1 Samwelĩ 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Samwelĩ akũtũlĩra magũta uku Saũlo

¹ Neryo Samwelĩ mwĩmya erĩtambya lyʼamagũta, mũtago oko mutwe wuwe, mwamulyatsirira ati, Omwami Mukulu sialitakũhakabya magũta eribya mũtabalĩ oko bandu buwe kwehĩ?

² Ukandibya wahongoka ũkalũa aho nyiri mũnabwĩre ũkandĩeya abalume babiri hakũhĩ nʼeyisinda ya Rakelĩ omo mutano wa Benyamĩna eZelza; nabo bakandikubwira, bati, Esyopunda esyo wayasonda-sonda syabiribanika; neryo, lebaya tata wawe abirireka erĩhahũka busana nʼesyopunda, ĩnĩakahahũka busana nawe, ati, Ngolekĩ busana nʼomugala wage kwehĩ?

³ Neryo wasyaswagenda erĩlũa aho, wasyahĩka oko muti wʼeTerebĩntĩ wʼeTaborĩ; nʼaho wasyahĩndana nʼabalume basatu bakahetukira uku Nyamuhanga eBetelĩ, omuguma ĩnĩahekĩre ebyana bisatu byʼembene, nʼogundi ĩnĩahekĩre amandu asatu, nʼogundi ĩnĩahekĩre ebĩnyũ omo ngobĩ.

⁴ Kandi basyakũkerya, nʼerikuha mandu abiri, ago wasyangirira omo byala byabo.

⁵ Enyũma wʼaho wasyahĩka oko kitwa kya Nyamuhanga, ahali ekambĩ yʼAbafĩlĩstĩnĩ. Neryo Wasyabya wahĩka omo mũyĩ eyo, wasyahĩndana nʼomulondo wʼabamĩnyererĩ abakandagala erĩlũa ahʼendata ibanawite oko kinanga, nʼenzenze, nʼengoma, nʼerirenga embere syabo; nabo basyabya ibanemuminyerera.

⁶ NʼOmũlĩmũ wʼOmwami Mukulu asyakũhĩkako nʼamaka, nawe wasyaminyerera haguma nabo, nawe wasyabindulwa mo gundi mundu.

⁷ Neryo omugulu ebiminyikalo ebĩ byamabĩkũhĩkako, Ukole ngʼekyamakwanguhira; kusangwa Nyamuhanga ali haguma nawe.

⁸ Kandi wasyandagala embere syage eGĩlgalĩ; neryo lebaya, nasyakwandagalirako, erihera amahere wʼerĩokererya, nʼerikera esyohongo syʼamahere wʼobuholo. Wasyalinda ebiro birinda, nʼerĩhĩka aho nasyakũhĩkĩrako, nʼerĩkũkangya ekyo wasyakola.

⁹ Neryo omugulu alolaya omugongo wuwe uku Samwelĩ, Nyamuhanga mwamuha ogundi mutima; nʼebiminyikalo byosĩ ebyo mobyabererera oko kiro ekyo.

¹⁰ Nʼomugulu bahĩka oko kitwa ekyo, lebaya, omulondo wʼabamĩnyererĩ mwahĩndana naye; nʼOmũlĩmũ wa Nyamuhanga mwamũhĩkako nʼamaka, neryo mwaminyerera omo katĩkatĩ kabo.

¹¹ Neryo omugulu abosĩ ababya bamwasĩ erĩmbere balangira kwʼakaminyerera haguma nʼabamĩnyererĩ, neryo abandu mobabwirana, bati, Ekĩ ni kihi kyamahĩka uku mugala wa Kĩsĩ kwehĩ? Ko Saũlo naye nibya ali haguma nʼabamĩnyererĩ kwehĩ?

¹² Nʼomuguma wabo mwasũbĩrya ati, Ĩse wabo nindi kwehĩ? Ukwʼekyo mwabya mũsyo, ati, Ko Saũlo nibya ali omo katĩkatĩ kʼabamĩnyererĩ kwehĩ?

¹³ Naye omugulu abuga eriminyerera, mwahĩka ahʼendata.

¹⁴ Neryo nyĩnya-lume wa Saũlo mwabũlya Saũlo haguma nʼomugombe wuwe ati, Mwayahi kwehĩ? Naye mwabũga ati, Erĩsondya esyopunda; nʼomugulu twalangira ko sitetabanika, motwaya ewa Samwelĩ.

¹⁵ Na nyĩnya-lume wa Saũlo mwabũga ati, Kĩsĩ-kĩsĩ, unyibwire Samwelĩ nga mwababwirakĩ.

¹⁶ Na Saũlo mwabwira nyĩnya-lume wuwe ati, Mwatubwira ndeke ngoko esyopunda syabiribanika. Nĩkwa omwatsi wʼobwami ogo Samwelĩ amubwira, mwatamubwirago.

Eriyisogwa lya Saũlo eribya mwami

¹⁷ Kandi enyũma wʼaho Samwelĩ mwabirikira bandu bo haguma oko Mwami Mukulu eMĩsĩpa;

¹⁸ neryo mwabwira abana ba Ĩsraelĩ ati, Omwami Mukulu, Nyamuhanga wa Ĩsraelĩ akabũga ati, Monalũsya Abaĩsraelĩ eMĩsĩrĩ, monabalamya omo byala byʼAbanya Mĩsĩrĩ, nʼerĩlũa omo maka nʼamami gosĩ awabanũbaya.

¹⁹ Nĩkwa ekiro ekĩ kya mũnabwĩre mwabirigana Nyamuhanga wenyũ ĩyũkanabalamaya oko bitsibu byenyũ byosĩ nʼamalĩge wenyũ; nenyũ mwabirimubwira muti, Iyihi, nĩkwa ũhĩre omwami busana netu! Neryo lino muhulukire embere syʼOmwami Mukulu omo bihanda byenyũ nʼomo maelfu wenyũ.

²⁰ Neryo Samwelĩ mwaleta ebihanda byosĩ bya Ĩsraelĩ hakũhĩ, nʼekihanda kya Benyamĩna mokyahambwa.

²¹ Neryo mwaleta ekihanda kya Benyamĩna kyo hakũhĩ omo bĩtũnga byabo; nʼekĩtũnga kyʼAbamatĩrĩ mokyahambwa; na Saũlo mugala wa Kĩsĩ mwahambwa; nĩkwa omugulu bamusonda-sonda mwatabanika.

²² Kyaleka ĩbabũlya Omwami Mukulu kandi, bati, Hane mundu oyute wahĩka hano kwehĩ? Neryo Omwami Mukulu mwasũbĩrya ati, Lebaya abĩrĩyĩbĩsa omo miheke.

²³ Neryo mobatibita erimwendayo; nʼomugulu ahangana omo katĩkatĩ kʼabandu, abya muli kwilaba bosĩ erĩtsũka oko bitigo erĩlolya endata.

²⁴ Neryo Samwelĩ mwabwira bandu bosĩ ati, Mwamalola ukwʼoyo Mwami Mukulu abiriyisoga, ko hate gundi nga ye omo katĩkatĩ kʼabandu bosĩ kwehĩ? Nʼabandu bosĩ mobũta obogo bati, Omwami akote!

²⁵ Neryo Samwelĩ mwabwira abandu emibere yʼobwami, kandi mwasakayo omo kitabu, mwahĩrakyo embere syʼOmwami Mukulu. Neryo Samwelĩ mwahamula abandu erigenda obuli mundu ewuwe.

²⁶ Neryo Saũlo mwaya ewuwe eGĩbea; nʼomulondo wʼesyombangĩ mwagenda haguma naye, abo Nyamuhanga abĩrĩtũla oko mitima yabo.

²⁷ Nĩkwa abandi bandu batya-batya mobabũga bati, Omundu oyũ asyatũlamya ati kwehĩ? Mobamupona, mobatamuha olũsũnzo. Nĩkwa iye mwayihunira.