1 AbanyaKorinto 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Olwanzo

¹ Namabũga omo mĩbũge yʼabandu nʼeyʼabamalaĩka, nĩkwa isingwite olwanzo, nabiribya ngʼomukenge owakalahira kutse ngʼekengele eyĩkabũgĩrana.

² Kandi nomo nangabya nʼolũsũnzo lwʼerĩtũla omwatsi, kandi nyasĩ erĩkũmbo lyosĩ, nʼeriminya lyosĩ, kandi nomo nangabya nʼerĩkĩrĩrya lyosĩ erikatoka erĩlũsya ebitwa, nĩkwa isingwite olwanzo, inyiri busa.

³ Nomo nangabya ngahĩtya ebyosĩ ebyo nyiwite kandi namaha omubiri wage erĩhĩsĩbwa, nĩkwa isingwite olwanzo, sibyenyigasirakĩ.

⁴ Olwanzo lukayibombeka, kandi luli nʼobwenge; olwanzo silulibya nʼobũha; siluliyihalamba, siluliyiheka.

⁵ Olwanzo sihulibula erĩsĩkya; siluliyirondera endũndĩ ĩlolwene-lwene; kandi silulihitana litya-litya; silulitsungirira ekibi.

⁶ Olwanzo silulitsemera ebitatunganene, nĩkwa lukatsemera ebyʼekwenene.

⁷ Olwanzo siluliluha, omo myatsi yosĩ lũkĩkĩrĩraya, lukabya nʼamaha, lũkayĩyĩnaya.

⁸ Olwanzo lukakota; nĩkwa olũsũnzo lwʼeriminyerera omwatsi lwasyalũsĩbwaho, kandi erĩbũga emĩsĩndo-mĩsĩndo yʼebĩnywa lyasyũmbya; hali olũsũnzo lwʼeriminya, nĩkwa lwasyalũsĩbwaho.

⁹ Kusangwa twasĩ bike, kandi tũkatũlago buke.

¹⁰ Nĩkwa omugulu emyatsi yosĩ yasyahĩkana, ebike byasyalũsĩbwaho.

¹¹ Omugulu nabya mwana, nabya ngabũga ngʼomwana, monaganĩrya ngʼomwana, monasoha omwatsi ngʼomwana. Nĩkwa omugulu namabikula, monaleka emyatsi yʼobwana.

¹² Kusangwa lino tukalangira bike ngʼomo kiyo, nĩkwa ekiro ekyo, twasyalangira obũsũ oko bũsũ; lino nyasĩ bike, nĩkwa ekiro ekyo nasyaminya ndeke ngoko Nyamuhanga anyasĩ ndeke.

¹³ Neryo lino emyatsi ĩsatu ineho, erĩkĩrĩrya, nʼamaha, nʼolwanzo; nĩkwa olwanzo lũlengĩre eyindi myatsi eyĩ.