1 AbanyaKorinto 11 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Mũnyĩgerereraye ngoko nage ngagerereraya Kristo.

Eriswika omutwe omo kisomo

² Nĩkwa ngabapipa kusangwa mukanyibuka ebiro byosĩ, imukakwama ndeke erĩkangĩrĩrya, ngoko nabahalyo.

³ Nĩkwa nyanzĩre imwaminya Kristo kwʼali mukulu wʼobuli mundu, nʼomulume ni mukulu wʼomũkalĩ wuwe, kandi Nyamuhanga ni mukulu wa Kristo.

⁴ Nĩkwa omulume oyukaswika omutwe wuwe omugulu akasaba kutse erĩtũlago, akahemula omukulu wuwe, ye Kristo.

⁵ Kandi obuli mũkalĩ oyuteswika omutwe wuwe omugulu akasaba kutse erĩtũlago, akahemula omutwe wuwe, yʼĩba wuwe; kusangwa alingene nʼomũkalĩ oyo wabĩrĩsĩswa oko mutwe.

⁶ Kusangwa omũkalĩ amatindaswika omutwe wuwe, angatwa esyonzwiri siwe, nĩkwa lyamabya ĩnĩ ĩsonĩ busana nʼomũkalĩ erĩtwa esyonzwiri siwe kutse erĩsĩsa omutwe wuwe, aswike omutwe wuwe.

⁷ Omulume siangaswika omutwe wuwe, kusangwa iye akakanganaya ekĩsosekanĩo nʼolukengerwa bya Nyamuhanga. Nĩkwa omũkalĩ akakanganaya olukengerwa lwʼomulume.

⁸ Kusangwa omulume omugulu ahangikawa, mwatalũa omo mũkalĩ, nĩkwa omũkalĩ mwalũa omo mulume.

⁹ Kandi omulume mwatahangikwa busana nʼomũkalĩ, nĩkwa omũkalĩ mwahangikwa busana nʼomulume.

¹⁰ Neryo busana nʼabamalaĩka, omũkalĩ atolere iniabya nʼekĩmĩnyĩsyo kyʼehamũlĩ oko mutwe wuwe.

¹¹ Nĩkwa embere syʼOmukama, omũkalĩ siangabyaho butsira mulume, nʼomulume naye siangabyaho butsira mũkalĩ.

¹² Kusangwa ngoko mũkalĩ alũa oko mulume, litya nibya omulume akalũa oko mũkalĩ iniakabulawa atya; kandi emyatsi yosĩ ĩkalũa uku Nyamuhanga.

¹³ Ĩnywe musohe, linatolere omũkalĩ iniasaba Nyamuhanga ĩsĩaswĩkĩre omutwe wuwe kwehĩ?

¹⁴ Nĩkwa ebitula bĩkabakangĩrĩraya biti, omulume amabya nʼesyonzwiri nyiri-nyiri, sĩkamwĩta esĩsonĩ,

¹⁵ nĩkwa esyonzwiri nyiri-nyiri ni bubuya busana nʼomũkalĩ. Kandi ahabawasyo busana nʼeriswika omutwe.

¹⁶ Nĩkwa omundu amabya anzĩre erikuba obuhaka nyiti, ĩtwe kutse amakanĩsa wa Nyamuhanga, situwite eyindi mitsye.

Emesa yʼomukama

¹⁷ Nĩkwa omugulu ngabahana lino, sindibapipa, kusangwa omugulu mũkahĩndana haguma sĩmwehĩndana ndeke, nĩkwa mũkahĩndana nabi.

¹⁸ Kusangwa omugulu mũkahĩndana omo kanĩsa, namowa ko hali erigabana omo katĩkatĩ kenyũ; kandi ngalĩga nyiti ni kwenene hake.

¹⁹ Kusangwa litolere ihabya erigabana omo katĩkatĩ kenyũ, neryo abakakwama ndeke ibaminyikala.

²⁰ Neryo omugulu mũkahĩndana haguma, sĩmũlĩhĩndana kwenene busana nʼerirya emesa yʼomukama.

²¹ Kusangwa omugulu mukalya, obuli mundu akatsũka erirya ebyalya biwe; omuguma akawira, nʼogundi akakunda.

²² Ko simuwite amanyũmba wenyũ aho mukalira nʼerĩpũlya kwehĩ? Kutse mukapona ekanĩsa ya Nyamuhanga, nʼerihemula abatawitekĩ kwehĩ? Nyibabwirekĩ kwehĩ? Nasyabapipa kwehĩ? Iyihi, sindibapipa omo mwatsi oyũ.

²³ Kusangwa ebyo Mukama anyĩkangĩrĩraya bye nʼebyo nabĩrĩbakangĩrĩrya nyiti, Omukama Yesu omo kiro ahoterawa mwĩmya obundu;

²⁴ neryo abere abiha ewasĩngya uku Nyamuhanga, mwatwabo, mwabũga ati, Obũ ni mubiri wage owali busana nenyũ. Mukole mutya busana nʼerinyibuka.

²⁵ Nʼenyũma wʼerirya mwĩmya olũtehĩ lwʼatya, ati, Olũtehĩ olũ ni ndagane nyihya-nyihya omo musasi wage; mukole mutya emigulu yosĩ mũkapũlaya kulo busana nʼerinyibuka.

²⁶ Kusangwa emigulu yosĩ mukalya obundu obũ nʼerĩpũlya oko lũtehĩ, mũkakanganaya oluholo lwʼOmukama, erĩhĩka aho asyasira.

Erĩhĩka oko mesa eritatolere

²⁷ Neryo omundu oyukalya oko bundu obo bwʼomukama kutse erĩpũlya oko lũtehĩ luwe omo mũsĩndo owatatolere, ĩnĩabĩrĩhalya oko mubiri nʼomusasi wʼOmukama.

²⁸ Nĩkwa omundu ayitswere, neryo alye oko bundu obo nʼerĩpũlya oko lũtehĩ.

²⁹ Kusangwa omundu amatindaminya ndeke omwatsi wʼomubiri wʼOmukama omugulu akalya nʼerĩpũlĩrya oko mesa eyo, akayiretera olubanza omugulu akalya nʼerĩpũlĩrya oko mesa eyo.

³⁰ Ekĩ kyalekĩre abangi omo katĩkatĩ kenyũ ibalwala nʼeribya bolo-bolo, nʼabandi babirihola.

³¹ Nĩkwa kumbe twamayitswera sitwangabya omo lubanza lwa Nyamuhanga.

³² Nĩkwa omugulu tukatswerawa, tukakungawa nʼomukama, ĩtũtaswahĩrwa oko lubanza lubi haguma nʼekihugo.

³³ Neryo balĩkyetu, omugulu mũkahĩndana eririra oko mesa yʼomukama, mulindirirane.

³⁴ Omundu amakwa enzala, alire eka wuwe, neryo ĩmũtaswahĩndana nʼeribana olubanza. Nʼeyindi myatsi nasyategekanĩayo ekiro nasyasa.