1 AbanyaKorinto 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritsongera mũlĩkyetu Mukristo

¹ Hamabya omundu omo katĩkatĩ kenyũ oyuli nʼomwatsi uku mũlĩkyabo, oyukalenga erimutsongera embere syʼabatswerĩ abatatunganene, Sialireka abandu ba Nyamuhanga bakasohabo kwehĩ?

² Sĩmwasĩ kwʼabandu ba Nyamuhanga basyatswera ekihugo kwehĩ? Mwamabya ĩnĩ ĩnywe mukasyatswera ekihugo, Simutolere eritswera esyombanza ngenge-nge kwehĩ?

³ Sĩmwasĩ ko twasyatswera abamalaĩka kwehĩ? Kwilaba aho Simutolere eritswera emyatsi yʼeribyaho lyetu kwehĩ?

⁴ Neryo mwamabya nʼemyatsi eyitolere eritswerwa, mukatwalayo oko batswerĩ abatasĩbwe omo kanĩsa kwehĩ?

⁵ Sĩmwekwa esĩsonĩ kwehĩ? Simuli kʼomundu muguma wʼamenge omo katĩkatĩ kenyũ oyo wangatoka erisoha omo katĩkatĩ kʼabalĩkyabo kwehĩ?

⁶ Nĩkwa mũlĩkyetu muguma akayatsongera ogundi mũlĩkyabo embere syʼabatĩkĩrĩrye.

⁷ Neryo omugulu mukatsongerana; mũkakangaya ngoko mwabĩrĩũtwa. Simwangayisoga erikolwa nabi kwehĩ? Kandi simwangayisoga erĩhũngwa kwehi?

⁸ Nĩkwa ĩnywe mukakolana nabi nʼerĩhũngana omo katĩkatĩ kʼabalĩkyenyũ.

⁹ Kandi sĩmwasĩ kwʼabatatunganene ko batendisyasangira oko bwami bwa Nyamuhanga kwehĩ? Sĩmũtebĩbawe; abʼamaragane, kutse abakasaba esyosanamu, kutse abatetĩ, kutse abalume abakatetana,

¹⁰ kutse abĩbĩ, kutse abakũndĩrya, kutse abakatsuma, kutse abanyeyĩ, aba sibendisyasangira oko bwami bwa Nyamuhanga.

¹¹ Neryo abandi omo katĩkatĩ kenyũ ko mwanabya mutya; nĩkwa lino ĩnywe mwabĩrĩerĩbwa kwʼebibi, kandi mwabirihigulwa, kandi mwabiriyirwa mo batunganene busana nʼerĩna lyʼomukama Yesu Kristo, nʼomo Mũlĩmũ wa Nyamuhanga wetu.

Emibiri yenyũ ipipe Nyamuhanga

¹² Nyiri bwĩranda erikola emyatsi yosĩ, nĩkwa emyatsi yosĩ, sirigasakĩ. Nyiri bwĩranda erikola emyatsi yosĩ, nĩkwa Sindiendĩsyalĩga omwatsi nʼomuguma erinyiyira mo mukobe wago.

¹³ Akalyo ni kʼenda, nʼenda iri busana nʼakalyo; nĩkwa Nyamuhanga asyaherya ebibiri byosĩ. Kandi omubiri sĩahĩrawa busana nʼamaragane, nĩkwa ahĩrawa busana nʼomukama; nʼomukama busana nʼomubiri.

¹⁴ Nyamuhanga mwalũbũkya Omukama oko baholĩ, netu asyatũlũbũkya oko baholĩ omo bũtokĩ buwe.

¹⁵ Mũnasĩ kwʼemibiri yenyũ nĩ bĩtsũko byʼomubiri wa Kristo. Nyiyire ebĩtsũko bya Kristo mo bĩtsũko byʼomũtetĩ kwehĩ? Iyihi nʼahake!

¹⁶ Kutse sĩmwasĩ oyũkĩmaya omũtetĩ kwʼakabya mubiri muguma naye kwehĩ? Kusangwa kĩsakĩre kiti, Ababiri basyabya mubiri muguma.

¹⁷ Nĩkwa oyukamatikana nʼomukama akabya kĩrĩmũ kiguma naye.

¹⁸ Musage obũsĩngĩrĩ. Ebindi bibi omundu akakola biri eyĩhya oko mubiri wuwe, nĩkwa omundu oyukateta akahalaya omubiri wuwe.

¹⁹ Sĩmwasĩ kʼomubiri wenyũ nĩ hekalũ yʼOmũlĩmũ Abũyĩrĩre, oyuli omwisi wenyũ nʼoyo Nyamuhanga abaha kwehĩ? Ĩnywe Simuli benyũ, muli ba Nyamuhanga.

²⁰ Abiribagula omo bũgũlĩ. Neryo omo mibiri yenyũ, muletere Nyamuhanga yʼolukengerwa.