1 AbanyaKorinto 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ĩngye Paũlo, oyo wabirikirawa busana nʼerisonda lya Nyamuhanga eribya mukwenda wa Kristo Yesu. Ĩngye nʼomũlĩkyetu Sosĩtenĩ,

² tukabasakira haguma, ĩnywe kanĩsa ya Nyamuhanga eyiri eKorĩnto, ababirikirawa eribya bandu ba Nyamuhanga, abahigulawa erimatikana na Kristo Yesu. Kandi tukabasakira haguma nʼabandu bosĩ ehosĩ abakalakira erĩna lyʼomukama wetu Kristo. Yo Mukama wabo nʼowetu.

³ Nyamuhanga Tata wetu nʼomukama Yesu Kristo abahe olukogo nʼobuholo.

Omũyĩsa wa Kristo

⁴ Ngaha Nyamuhanga yʼewasĩngya emigulu yosĩ busana nenyũ. Kandi ngamuha ewasĩngya busana nʼolukogo luwe, olo mwahabawa busana na Kristo Yesu.

⁵ Kusangwa eriwatana na Kristo lyabiribaha eribya abʼebindu omo myatsi yosĩ, omwʼĩbũga lyosĩ, nʼamenge gosĩ.

⁶ Engulu ya Kristo yabiribererera omwisi wenyũ,

⁷ neryo simwetabula olũsũnzo nʼoluguma lwa Nyamuhanga, imunemulindirira eriminyikala lyʼomukama wetu Yesu Kristo.

⁸ Naye asyabasĩkya erĩhĩka oko ndũlĩ, isimuli oko lubanza oko kiro kyʼomukama wetu Yesu Kristo.

⁹ Nyamuhanga sialiregula, naye abiribabirikira erisakana nʼomugala wuwe, Omukama wetu Yesu Kristo.

Erigabana omo Kanĩsa

¹⁰ Neryo balĩkyetu, ngabalemba-lemba omo lĩna lyʼomukama wetu Yesu Kristo, nyiti ĩnywe bosĩ mũbũge kiguma. Nyiti Sihabye erigabana omo katĩkatĩ kenyũ, nĩkwa mubohane omo bũlengekanĩa buguma nʼomutima muguma.

¹¹ Kusangwa abalĩkyetu abʼekĩtũnga kya Kloe, babĩrĩnyĩtũlĩrago busana nenyũ bati, hali erinegena omo katĩkatĩ kenyũ.

¹² Neryo nyiti, obuli mundu ũkwʼĩnywe akabũga ati, Ĩngye indi wa Paũlo, nʼogundi ati, Ĩngye indi wa Apolo, nʼogundi ati, Ĩngye indi wa Petero, nʼogundi ati, Ĩngye indi wa Kristo.

¹³ Ko Kristo agabĩrwe kwehĩ? Na Paũlo mwabambwa oko musalaba busana nenyũ kwehĩ? Kutse mwabatĩsĩbawa omo lĩna lya Paũlo kwehĩ?

¹⁴ Ngaha Nyamuhanga yʼewasĩngya kundi mondabatĩsya mundu nʼomuguma omo katĩkatĩ kenyũ, nina Krĩspo na Gayo, ĩbobene.

¹⁵ Neryo Sihabye mundu oyũkabũga ati mwabatĩsĩbawa omo lĩna lyage.

¹⁶ Nĩkwa monabatĩsya enyũmba ya Setefano, nĩkwa Sĩnyasĩ ogundi nabatĩsaya.

¹⁷ Kusangwa Kristo mwatanyituma erĩbatĩsya, nĩkwa anyituma erĩtũla Engulu Yowene. Nʼerĩtũlago butsira omo kĩsehya kyʼebĩnywa byʼabandu, neryo omusalaba wa Kristo akasyayirwa mo buyira.

Kristo nĩ bũtokĩ nʼamenge wa Nyamuhanga

¹⁸ Kusangwa omwatsi wʼomusalaba nĩ bũkĩrũ oko bandu abakahera, nĩkwa nĩ bũtokĩ bwa Nyamuhanga busana netu, ĩtwe tũkalamĩbawa.

¹⁹ Kusangwa Amasako akabũga ati, Nasyaherya amenge wʼabʼamenge, Kandi nasyalũsya eriminya lyʼabanyima-nyima.

²⁰ Omundu wʼamenge ali hahi kwehĩ? Omũsakĩ ali hahi kwehĩ? Embũyĩ yʼekihugo yʼomugulu ono yiri hahi kwehĩ? Nyamuhanga abiriyira amenge wʼekihugo kino mo bũkĩrũ.

²¹ Kusangwa ekihugo mokitetatoka eriminya Nyamuhanga omo menge wakyo. Neryo omo menge wuwe Nyamuhanga mwatsemesĩbwa erĩlamya abandu abakĩkĩrĩraya busana nʼobũkĩrũ bwʼomwatsi tũkatũla.

²² Kusangwa Abayũda bakabũlaya ebitiko-tiko, nʼAbagĩrĩkĩ bakasonda-sonda amenge;

²³ nĩkwa ĩtwe tũkakanganaya Kristo oyo wabambawa oko musalaba. Abayũda sĩbanzĩre omwatsi oyũ, nʼabandu bʼEbihanda bakaganza omwatsi oyo mo bũkĩrũ.

²⁴ Nĩkwa busana nʼabo Nyamuhanga akabirikira, Abayũda nʼAbagĩrĩkĩ, Kristo nĩ bũtokĩ bwa Nyamuhanga, kandi, ni menge wa Nyamuhanga.

²⁵ Kusangwa obukahulawa mo bũkĩrũ bwa Nyamuhanga, ni bwʼamenge kwilaba awʼabandu, nʼobukahulawa mo bolo bwa Nyamuhanga, bũkalĩre kwilaba abandu.

²⁶ Balĩkyetu, mwibuke ngoko mwabya ekiro Nyamuhanga ababirikira. Sihabya bangi omo katĩkatĩ kenyũ abakahulawa mo bandu bʼamenge, kutse esyombangĩ, kutse abakulu.

²⁷ Nĩkwa Nyamuhanga mwayisoga emyatsi mĩkĩrũ yʼekihugo erihemula abandu bʼamenge. Kandi Nyamuhanga abiriyisoga emyatsi myolo yʼekihugo erihemula esyombangĩ.

²⁸ Kandi Nyamuhanga mwayisoga emyatsi eyikaponawa nʼabandu, nʼemyatsi eyikaganzawa nʼabandu nga buyira, kandi emyatsi eyiteho, iniatoka erĩsĩnga emyatsi eyiriho.

²⁹ Neryo Sihabye mundu oyukayihalamba embere sya Nyamuhanga.

³⁰ Nĩkwa Nyamuhanga abĩrĩbamatĩkanĩa na Kristo Yesu. Kandi Nyamuhanga abiriyira Kristo eribya menge wetu. Busana na Kristo tukatunganana embere sya Nyamuhanga, kandi busana na Kristo tukabya bana ba Nyamuhanga, nʼeribya bwĩranda.

³¹ Neryo ngoko Amasako akabũga ati, Oyukayihalamba, ayihalambe umwʼebyo Omukama abirikola.