1 AbanyaTesalonika 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Mubye ĩmũnasĩkĩre busana nʼerĩhĩka lyʼomukama

¹ Balĩkyetu, sihali bwaga bwʼeribasakira ebarua erĩbowĩsya omwatsi wʼemigulu kutse esyondambĩ syʼemyatsi eyĩ.

² Kusangwa nenyũ mũnasĩ ndeke-ndeke kwʼekiro kyʼomukama kyasyasa ngʼomũrahĩ oyukasa omo kiro.

³ Omugulu abandu bakabũga bati, Hali Obuholo nʼerĩyĩsyandira, neryo-neryo eritogota lyasyĩtabo! Nabo sibendisyabala nʼahake, lyasyahĩka ngʼerikunda erĩkahĩka oko mũkalĩ.

⁴ Nĩkwa ĩnywe balĩkyetu, Simuli omo mwĩrĩmya, nʼekiro ekyo sĩkyangabahĩkako ngʼomũrahĩ.

⁵ Kusangwa ĩnywe bosĩ muli bana bʼekyakakala, kandi muli bana bʼeritungi. Situli bʼekiro kutse abʼomwĩrĩmya.

⁶ Neryo situbye tukagotsera ngʼabandi ko bakakola; nĩkwa tubye ĩtũnalolĩre ĩtũnemũteya.

⁷ Abakayato bakayato omo kiro, kandi abakakũnda bakakũnda omo kiro.

⁸ Nĩkwa tuli bandu bʼeritungi, tubye tũkateya. Twambale erĩkĩrĩrya nʼolwanzo ngʼobupa bwʼekĩkũba, kandi mwambale akakĩra kʼamaha wʼomulamo.

⁹ Kusangwa Nyamuhanga mwatatũhĩra busana nʼerihitana liwe, nĩkwa tubane omulamo busana nʼOmukama wetu Yesu Kristo,

¹⁰ Oyo watuholera itwatoka eribyaho haguma naye, kutse twamabya tũnalolĩre kutse twamabya twabirihola.

¹¹ Neryo mũsĩbĩkanaye, nʼerihĩmbana, ngoko mukanakola.

Ebihano nʼerĩkeranĩa

¹² Tukabasaba, balĩkyetu, tuti mũsĩme abakakola kutsibu omo katĩkatĩ kenyũ, abo Mukama abiriyisoga eribasondola nʼeribahana.

¹³ Mukengebo kutsibu-tsibu omo lwanzo busana nʼomũbĩrĩ wabo, Mubye nʼobuholo omo katĩkatĩ kenyũ.

¹⁴ Kandi tukabalemba-lemba, balĩkyetu, tuti muhane abakagala-ganda, mũhamĩraye abʼomutima owasĩkerere, mũwatĩkaye abandu bosĩ, mubye nʼomutima wʼeriyibombeka busana nʼabandu bosĩ.

¹⁵ Mũlebaye ndeke Sihabye mundu Oyũkatũhũlaya ekibi oko kibi, nĩkwa mulenge erikolerana ebibuya, kandi mukole ebibuya oko bandu bosĩ.

¹⁶ Mutseme emigulu yosĩ.

¹⁷ Musabe butsira erĩũmbya.

¹⁸ Muhe ewasĩngya omo myatsi yosĩ; kusangwa ni ʼsonda lya Nyamuhanga busana nenyũ, ĩnywe mumatikene na Kristo Yesu.

¹⁹ Sĩmũkũba-kũbanaye Omũlĩmũ Abũyĩrĩre.

²⁰ Simupone erĩtũlago erĩkalũa uku Nyamuhanga.

²¹ Nĩkwa mulenge emyatsi yosĩ; muhambane nʼebibuya,

²² nʼerisaga obuli mũsĩndo wʼekibi.

²³ Neryo Nyamuhanga oyukaha Obuholo, iye abahigule ĩmwahĩkana. Kandi abategaye omo kĩrĩmũ kyenyũ, nʼomutima wenyũ, nʼomubiri wenyũ, imwabya butsira kahinira okwʼĩhĩka lyʼomukama wetu Yesu Kristo.

²⁴ Oyukababirikira sialiregula, neryo akandisyakola atya.

²⁵ Balĩkyetu, mutusabire netu.

²⁶ Mũkeraye abalĩkyetu bosĩ, nʼeriwanako lĩbũyĩrĩre.

²⁷ Ngababwira omo hamũlĩ yʼomukama, nyiti, ebarua eyĩ isomawe oko balĩkyetu bosĩ.

²⁸ Olukogo lwʼOmukama wetu Yesu Kristo lubye nenyũ.