1 AbanyaKorinto 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩlũbũka lya Kristo

¹ Neryo balĩkyetu, ngabamĩnyĩsaya Engulu Yowene eyo nabatũlĩra. Nenyũ momwangirirayo, kandi muhangane muyo mo ndeke.

² Kandi mũkalamĩbawa omo Ngulu Yowene eyo nabakangĩrĩraya, mwamasĩka muyo mo ndeke, mwamabya mũtalĩkĩrĩraya busa.

³ Kusangwa natsũka eribaha erĩmbere omwatsi munene ogo nangirira nibya, nyiti Kristo mwahola busana nʼebibi byetu ngoko kĩsakĩre omo Masako,

⁴ kandi Yesu mwatabwa, neryo mwalũbũkĩbwa enyũma wʼebiro bisatu ngoko kĩsakĩre omo Masako.

⁵ Kandi mwahulukira Petero, nʼenyũma wʼaho mwahulukira erĩkũmĩ nʼababiri.

⁶ Enyũma wʼaho mwahulukira abalĩkyetu bangi kwilaba magana atanu oko ndambĩ nguma. Hakũhĩ nʼabosĩ ba kubo bakineho na lino, nĩkwa abandi babirihola.

⁷ Neryo mwahulukira Yakobo, nʼenyũma wʼaho mwahulukira abakwenda bosĩ;

⁸ nʼenyũma wʼabandi bosĩ mwanyihulukira nibya, ngʼoyukabutawa omwʼĩbũlĩkĩrwa.

⁹ Kusangwa ĩngye indi muke oko bakwenda bosĩ, kandi sinyitolere eriahulwa mo mukwenda, kusangwa monendererya ekanĩsa ya Nyamuhanga.

¹⁰ Nĩkwa nyiri ngoko nyine busana nʼolukogo lwa Nyamuhanga, kandi olukogo luwe busana nage molutabya busa. Nĩkwa monakola kwilaba abandi bakwenda bosĩ, nĩkwa sĩ ĩngye nakola, lo nʼolukogo lwa Nyamuhanga olwabya nage.

¹¹ Neryo nomo nagabya ĩnĩ ĩngye kutse ini ibo, si mwatsi, ebĩ byo tũkatũla, ĩtwe bosĩ nenyũ momwĩkĩrĩryabyo.

¹² Neryo twamakangĩrĩrya tuti, Kristo abĩrĩlũbũkĩbwa oko baholĩ, busana nakĩ abandi omo katĩkatĩ kenyũ bakabũga bati, sihali erĩlũbũka oko baholĩ kwehĩ?

¹³ Nĩkwa hamabya hate erĩlũbũka oko baholĩ, neryo Kristo naye ĩsĩalĩtalũbũkĩbwa oko baholĩ.

¹⁴ Kandi Kristo amabya ĩsĩalĩtalũbũkĩbwa oko baholĩ, neryo erĩtũlago lyetu ini busa, kandi erĩkĩrĩrya lyenyũ ini busa.

¹⁵ Kandi ĩtwe itwamabanika ngʼababehĩ omo mwatsi wa Nyamuhanga, kusangwa twabĩrĩtũlago busana na Nyamuhanga tuti, Mwalũbũkya Kristo oko baholĩ kwesĩ ĩmwatamũlũbũkya oko baholĩ, abaholĩ bamabya ĩsĩbalĩlũbũkĩbawa.

¹⁶ Kusangwa abaholĩ bamabya ĩsĩbalĩlũbũkĩbawa, neryo Kristo naye ĩsĩalĩtalũbũkĩbwa.

¹⁷ Kandi Kristo amabya ĩsĩalĩtalũbũkibwa neryo erĩkĩrĩrya lyenyũ ni buyira, kandi mukine omo bibi byenyũ.

¹⁸ Neryo ababirihola ĩbabĩrĩkĩrĩrya Kristo, babirihera.

¹⁹ Kandi amaha wetu uku Kristo amabya ali busana nʼengebe yʼeno nyisa, neryo tuli bandu abangakwĩrwa obũlĩge kwilaba abandi bandu bosĩ.

²⁰ Nĩkwa kwenene Kristo abĩrĩlũbũkĩbwa oko baholĩ, kandi amabya owʼerĩmbere erĩlũbũka omo katĩkatĩ kʼabandu bahola.

²¹ Kusangwa ngoko luholo lwahĩka busana nʼomundu muguma, litya erĩlũbũka oko baholĩ molyahĩka busana nʼomundu muguma.

²² Kandi ngoko abandu bosĩ ba Adamu bakahola, litya abosĩ ababirimatikana na Kristo basyalũbũkĩbwa omo ngebe.

²³ Nĩkwa obuli mundu omwʼiyitondeka liwe. Kristo nĩ wʼerĩmbere, neryo abali uku Kristo basyalũbũka okwʼĩhĩka liwe.

²⁴ Neryo endũlĩ ĩyahĩka; Kristo amabĩhwerekererya eritabala lyosĩ, nʼehamũlĩ yosĩ, nʼobũtokĩ bosĩ, asyaha obwami uku Nyamuhanga Tata.

²⁵ Kusangwa litolere Kristo iniatabala erĩhĩka aho Nyamuhanga asyalyatangirira esyonzĩgũ syosĩ syʼahisi.

²⁶ Neryo oluholo nĩ nzĩgũ yʼenyũma-nyũma eyikandisyahwerekererĩbwa.

²⁷ Kusangwa Amasako akabũga ati, Nyamuhanga asyatabala erĩhĩra emyatsi yosĩ omwisi wʼebisando biwe. Nĩkwa omugulu akabũga ati asyatabala oko myatsi yosĩ, sialiahula Nyamuhanga oyo wahĩra Kristo eritabala oko myatsi yosĩ.

²⁸ Nĩkwa omugulu Kristo amabitabala oko myatsi yosĩ, ye Mugala asyalĩga obutabale bwa Nyamuhanga Tata, oyo wamuha eritabala oko myatsi yosĩ. Litya Nyamuhanga asyatabala ndeke oko byosĩ.

²⁹ Neryo abakabatĩsĩbawa busana nʼabaholĩ basyabya bati kwehĩ? Abaholĩ bamabya ĩsĩbelũbũkĩbawa nʼahake, busana nakĩ abandu bakabatĩsĩbawa busana nʼabaholĩ kwehĩ?

³⁰ Kandi busana nakĩ ĩtwe tuli omo bwĩko emigulu yosĩ kwehĩ?

³¹ Balĩkyetu, obwĩko bwʼerihola bũkanyĩta ebiro byosĩ. Ngabũga ebĩ kusangwa ngayihalamba busana nenyũ omo ngebe yetu omwisi wa Kristo Yesu Omukama wetu.

³² Kumbe nakwama amalengekanĩa wʼabandu omugulu nabya nga ngalwa nʼesyonyama syʼomolĩ eEfeso, lyamanyigasirakĩ kwehĩ? Abaholĩ bamatendĩlũbũkĩbwa nʼahake, ngoko kĩsakĩre kiti, Tulye, tũpũlaye, kusangwa omo ngyakya twasyahola.

³³ Sĩmũtebĩbawe, kundi abĩra babi bakatsandaya omutima mubuya.

³⁴ Mubuke omo litunganene, muleke erikola ebibi. Kusangwa abandi ba kwĩnywe sĩbasĩ Nyamuhanga. Nyiti, mwangakwa esĩsonĩ.

Omubiri wʼerĩlũbũka

³⁵ Nĩkwa ogundi anganabũga ati, Kwʼabaholĩ bakalũbũkĩbawa bati kwehĩ? Kandi basyabya nʼomubiri wʼomuhanda wahi kwehĩ?

³⁶ Uwe mũkĩrũ! Ekyo ukabiba sikirilasa eribyaho kyamatindatsũka erihola.

³⁷ Kandi ekyo Ukabiba si mubiri wʼomwaka owakandisyalasa, nĩkwa ni mbuto buyira, kwamũhwa ye ngano, kutse embuto yʼogundi mũsĩndo.

³⁸ Nĩkwa Nyamuhanga akahayo omubiri ngoko anzĩre, nʼoko buli mbuto akahayo omubiri wayo ĩyoyene.

³⁹ Emĩnyokũ yʼemibiri sĩ yʼomũsĩndo muguma, nĩkwa hali emĩnyokũ yʼabandu, kandi hali eyindi mĩnyokũ yʼesyonyama, kandi hali eyindi mĩnyokũ yʼesyonyonyũ, kandi hali eyindi mĩnyokũ yʼamahere.

⁴⁰ Kandi hali emibiri eyʼelubula, nʼemibiri yʼekihugo, nĩkwa ekibuya kyʼomubiri wʼelubula ni kiguma, nʼekibuya kyʼomubiri wʼekihugo ni kindi.

⁴¹ Eryuba liwite obubuya bwalyo, nʼomukera awite obubuya bwago, nʼesyongũnũnũ nasyo siwite obubuya bwasyo. Kandi esyongũnũnũ siwite obubuya mũsĩndo-mũsĩndo.

⁴² Neryo erĩlũbũka oko baholĩ ko liri ritya. Omubiri owakatabawa ni wʼerihonda, nĩkwa omubiri owakalũbũkĩbawa sialihonda.

⁴³ Omubiri owakatabawa ni mubiri molo ĩsĩowene, nĩkwa omubiri owakalũbũkĩbawa asyabya wʼobũtokĩ, nʼamaka nʼowʼobubuya.

⁴⁴ Omubiri owakatabawa ni mubiri wʼomũsĩndo wʼomũnyokũ; nĩkwa omugulu akalũbũkĩbawa ni mubiri wʼomũsĩndo wʼekĩrĩmũ. Nĩkwa hali mubiri wʼomũnyokũ, kandi hali mubiri wʼomũsĩndo wʼekĩrĩmũ.

⁴⁵ Kusangwa Amasako akabũga ati, Omundu wʼerĩmbere ye Adamu, mwabya mundu oyuliho. Nĩkwa Adamu wʼenyũma nĩ Mũlĩmũ owakaha engebe.

⁴⁶ Nĩkwa owʼekĩrĩmũ mwatabya wʼerĩmbere, nĩkwa owʼomubiri mwatsũka, nʼenyũma wʼaho owʼekĩrĩmũ.

⁴⁷ Adamu wʼerĩmbere mwalũa omo lũtũtũ, ni wʼekihugo. Adamu wʼakabiri alũa elubula.

⁴⁸ Abʼekihugo bali ngʼoyo wabumbawa omo lũtũtũ; kandi abʼelubula bali ngʼoyo walũa elubula.

⁴⁹ Kandi ngoko eno tukasosa omundu wʼolũtũtũ, litya twasyasosa oyo walũa elubula.

⁵⁰ Balĩkyetu, ngabũga nyiti, abʼemĩnyokũ nʼomusasi sibalitoka erisangira Obwami bwa Nyamuhanga; kandi oyukahonda siangatoka erisangira nʼoyutehonda.

⁵¹ Hulikirira, ngandibabwira erĩkũmbo; ĩtwe bosĩ Sitwendisyahola, nĩkwa ĩtwe bosĩ twasyahĩndũkĩbwa,

⁵² oko ndambĩ nguma ngʼerĩkohya lyʼerĩso, omugulu engubi yʼenyũma-nyũma yasyabũga. Kusangwa engubi yasyabũga, neryo abaholĩ basyalũbũkĩbwa omo mũsĩndo owatehonda, netu twasyahĩndũkĩbwa.

⁵³ Kusangwa owakahonda atolere eriambala owatehonda, kandi owakahola atolere iniambala owatehola.

⁵⁴ Neryo omugulu owakahonda oyũ, amabiambala owatehonda, nʼowakahola amabiambala owatendisyahola, neryo ekĩnywa ekiri omo Masako kyasyabererera kiti, Oluholo lwabĩrĩherĩbwa, Erĩkĩnda lyamabererera!

⁵⁵ Uwe luholo, erĩkĩnda lyawe liri hahi kwehĩ? Uwe luholo, eritsimita lyawe lirihi kwehĩ?

⁵⁶ Oluholo lukatsimita busana nʼebibi, nʼebibi bikabana obũtokĩ bwabyo omo Migambo

⁵⁷ Nĩkwa tuhe Nyamuhanga yʼewasĩngya, kusangwa akatuha erĩkĩnda omwisi wʼOmukama wetu Yesu Kristo.

⁵⁸ Neryo balĩkyetu banze, mũsĩke, simusega-segane, mukanyirire omo mũbĩrĩ wʼOmukama, ĩmũnasĩ ebyo mukakolera Omukama si bya busa.