũlo mwabuhira engubi omo kihugo kyosĩ, ati, Abaebrania bowe.

⁴ NʼAbaĩsraelĩ bosĩ mobowa ngoko Saũlo ĩta abateya bʼAbafĩlĩstĩnĩ, kandi ngoko Abafĩlĩstĩnĩ babĩrĩkwa Ĩsraelĩ yʼesyonye. Nʼabandu bosĩ mobahĩndanĩbwa uku Saũlo eGĩlgalĩ.

⁵ NʼAbafĩlĩstĩnĩ mobayĩhĩndanĩa haguma erilwa na Ĩsraelĩ, esyogalĩ elfu makũmĩ asatu (30,000), nʼababya oko syosabayĩrĩ elfu ndatu (6,000), nʼabandu babya ngʼomusege owali oko mũsĩke wʼengetsi oko bungi. Neryo mobahetuka mobahĩra ekambĩ eMĩkĩmasĩ, ebwanga bwʼendata wʼeBetĩ-avenĩ.

⁶ Nʼomugulu abalume ba Ĩsraelĩ balangira ko bali oko bũlĩge kusangwa (abandu mobanũbyabo), neryo abandu mobayĩbĩsa omo myangalũ, nʼomo bisaka, nʼomo mabwe, nʼomo byũna, nʼomo mahya.

⁷ Kandi abandi bʼAbaebrania ibamabisoka eYorodanĩ eriya oko kihugo kya Gadĩ nʼekyʼeGĩleadĩ; nĩkwa Saũlo, iniakine eGĩlgalĩ, nʼabandu bosĩ mobamukwama bakatitimana.

⁸ Kandi Saũlo mwalinda ebiro birinda, ngʼesaa yahulawa na Samwelĩ; nĩkwa Samwelĩ mwatahĩka eGĩlgalĩ; nʼabandu mobapanzikana kwiye.

⁹ Na Saũlo mwabũga ati, Munyiretere hano obuhere bwʼerĩokererya nʼamahere wʼobuholo. Naye mwahera obuhere bwʼerĩokererya.

¹⁰ Neryo omugulu abuga erihera obuhere bwʼerĩokererya, lebaya, Samwelĩ mwasa; neryo Saũlo mwayahĩndana naye, iniatoka erĩmũkerya.

¹¹ Nĩkwa Samwelĩ mwabũga ati, Wabirikolakĩ kwehĩ? Neryo Saũlo mwabũga ati, Kusangwa nalangira ngoko abandu babirinyipanzikanako, nawe sũlĩtahĩka oko biro ebyalaganawa, kandi Abafĩlistĩnĩ ĩbamabĩyĩhĩndanĩa haguma eMĩkĩmasĩ;

¹² neryo monabũga nyiti, Abafĩlĩstĩnĩ bakandinyandagalirako eGĩlgalĩ, kandi sinditasaba omũyĩsa wʼOmwami Mukulu; monayisiga, monahonga obuhere bwʼerĩokererya.

¹³ Na Samwelĩ mwabwira Saũlo ati, Wamakola ebyʼobũkĩrũ; sũlĩtateya ebihano byʼOmwami Mukulu, Nyamuhanga wawe, ebyo akuhana; kusangwa kumbe lino Omwami Mukulu abĩrĩsĩkya obwami bwawe kera na kera omo Ĩsraelĩ.

¹⁴ Nĩkwa lino obwami bwawe sibwendisyabyaho. Omwami Mukulu abiriyisondera omundu gʼomutima ali ngʼowuwe, kandi Omwami Mukulu abĩrĩmũhĩra eribya mũtabalĩ oko bandu buwe, kusangwa sulitabika ekyo Mwami Mukulu akuhana.

¹⁵ Samwelĩ mwahangana, mwayitwala eGĩlgalĩ erĩhĩka eGĩbea ya Benyamĩna. Na Saũlo mwaganza bandu ababya haguma naye, nga bandu magana ndatu (600).

¹⁶ Kandi Saũlo, na mugala wuwe Yonatana, nʼabandu ababya haguma nabo, mobĩkala eGeba ya Benyamĩna; nĩkwa Abafĩlĩstĩnĩ mobahanda ekambĩ eMĩkĩmasĩ.

¹⁷ Nʼabanyeyĩ mobalũa omo kambĩ yʼAbafĩlĩstĩnĩ mo milondo ĩsatu; omulondo muguma mwalola eyiri enzira eyikaya eOfra, oko kihugo kyʼeSwalĩ;

¹⁸ nʼogundi mulondo mwalola omo nzira ikaya eBetĩ-horonĩ; nʼogundi mulondo mwaya omo nzira yʼomutano owalolere eyĩkwa oko musya wʼeZeboĩmũ owalolere omo mbwarara.

Abaĩsraelĩ bakabula amatũmo nʼemĩyalĩ

¹⁹ Neryo mohatabanika omũhesĩ omo kihugo kyosĩ kya Ĩsraelĩ; kusangwa Abafĩlĩstĩnĩ babũga bati, Abaebrania bakasyayihesera emĩyalĩ nʼamatũmo.

²⁰ Nĩkwa Abaĩsraelĩ bosĩ mobandagalira ewʼAbafĩlĩstĩnĩ, obuli mundu erĩtyalya eyĩsũka yiwe, nʼomũtemĩ wuwe, nʼembasa yiwe, nʼemigera yiwe.

²¹ Omugulu bayatyalaya ekyuma ekyo nʼesyombatso, na busana nʼemĩtemĩ, na busana nʼemihunda, na busana nʼesyombasa, nʼerisonga emigera.

²² Neryo oko kiro kyʼamalwa, mohatabanika omũyalĩ kutse erĩtũmo omo byala byʼomundu nʼomuguma oko bandu ababya haguma na Saũlo na Yonatana; nĩkwa byabanika uku Saũlo na Yonatana mugala wuwe.

²³ Nʼabateya bʼAbafĩlĩstĩnĩ mobahuluka oko lũbĩka lwʼeMĩkĩmasĩ.