1 AbanyaKorinto 14 - AMASAKO ABOYTRTRE WA NYAMUHANGA AWAKAHULAWA MO BIBLIA

Olũsũnzo lwʼOmũlimũ

¹ Neryo mũsondekanaya olwanzo kandi mũhĩre emitima yenyũ oko lũsũnzo lwʼOmũlĩmũ. Nĩkwa ekĩlabĩre mukwamirire olũsũnzo lwʼerĩtũla omwatsi wa Nyamuhanga.

² Kusangwa omundu amabũga omo mũsindo-mũsĩndo wʼebĩnywa sĩalĩbũga nʼabandu, nĩkwa akabũga na Nyamuhanga, kusangwa sihali mundu oyukaminya. Nĩkwa akabũga erĩkũmbo omo bũtokĩ bwʼOmũlĩmũ.

³ Nĩkwa oyũkatũla omwatsi wa Nyamuhanga akatũlago oko bandu busana nʼerĩhĩmbabo, nʼerihanabo, nʼerĩkĩranĩabo.

⁴ Oyũkabũga omũsĩndo-mũsĩndo wʼebĩnywa akayĩhĩmba ĩyowene; nĩkwa oyũkatũla omwatsi wa Nyamuhanga akahĩmba ekanĩsa.

⁵ Nĩkwa nyiti kumbe ĩnywe bosĩ mũkabũga omo mũsĩndo-mũsĩndo wʼebĩnywa, nĩkwa kumbe kwilaba aho mũkatũla omwatsi wa Nyamuhanga; kusangwa oyũkatũla omwatsi wa Nyamuhanga akaleta endũndĩ kwilaba oyũkabũga ebĩnywa byʼomũsĩndo-mũsĩndo, omundu amatindakũmbũlabyo, ekanĩsa siyangabana erĩhĩmbwa mubyo.

⁶ Nĩkwa balĩkyetu, namabahĩkako ngabũga ebĩnywa byʼemĩsĩndo-mĩsĩndo nasyabagasirakĩ kwehĩ? Sihali namatindabũga nenyũ ekĩnywa Nyamuhanga akabĩsũla, kutse ekĩnywa kyʼeriminya, kutse ekĩnywa kyʼeriminyerera, kutse ekĩnywa Nyamuhanga akakangĩrĩraya.

⁷ Nĩkwa ebindu ebikimba ebitawite engebe ngʼenyamulera, kutse enanga, byamatendimba ndeke, tukandiminya ebyo bikimba byo tuti kwehĩ?

⁸ Kandi engubi yamatindabũga nʼomulenge ndeke, nindi wasyayĩtegekanĩa busana nʼamalwa kwehĩ?

⁹ Nawe nibya wamabũga omo mĩsĩndo-mĩsĩndo yʼebĩnywa ebitaminyikere ndeke, abandu basyaminya bati ebyo ũkabũga kwehĩ? Kusangwa wasyabya ũkabũga omo kyanya mo buyira.

¹⁰ Hali emĩsĩndo mingi yʼemĩbũge munakihugo, sihali omuguma owatawite emisobolere yago.

¹¹ Nĩkwa namatendiminya omũbũge owakabũga, asyanyiganza ngʼomũlũa-hali, nage nasyamugana ngʼomũlũa-hali.

¹² Neryo kusangwa mwanzĩre eribana olũsũnzo lwʼOmũlĩmũ, mwangasonda-sonda olũkahĩmba ekanĩsa, imwatoka erikanya mulo.

¹³ Neryo omundu oyũkabũga ebĩnywa byʼemĩsĩndo-mĩsĩndo, litolere iniasabira olũsũnzo lwʼerĩkũmbũlabyo.

¹⁴ Kusangwa nomo nangasaba ebĩnywa byʼemĩsĩndo-mĩsĩndo, ekĩrĩmũ kyage kikasaba, nĩkwa obũlengekanĩa bwage sibuliminya kindu.

¹⁵ Neryo ngandikolakĩ kwehĩ? Ngandisaba omo kĩrĩmũ kyage kandi ngandisaba omo bũlengekanĩa bwage nibya. Ngandisyimba omo kĩrĩmũ kyage, kandi ngandisyimba omo bũlengekanĩa bwage nibya.

¹⁶ Neryo wamaha ewasĩngya uku Nyamuhanga omo kĩrĩmũ kisa, nĩkwa omundu oyuli haguma nawe, asyabũga ati, Amina, busana nʼewasĩngya yawe kwehĩ? kusangwa sĩasĩ ebyo ũkabũga.

¹⁷ Kusangwa uwe ukaha ewasĩngya yo ndeke uku Nyamuhanga, nĩkwa ogundi mundu oyo sĩalĩwatĩkĩbawa.

¹⁸ Ngaha Nyamuhanga yo wasĩngya, ngabũga ebĩnywa byʼemĩsĩndo-mĩsĩndo kwilaba ĩnywe bosĩ.

¹⁹ Nĩkwa omo kanĩsa nyanzĩre erĩbũga ebĩnywa bitanu ebĩkogũbawa inatoka erĩmĩnyĩsya abandi, kwilaba erĩbũga ebĩnywa elfu ebyʼemĩsĩndomĩsĩndo.

²⁰ Balĩkyetu, omo malengekanĩa wenyũ, Simubye ngʼabana. Nĩkwa busana nʼebibi mubye ngʼabana, kandi mubye bakulu abahĩkene omo malengekanĩa wenyũ.

²¹ Omo Masako kĩsakĩre kiti, Omukama ati, Nasyabũga nʼabandu aba; Nasyalayirabo omo bandu bʼemĩbũge yʼehali, Nʼomo mĩnywa yʼabandu abakalũa ehali, Nĩkwa abandu bage sibendisyanyihulikirira.

²² Neryo olũsũnzo lwʼemĩbũge mĩsĩndomĩsĩndo sĩ kĩmĩnyĩsyo busana nʼabandi ababĩrĩkĩrĩrya, nĩkwa busana nʼabatĩkĩrĩraya. Kandi erĩtũla omwatsi wa Nyamuhanga nĩ kĩmĩnyĩsyo busana nʼabandu abĩkĩrĩraya, si busana nʼabatĩkĩrĩraya.

²³ Neryo ekanĩsa yosĩ yamahĩndana haguma, nʼabosĩ bakabũga emĩbũge yʼomũsĩndo-mũsĩndo, neryo abandu abatasĩ, kutse abatĩkĩrĩrye, bamahĩkamo sĩbendĩsyabũga bati muli basĩre kwehĩ?

²⁴ Nĩkwa abosĩ bamatũla omwatsi wa Nyamuhanga, neryo oyũtĩkĩrĩrye kutse oyũtasĩ amahĩkamo, akandĩsĩngwa busana nʼebĩnywa byʼabosĩ, kandi asyatswerwa busana nʼebĩnywa byosĩ ebyo akowa.

²⁵ Kandi emyatsi eyĩbĩsamĩre yʼomutima wuwe ĩkamĩnyĩkalĩbawa, neryo asyawa ahisi nʼerĩramya Nyamuhanga, ĩnĩakabũga ati, Kwenene Nyamuhanga ali omo katĩkatĩ kenyũ.

Erĩtondekanĩa omo kanĩsa

²⁶ Balĩkyetu, omwatsi abere ati kwehĩ? Omugulu mũkahĩndana haguma, omundu muguma awite Olwimbo, nʼogundi awite ekĩnywa kyʼerĩkangĩrĩrya, nʼogundi awite erĩbĩsũlĩrwa lya Nyamuhanga, nʼogundi awite ekĩnywa kyʼomũsĩndo-mũsĩndo, nʼogundi awite erĩkũmbũlakyo. Emyatsi yosĩ ikolawe busana nʼerĩhĩmba ekanĩsa.

²⁷ Omundu amabũga ebĩnywa byʼomũsĩndo-mũsĩndo, babye babiri, kutse basatu basa, babye bakakwamirirana, neryo omuguma akũmbũle ebĩnywa byabo.

²⁸ Kandi hamabya isihali omundu wʼerĩkũmbũlabyo, omundu oyo wʼebĩnywa mĩsĩndomĩsĩndo abye bũkũtũ omo kanĩsa; akanaye na Nyamuhanga kandi ayibwire omo mutima wuwe.

²⁹ Kandi habye bandu babiri kutse basatu abakatũla omwatsi wa Nyamuhanga, nʼabandi balenge ebyo bakabũga.

³⁰ Nĩkwa omundu muguma oyo wĩkere, amahabwa erĩbĩsũlĩrwa erĩkalũa uku Nyamuhanga, oyũkabũga ahune.

³¹ Kusangwa ĩnywe bosĩ mukatoka erĩtũla omwatsi wa Nyamuhanga muguma muguma, neryo abosĩ batoke eriiga nʼerĩsĩkya emitima.

³² Kusangwa abakatũla omwatsi wa Nyamuhanga bakatoka erĩyĩkakĩrya.

³³ Kusangwa Nyamuhanga si Nyamuhanga wʼolukanda, nĩkwa ni wʼobuholo. Ngoko biri omo syokanĩsa syosĩ syʼabandu ba Nyamuhanga,

³⁴ Abakalĩ bangahuna omo syokanĩsa; kusangwa sibali nʼehamũlĩ yʼerĩbũga, nĩkwa bayibombeke ngoko Emigambo ĩkabũga.

³⁵ Kandi bamasonda eriminya omwatsi, babũlaye abĩbabo bʼeka. Kusangwa siritolere omũkalĩ akabũgĩra omo kanĩsa.

³⁶ Kwʼekĩnywa kya Nyamuhanga kyalũa ũkwʼĩnywe kwehĩ? Kutse kyabahĩkako ĩnywebene kwehĩ?

³⁷ Omundu amaganĩrya kwʼali mũtũlĩ wʼomwatsi wa Nyamuhanga, kutse kwʼawite olũsũnzo olũkalũa oko Mũlĩmũ, aminye ngoko emyatsi eyo ngabasakira ni kihano kyʼomukama.

³⁸ Nĩkwa omundu amatendĩrĩga ekĩ, nenyũ sĩmũmũlĩge.

³⁹ Neryo balĩkyetu, mũsondaye nʼomũhwa erĩtũla omwatsi wa Nyamuhanga, kandi sĩmũganaye erĩbũga ebĩnywa byʼomũsĩndo-mũsĩndo.

⁴⁰ Nĩkwa mukole emyatsi yosĩ Omwʼĩtegekanĩa nʼerĩtondekanĩayo.