1 AbanyaTesalonika 3 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Neryo omugulu twataluka eriswayibombeka, motwaganĩrya nga lyowene erĩsĩgala ĩtwebene eAtene;

² nʼerituma mũlĩkyetu Tĩmoteo, oyukakola haguma netu busana na Nyamuhanga omo mũbĩrĩ wʼEngulu Yowene ya Kristo. Motwamutuma erĩbasĩkya nʼerĩbahamĩrya omwʼĩkĩrĩrya lyenyũ,

³ sihabya mundu Oyukasuba enyũma busana nʼamalĩge aya. Kusangwa ĩnywe mũnasĩ emyatsi eyĩ kwʼĩkatũhĩkako omwʼisonda lya Nyamuhanga.

⁴ Kandi omugulu twabya nenyũ twanabya tukababwira tuti twasyendererĩbwa; neryo ekyo mokyabererera, ngoko mũnasĩ.

⁵ Busana nʼomwatsi oyũ, omugulu nataluka eriswayibombeka, monabatumira Tĩmoteo, inatoka eriminya erĩkĩrĩrya lyenyũ, iningubaha nyiti mbino omũtebya abĩrĩbatebya, nʼomũbĩrĩ wetu ĩnĩakwa busa.

⁶ Nĩkwa lino Tĩmoteo abiriswasa akalũa ewenyũ, naye abirituletera engulu nyibuya yʼerĩkĩrĩrya lyenyũ nʼolwanzo lwenyũ, kandi ati mukatwibuka ndekendeke emigulu yosĩ, kandi mũtũkwĩre olukando lwʼeritulolako ngoko netu tũbakwĩre olukando lwʼeribalolako.

⁷ Busana nʼomwatsi oyũ, balĩkyetu, twabĩrĩsĩbĩkĩbwa omo malĩge wetu nʼerĩendererĩbwa lyetu. Nʼerĩkĩrĩrya lyenyũ lĩkatũhamĩraya.

⁸ Neryo lino tukabyaho, mwamahangana ndeke nʼerimatikana nʼOmukama.

⁹ Kusangwa lino tukatoka eriha Nyamuhanga ewasĩngya busana nenyũ. Tukamuha ewasĩngya busana nʼobutseme bosĩ obo tũkayĩsyandiramo embere sya Nyamuhanga busana nenyũ.

¹⁰ Tukasaba kutsibu omo kiro nʼomwʼitungi tuti tubaloleko nʼerĩberererya ebyo bikabula omwʼĩkĩrĩrya lyenyũ.

¹¹ Nyamuhanga wetu ye Tata ĩyowene, nʼOmukama wetu Yesu basondole enzira yetu erĩbahĩkako.

¹² Kandi Omukama aleke olwanzo lwenyũ lukanye nʼeribwaga busana nʼerianzana, na busana nʼerianza bandu bosĩ, ngoko lwanzo lwetu luli busana nenyũ.

¹³ Kandi Omukama asĩkaye emitima yenyũ imwabya abahĩkene nʼababũyĩrĩre embere sya Nyamuhanga wetu ye Tata, omugulu Omukama wetu Yesu asyasa haguma nʼabandu buwe bosĩ.