1 AbanyaKorinto 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwatsi wʼomusalaba wa Kristo

¹ Balĩkyetu, omugulu nabahĩkako erĩbatũlĩra omwatsi wʼekwenene wa Nyamuhanga, mondasa omo bĩnywa byʼamenge nʼebyʼekĩsehya.

² Kusangwa monayĩsũnza nyiti sĩnangaganĩrya ogundi mwatsi omo katĩkatĩ kenyũ, nina Yesu Kristo, nʼoluholo luwe oko musalaba.

³ Nage nabya haguma nenyũ, inyiri molo-molo, kandi nabya nʼeriubaha, nʼerititimana lĩnene.

⁴ Neryo ekĩnywa kyage nʼerĩtũlago lyage, sibyabya byʼekĩsehya kyʼebĩnywa byʼamenge wʼabandu, nĩkwa byabya ĩbakakangaya obũtokĩ bwʼOmũlĩmũ wa Nyamuhanga.

⁵ Neryo erĩkĩrĩrya lyenyũ sirihangane omo menge wʼabandu, nĩkwa lihangane omo bũtokĩ bwa Nyamuhanga.

Amenge wa Nyamuhanga

⁶ Nĩkwa tũkabũga amenge oko bandu bahĩkene. Nĩkwa si menge wʼekihugo kino, kutse amenge wʼabatabalĩ bʼekihugo kino, abakahwaho.

⁷ Nĩkwa tũkabũga amenge wa Nyamuhanga mo lĩkũmbo, awabĩsamĩre oko bandu ago Nyamuhanga ayisoga busana nʼolukengerwa lwetu, ekihugo kite kyahangikwa.

⁸ Abatabalĩ bʼekihugo kino mobataminya amenge aya. Kusangwa nga balibya basĩ amenge ayo, kumbe sibetabamba Omukama wʼolukengerwa oko musalaba.

⁹ Nĩkwa Amasako akabũga ati, Emyatsi eyo ameso ate alangira, nʼamatwĩ atĩowa, Nʼemyatsi eyo mutima ate aganĩrya, Eyo ni myatsi eyo Nyamuhanga abiritegeka busana nʼabandu abamwanzĩre.

¹⁰ Nĩkwa Nyamuhanga abĩrĩtũbĩsũlĩrayo omo Mũlĩmũ wuwe. Nĩ Mũlĩmũ akasonda emyatsi yosĩ, akasonda erĩyĩsũnza lya Nyamuhanga.

¹¹ Ko ni mundu wahi oyo wasĩ emyatsi yʼomundu kite ekĩrĩmũ kyʼomundu oyo ekiri omwisi wuwe kwehĩ? Litya sihali oyo wasĩ emyatsi ya Nyamuhanga ate Omũlĩmũ wa Nyamuhanga.

¹² Nĩkwa ĩtwe sitwetangirira ekĩrĩmũ kyʼekihugo, nĩkwa twabiriangirira Omũlĩmũ ogo Nyamuhanga atuma, itwatoka eriminya emyatsi eyo Nyamuhanga abirituha mo lũsũnzo.

¹³ Ebĩnywa ebyo tũkabũga, sĩ bĩnywa byakangĩrĩrĩbawa omo menge wʼabandu, nĩkwa ebyakangĩrĩrĩbawa nʼOmũlĩmũ, neryo tũkakũmbũla emyatsi yʼOmũlĩmũ wa Nyamuhanga oko bawite Omũlĩmũ oyo.

¹⁴ Nĩkwa omundu oyutawite Omũlĩmũ sialitoka eribana olũsũnzo olũkalũa oko Mũlĩmũ. Kandi sialiminyalo kusangwa ni myatsi yʼobũkĩrũ busana naye. Kusangwa endũndĩ yalo ikasohawa omo menge wʼOmũlĩmũ.

¹⁵ Nĩkwa omundu oyuwite Omũlĩmũ akatoka erisoha endũndĩ yʼemyatsi yosĩ, nĩkwa iye sialisohawa nʼomundu.

¹⁶ Ngoko Amasako akabũga ati, Nindi yo wasĩ obũlengekanĩa bwʼomukama kwehĩ? Nindi yo wangatoka erimuhana kwehĩ? Nĩkwa ĩtwe tuwite obũlengekanĩa bwa Kristo.