1 Samwelĩ 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Hana akasaba Nyamuhanga yʼomwana

¹ Neryo habya omundu muguma wʼeRamataĩmũ-sofimũ, owʼekihugo kyʼebitwa kya Efũraĩmũ, nʼerĩna liwe lyabya Elkana, mugala wa Yerohamũ, omugala wa Elĩhũ, omugala wa Tohũ, omugala wa Zũfũ, Omũefũraĩmũ.

² Naye abya nʼabakalĩ babiri; erĩna lyʼomuguma lyabya Hana, nʼerĩna lyʼogundi iyo Penĩna. Penĩna abya nʼabana, nĩkwa Hana siabya awite bana.

³ Nʼomundu oyo abya iniakahetukira eSĩlo akalũa oko mũyĩ wuwe obuli mwaka erĩramya nʼeriherera Omwami Mukulu wʼemilondo. Nʼabagala babiri ba Elĩ, ye Hofũnĩ na Fĩnehasĩ abahererĩ oko Mwami Mukulu, babyaho.

⁴ Neryo ekiro kyanabya kyahĩka ekyo Elkana akaherera, mwaha amagabo uku Penĩna mũkalĩwe, nʼoko bagala buwe, nʼoko bali buwe.

⁵ Nĩkwa iniakaha Hana yʼamagabo abiri; kusangwa abya anzĩre Hana, nĩkwa Omwami Mukulu mwamuyira mo mugumba.

⁶ Kandi mũlĩkyabo mwamwendererya kutsibu, erĩmũtĩtĩmanĩa, kusangwa Omwami Mukulu iniabirimuyira mo mugumba.

⁷ Naye mwakola atya obuli mwaka, omugulu aya oko nyũmba yʼOmwami Mukulu, mwamwendererya; kyaleka inialira nʼeriyĩra akalyo.

⁸ Kandi Elkana ĩba wuwe mwamubwira ati, Hana, ukalirakĩ kwehi? Kandi busana nakĩ sulirya kwehĩ? Na busana nakĩ omutima wawe akabya nʼobũlĩge kwehĩ? Ingye sĩnyĩrengĩre abagala ĩkũmĩ busana nawe kwehĩ?

⁹ Neryo Hana mwahangana abirya nʼerĩpũlya, eSĩlo. Neryo omũhererĩ Elĩ abya ĩkere oko kĩtũmbĩ kiwe hakũhĩ nʼenzeguliro yʼolũyĩ lwʼeHekalũ yʼOmwami Mukulu.

¹⁰ Neryo abya nʼobũlĩge omo mutima, mwasaba Omwami Mukulu, mwalira kutsibu nʼemĩsonĩa.

¹¹ Kandi mwalahĩrya ekilahiro ati, Uwe, Mwami Mukulu wʼemilondo, wamasamalira kwenene obũlĩge bʼomugombe wawe wʼobũkalĩ, nʼerinyibuka, nʼeritendibirirwa omugombe wawe wʼobũkalĩ, nĩkwa wasyaha omugombe wawe wʼobũkalĩ yʼomwana wʼobulume, neryo nasyamuha oko Mwami Mukulu ebiro byosĩ byʼeribyaho liwe, kutse olugembe silwendisyakira omo mutwe wuwe.

¹² Neryo omugulu ahatikana erisaba embere syʼOmwami Mukulu, Elĩ mwayĩtegererya obuno buwe.

¹³ Neryo Hana, ĩnĩakabũga omo mutima wuwe; nʼemĩnywa yiwe misa yabya ĩkasega-seganĩa, nĩkwa omulenge wuwe mwatogũbwa; neryo Elĩ mwaganĩrya ngʼabĩrĩkũnda.

¹⁴ Neryo Elĩ mwabũga naye ati, Wasyatamira erĩkolyahi kwehĩ? Ũyĩlũsaye kwʼebĩnyũ byawe.

¹⁵ Neryo Hana mwamũsũbĩrya ati, Iyihi, mukama wage, ĩngye indi mũkalĩ wʼomutima wʼobũlĩge; sĩndĩtapũlya bĩnyũ kutse obũhĩre kutsibu, nĩkwa nabirilakira Omwami Mukulu nʼomutima wage.

¹⁶ Suganze omugombe wawe wʼobũkalĩ mo mũkalĩ mutya-mutya; kusangwa nabĩrĩbũga omo bungi bwʼerĩsĩmba lyage nʼerĩendererĩbwa lyage erĩhĩka lino.

¹⁷ Neryo Elĩ mwamũsũbĩrya ati, Ugende buholo; Nyamuhanga wa Ĩsraelĩ alĩge erisaba lyawe eryo gũlyabũlaya.

¹⁸ Neryo mwabũga ati, Omugombe wawe wʼobũkalĩ abane erĩsĩmwa omo meso wawe. Neryo omũkalĩ oyo mwagenda atya, kandi mwalya; nʼobũsũ buwe isibukiri nʼobũlĩge kandi.

¹⁹ Neryo mobahangana omo ngyakyangyakya, mobaramya embere syʼOmwami Mukulu, mobasubula, mobahĩka omo nyũmba yabo eRama. Neryo Elkana mwĩmya mũkalĩwe; neryo Omwami Mukulu mwamwibuka.

²⁰ Neryo endambĩ yabere yahĩka, Hana mwaheka obukule, mwabuta mugala; mwahula erĩna liwe mo Samwelĩ, ati, Kusangwa namũbũlaya oko Mwami Mukulu.

²¹ Nʼomundu oyo ye Elkana, nʼekĩtũnga kiwe kyosĩ mobahetuka eriyaherera Omwami Mukulu obuhere bʼobuli mwaka, erĩlahĩrya liwe.

²² Nĩkwa Hana mwatahetukirayo; kusangwa abwira ĩba wuwe ati, Sindiendigendayo omwana ate atsira amabere; neryo nasyamuleta, neryo iniahuluka embere syʼOmwami Mukulu, ĩnĩkalayo ebiro byosĩ.

²³ Neryo Elkana, ĩba wuwe mwamubwira ati, Ukole ekyo Wamalangira mo kibuya; ulinde aho wasyamũtsĩrĩsĩrya amabere; ekiguma kisa Omwami Mukulu ahanganaye ekĩnywa kiwe. Neryo omũkalĩ mwalinda, mwongya mugala wuwe, erĩhĩka aho amũtsĩrĩsĩraya amabere.

²⁴ Neryo abere abĩmũtsĩrĩsya amabere, mwamũhetũkĩryayo, haguma nʼenume yʼemyaka ĩsatu, nʼekitiri kiguma kyʼeyĩsyano, nʼerĩtambya lyʼebĩnyũ, mwamuleta omo nyũmba yʼOmwami Mukulu eSĩlo; nʼomwana oyo abya mulere.

²⁵ Neryo mobakera enume yʼende, neryo mobaleta omwana uku Elĩ.

²⁶ Neryo mwabũga ati, Uwe, mukama wage! Ngoko ekĩrĩmũ kyawe kiriho, mukama wage, ĩngye indi mũkalĩ oyo wimana hano hakũhĩ nawe, ngasaba Omwami Mukulu.

²⁷ Kusangwa monasaba busana nʼomwana oyũ; neryo Omwami Mukulu abirimba erisaba lyage eryo namusaba.

²⁸ Neryo busana nʼekyo namamuha oko Mwami Mukulu; emigulu yosĩ asyabyaho, abirihabwa oko Mwami Mukulu. Neryo mwaramĩryaho Omwami Mukulu.