1 Samwelĩ 12 - AMASAKO ABOYTRTRE WA NYAMUHANGA AWAKAHULAWA MO BIBLIA

Samwelĩ akakanĩraya Ĩsraelĩ emĩbĩrĩ ya Nyamuhanga

¹ Neryo Samwelĩ mwabwira Abaĩsraelĩ bosĩ, ati, Lebaya, nabirihulikirira omulenge wenyũ omo byosĩ mwambwira, kandi nabĩrĩbahĩrĩra omwami.

² Na lino, omwami akagenda embere syenyũ; nĩkwa ĩngye namabibya mũsyakulu wʼesyombwĩ; kandi lebaya, abagala bage bali haguma nenyũ. Nage nabirirendera embere syenyũ erĩtsũka omo bũlwana bwage erĩhĩka mũnabwĩre.

³ Ngyono hano; mũtũlego busana nage embere syʼOmwami Mukulu, nʼembere syʼomũhakabĩbwa wuwe. Monĩmya ende yandi kwehĩ? Kutse monĩmya punda yandi kwehĩ? Kutse monatebandi kwehĩ? Monanũbyandi kwehĩ? Kutse omo byala byandi namĩmya esigulo erĩyĩrĩbanĩa meso kwehĩ? Nasyabasũbũlĩryayo.

⁴ Nabo mobabũga bati, Sulitatuteba, kutse erĩtũnũbya, kutse mutangirira kindu kyʼomundu nʼomuguma.

⁵ Neryo Samwelĩ mwabwirabo ati, Omwami Mukulu nĩ mũlangĩrĩ busana nenyũ, nʼomũhakabĩbwa wuwe nĩ mũlangĩrĩ mũnabwĩre, ngoko mutetabana kindu omo byala byage. Nabo mobabũga bati, Iye nĩ mũlangĩrĩ.

⁶ Neryo Samwelĩ mwabwira bandu, ati, Omwami Mukulu yo wahĩra Musa na Harũnĩ, kandi yo walũsaya abotata-kulu wenyũ omo kihugo kyʼeMĩsĩrĩ.

⁷ Na lino muhangane aho, inatoka erilakira Omwami Mukulu haguma nenyũ busana nʼemĩbĩrĩ itunganene yosĩ eyo Mwami Mukulu abakolera nʼabotata-kulu wenyũ.

⁸ Omugulu Yakobo aya eMĩsĩrĩ, nʼabotata-kulu wenyũ balakira Omwami Mukulu, neryo Omwami Mukulu mwatuma Musa na Harũnĩ, abalũsaya abotata-kulu wenyũ bʼeMĩsĩrĩ, nʼerĩĩkalyabo hano.

⁹ Nĩkwa mobibirirwa Omwami Mukulu Nyamuhanga wabo; naye mwagũlyabo omo byala bya Sĩsera, omukulu wʼemilondo ya Hazorĩ, nʼomo byala byʼAbafĩlĩstĩnĩ, nʼomo byala byʼOmwami wʼeMoabũ; neryo mobalwa nabo.

¹⁰ Neryo mobalakira Omwami Mukulu, bati, Twabĩrĩhalya, kusangwa twabĩrĩsĩganĩa Omwami Mukulu, erikolera Mabalĩ na Astarotĩ. Nĩkwa lino ũtũlamaye omo byala byʼesyonzĩgũ syetu, netu tukandikukolera.

¹¹ Neryo Omwami Mukulu mwatuma Yerũbalĩ, na Bedanĩ, na Yefũta, na Samwelĩ, erĩbalamya omo byala byʼesyonzĩgũ syenyũ omo mbande syosĩ, nenyũ momwĩkala buholo.

¹² Nʼomugulu mwalangira Nahasĩ Omwami wʼabana ba Amonĩ akasa eribabambira, momwambwira muti, Iyihi, nĩkwa omwami yo wasyatutabalako; omugulu Omwami Mukulu Nyamuhanga wenyũ, abya mwami wenyũ.

¹³ Na lino mutungerere omwami oyo mwabiriyisoga, oyo mwayĩbũlĩraya. Neryo, lebaya, Omwami Mukulu abĩrĩbahĩrĩra omwami.

¹⁴ Mwamubaha Omwami Mukulu, nʼerimukolera, nʼerihulikirira omulenge wuwe, nʼeritendiyisamambula oko bihano byʼOmwami Mukulu, nenyũ nʼomwami nibya oyukabatabalako mwasyakwama Omwami Mukulu, Nyamuhanga wenyũ.

¹⁵ Nĩkwa mwamatendihulikirira omulenge wʼOmwami Mukulu, nĩkwa mukayisamambula oko bihano byʼOmwami Mukulu, neryo ebyala byʼOmwami Mukulu byasyalwa nenyũ ngoko byalwa nʼabotatakulu wenyũ.

¹⁶ Na lino muhangane mũlebaye omwatsi munene oyũ ogo Mwami Mukulu asyakola embere syʼameso wenyũ.

¹⁷ Mũnabwĩre si bugese bwʼengano kwehĩ? Ngandibirikira Omwami Mukulu, iniatuma omũlũmo nʼembũla. Neryo mukandiminya nʼerilangira ngoko ebibi byenyũ ni binene, ebyo mwakola omo meso wʼOmwami Mukulu, eriyisondera omwami.

¹⁸ Neryo Samwelĩ mwasaba Omwami Mukulu, nʼOmwami Mukulu mwatuma omũlũmo nʼembũla ekiro ekyo. Nʼabandu bosĩ mobubaha Omwami Mukulu yo kutsibu na Samwelĩ.

¹⁹ Nʼabandu bosĩ mobabwira Samwelĩ bati, Usabire abagombe bawe oko Mwami Mukulu Nyamuhanga wawe, situhole; kusangwa twabiritomekera oko bibi byetu byosĩ kwʼekibi kyʼeriyisondera omwami.

²⁰ Na Samwelĩ mwabwira bandu ati, Simubahe; kwenene mwabirikola ebibi byosĩ ebĩ; nĩkwa simukitire emũsĩke okwʼikwama Omwami Mukulu, nĩkwa mukolere Omwami Mukulu nʼomutima wenyũ gosĩ.

²¹ Simukitire emũsĩke erikwama emyatsi mitya-mitya eyite na mugaso kutse erĩlamya, kusangwa ni ya busa.

²² Kusangwa Omwami Mukulu sĩendĩsyasĩganĩa bandu buwe, busana nʼerĩna liwe lĩnene, kusangwa kyabĩrĩtsemesya Omwami Mukulu eribayira mo bandu buwe busana naye.

²³ Kandi nage kibye hali kwĩngye erĩhalya oko Mwami Mukulu erĩũmbya eribasabira; nĩkwa ngandĩbakangĩrĩrya enzira yowene nʼeyitunganene.

²⁴ Ekiguma kisa mubahe Omwami Mukulu, kandi mumukolere nʼekwenene omo mitima yenyũ yosĩ; kusangwa mũganĩraye emyatsi minene eyo abakolera.

²⁵ Nĩkwa mwamahatikana erikola ebibi, mwasyaherĩbwa, ĩnywe nʼomwami wenyũ nibya.