1 Petero 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Esyombũlĩ sya Nyamuhanga

¹ Neryo, ngalemba-lemba abakulu omo katĩkatĩ kenyũ nga mũlĩkyenyũ mukulu. Kandi indi mũlangĩrĩ wʼamagalĩ wa Kristo. Neryo nasyasangira olukengerwa olũkandĩsyabĩsũlwa.

² Mũlĩsaye esyombũlĩ sya Nyamuhanga esiri omo katĩkatĩ kenyũ. Mulemberesyo kusangwa mwanzĩre erikola mutya busana na Nyamuhanga, butsira erihatikanwa. Kandi Simukole mutya busana nʼerihembwa lisa, nĩkwa omo mũhwa wʼerikola.

³ Kandi simuyiyire nga mukatabala oko bandu abo mwahabawa erĩteya, nĩkwa mubye ebĩsosekanĩo busana nʼekihangulo.

⁴ Neryo mugulu Omũlĩsya mukulu asyamĩnyĩkalĩbwa, mwasyabana embĩta yʼolukengerwa olutekula.

⁵ Nenyũ nibya ĩnywe balwana, mukenge abakulu benyũ. Kandi ĩnywe bosĩ mũyĩkehaye embere syʼabalĩkyenyũ, kusangwa kĩsakĩre kiti, Nyamuhanga akalwa nʼabakayiheka, Nĩkwa akakanyaya olukogo oko bakayĩkehaya.

⁶ Neryo mũyĩkehaye omo byala bya Nyamuhanga byʼobũtokĩ, neryo ĩnĩabahamya oko mugulu atolere.

⁷ Mũhĩre erĩhangahangya lyenyũ lyosĩ uku Nyamuhanga, kusangwa akabategaya.

⁸ Mũlebaye, mũyĩtegaye! Kusangwa enzĩgũ yenyũ Satanĩ, ikagenda-genda ngʼendale, eyikaruruma nʼerisonda-sonda oyo yangalya.

⁹ Mulwe nayo ĩmũnasĩkĩre omwʼĩkĩrĩrya lyenyũ, kusangwa mũnasĩ abalĩkyenyũ abali muna-kihugo ko bakagalawa batya.

¹⁰ Neryo mwamabiagalwa akatambĩ, Nyamuhanga owʼolukogo losĩ oyo wababirikira erisangira olukengerwa luwe lwʼerikota haguma na Kristo, asyabahĩkanĩa, nʼerĩbasĩkya, nʼeribaha amaka, nʼerĩbahanganĩa ndeke.

¹¹ Obũtokĩ bubye buwe kera na kera. Amina.

Erĩkerya abandi

¹² Nabiribasakira ebĩnywa bike ebĩ. Sĩlvano oyo ngahula ngʼomũlĩkyetu oyuteregula abĩrĩnyĩwatĩkya erisakabyo. Kandi ngasonda erihanda emitima yenyũ nʼerĩtũlago nyiti omwatsi oyũ ni lukogo lwʼekwenene lwa Nyamuhanga. Mũsĩke mulo.

¹³ Ekanĩsa eyiri eBabelĩ, eyayisogawa haguma nenyũ, ĩkabakeraya. Kandi omwana wage ye Marĩko akabakeraya.

¹⁴ Mũkeranaye nʼeriwanako lyʼolwanzo. Obuholo bubye nenyũ ĩnywe bosĩ-bosĩ ko muwatene na Kristo.