1 AbanyaKorinto 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩlũsya omũsĩngĩrĩ yʼomo kanĩsa

¹ Abandu balĩmũbũga bati, hali erĩsĩngĩra omo katĩkatĩ kenyũ, eryo mũsĩndo owakalĩre kwilaba oluteto losĩ lwʼabandu bʼEbihanda. Bati, omundu abĩrĩmya me-mulere wuwe!

² Neryo mukayihagala muti kwehĩ? Litolere imwabya nʼobũlĩge bunene, nʼerĩlũsya omundu oyukakola omwatsi oyũ omo ndeko yenyũ.

³ Kusangwa ĩngye nomo nyite haguma nenyũ omo mubiri, nyineyo omo kĩrĩmũ, nabiritswera oyo wakola ekyo, omo lĩna lyʼomukama wetu Yesu nga nyineho haguma nenyũ.

⁴ Neryo omugulu mũhĩndene haguma, nage indi haguma nenyũ omo kĩrĩmũ kyage, ituli nʼobũtokĩ bwʼomukama wetu Yesu,

⁵ tuhe omundu oyo uku Satanĩ, omubiri wuwe aherĩbawe, nĩkwa ekĩrĩmũ kiwe kĩlamĩbawe omo Kiro kyʼomukama.

⁶ Eriyihagata lyenyũ Sĩryowene! Sĩmwasĩ kwʼekĩhamya kike kĩkahamaya obundu bosĩ kwehĩ?

⁷ Mũlũsaye ekĩhamya kya kera, kyʼebibi, imwatoka eribya bundu buhya-buhya obute mo kĩhamya nʼekike, ngoko kwenene muli rino. Kusangwa Kristo ekyana kyʼembũlĩ kyetu kyʼErikiruka, abiriherwa.

⁸ Neryo tusangire okwʼirya eryo, butsira omo bundu obuli mwʼekĩhamya kya kera, ekyʼebibi nʼekyʼerĩhalya, nĩkwa omo bundu obute mwʼekĩhamya, obwʼobubuya nʼobwʼekwenene.

⁹ Omo barua nabasakira monababwira nyiti, simutambe nʼabandu basĩngĩrĩ.

¹⁰ Nĩkwa mondahula bandu basĩngĩrĩ bʼekihugo kino, kutse abakatsura abakahũnga, kutse abakasaba esyosanamu, Kusangwa bite bitya ĩnywe ĩmwangalũa omo kihugo.

¹¹ Nĩkwa lino ngabasakira nyiti, simutambe nʼomundu oyukayahula mo Mukristo, oyuli mũsĩngĩrĩ, kutse omũtsũrĩ, kutse oyukasaba esyosanamu, kutse omũtsũmĩ, kutse oyuli mũkũndĩrya, kutse oyũkahũnga. Kwenene simwangalya nʼomundu ngʼoyo.

¹² Kusangwa si mwatsi wage wʼeritswera abʼeyĩhya. Nenyũ simwangatswera akali omo kanĩsa kwehĩ?

¹³ Nĩkwa Nyamuhanga asyatswera abali eyĩhya. Ngoko kĩsakĩre kiti, Omundu mubi oyo, mumuhige omo ndeko yenyũ.