1 Abami 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami Mukulu akalagana na Solomono

¹ Neryo omugulu Solomono abuga erĩhĩmba enyũmba yʼOmwami Mukulu, nʼenyũmba yʼOmwami, nʼebyosĩ ebyatsemesaya Solomono erikola,

² neryo Omwami Mukulu mwahulukira Solomono engendo yʼakabiri ngoko amuhulukira eGĩbeonĩ.

³ Neryo Omwami Mukulu mwamubwira ati, Nabĩrĩowa erisaba lyawe, nʼerilaka lyawe, eryo wasaba embere syage; nabirihigula enyũmba eyĩ, eyo wabĩrĩhĩmba, erĩhĩraho erĩna lyage busana na kera na kera; nʼameso wage nʼomutima wage asyabyaho emigulu yosĩ.

⁴ Nĩkwa uwe wamalendera embere syage ngoko tata wawe Dawĩdĩ alendera, omwʼĩhĩkana lyʼomutima, nʼomo litunganene, nʼerikola ebyosĩ ngoko nabirikuhana, nʼerĩteya emigambo yage, nʼebilayiro byage;

⁵ neryo nasyahanganĩa ekĩtũmbĩ kyawe kyʼobwami busana nʼAbaĩsraelĩ kera na kera, ngoko nalaga tata wawe Dawĩdĩ, nyiti, Siwendisyabula mundu erĩĩkala oko kĩtũmbĩ kyʼobwami kyʼAbaĩsraelĩ.

⁶ Nĩkwa mwamakitira handi erireka erinyikwama, ĩnywe kutse abana benyũ, ĩmũtateya ebihano byage, nʼemigambo yage, ebyo nahĩra embere syenyũ, nenyũ mukayakolera esindi nyamuhanga, nʼerĩramyasyo;

⁷ neryo nasyatwa Abaĩsraelĩ erĩlũa omo kihugo ekyo nahabo; nʼenyũmba eyo nabirihigula busana nʼerĩna lyage, nasyagusayo erĩlũa omo meso wage. NʼAbaĩsraelĩ basyabya omũsyo nʼekĩnywa kyʼerisekwa omo bihanda byosĩ.

⁸ Nʼenyũmba eyĩ yasyabya kilundo kyʼekĩma, nĩkwa obuli mundu oyo wasyalabaho asyasweka nʼerĩsolya; basyabũga bati, Ko busana nakĩ Omwami Mukulu abirikola atya oko kihugo ekĩ, nʼoko nyũmba eyĩ kwehĩ?

⁹ Nabo basyasũbĩrya bati, Kusangwa basĩganaya Omwami Mukulu Nyamuhanga wabo, oyo walũsaya abotata-kulu babo omo kihugo kyʼeMĩsĩrĩ, ibabiriamakirira esindi nyamuhanga, nʼerĩramyasyo, nʼerikolerasyo; busana nʼekyo Omwami Mukulu abirireta kubo kʼobutsibu bosĩ obũ.

Solomono akaha Hĩramũ yʼemĩyĩ 20 eGalĩlaya

¹⁰ Neryo enyũma wʼemyaka makũmĩ abiri eyo Solomono ahĩmbamo amanyũmba abiri, enyũmba yʼOmwami Mukulu nʼenyũmba yʼomwami,

¹¹ nĩkwa Hĩramũ omwami wʼeTĩro iniabiriha Solomono ebyosĩ abya anzĩre emiti yʼemĩerezĩ nʼemiti yʼekĩlagũ, nʼesyamagetsi, neryo omwami Solomono mwaha Hĩramũ emĩyĩ makũmĩ abiri (20) omo kihugo kyʼeGalĩlaya.

¹² Neryo Hĩramũ mwalũa eTĩro erĩyalebya emĩyĩ eyo Solomono amuha; nayo moyĩtamũtsemesya.

¹³ Neryo mwabũga ati, Mugala wetu, kwʼemĩyĩ ukamba ni yahi kwehĩ? Neryo mwahulayo mo kihugo kyʼeKabũlĩ nʼerĩhĩka mũnabwĩre.

¹⁴ Kandi Hĩramũ mwatumira omwami esyotalanta syʼesyamagetsi erĩgana nʼamakũmĩ abiri (120).

Emĩyĩ Solomono ahĩmba

¹⁵ Neryo oyũ go mwatsi ogo mwami Solomono akola akakongola bandu busana nʼerĩhĩmba enyũmba yʼOmwami Mukulu nʼenyũmba yiwe, eMĩlo, nʼolũhĩmbo lwʼeYerũsalema, nʼeHazorĩ, nʼeMĩgĩdo, nʼeGezerĩ.

¹⁶ Na Farao omwami wʼeMĩsĩrĩ, abya iniabirihetuka erĩyahũnga eGezerĩ, nʼerĩhĩsyago omo muliro, nʼerĩĩta Abanya Kanana ababya bĩkere omo mũyĩ, neryo mwahago mwali wuwe muka Solomono mo mũtahyo.

¹⁷ Neryo Solomono mwahĩmba eGezerĩ, nʼeBetĩ-horonĩ owʼeyĩkwa,

¹⁸ na Balatĩ, na Tamarĩ omo mbwarara, omo kihugo,

¹⁹ nʼemĩyĩ yosĩ yʼembĩso eyo Solomono abya awite, ye mĩyĩ busana nʼesyogalĩ siwe, nʼemĩyĩ busana nʼabakagenda oko syosabayĩrĩ siwe, nʼeyo Solomono asonda erĩhĩmba busana nʼerĩyĩtsemesya eYerũsalema, nʼeLebanonĩ, nʼomo kihugo kyosĩ kyʼobutabale buwe.

²⁰ Nĩkwa abandu abasĩgalira oko Bamorĩtĩ, nʼAbahĩtĩ, nʼAbaperĩzĩ, nʼAbahĩvĩ, nʼAbayebũsĩ, abatabya bʼoko bana ba Ĩsraelĩ.

²¹ Abana babo abasĩgalira enyũma wabo omo kihugo, abo abana ba Ĩsraelĩ batalukako erĩheryabo, Solomono mwakongola kubo mo bandu bʼerikola omũbĩrĩ erĩhĩka na mũnabwĩre.

²² Nĩkwa oko bana ba Ĩsraelĩ Solomono mwatayira abakobe, nĩkwa babya bandu bʼamalwa nʼabagombe buwe, nʼabanya-mwami buwe, nʼabakulu buwe, nʼabasondolĩ bʼesyogalĩ nʼabandu buwe bʼesyosabayĩrĩ.

²³ Aba bo babya bakulu ababya oko mũbĩrĩ wa Solomono, amagana atanu nʼamakũmĩ atanu (550), abatabala oko bandu abakola omũbĩrĩ.

²⁴ Nĩkwa mwali wa Farao abere abĩlũa omo mũyĩ wa Dawĩdĩ eriya omo nyũmba yiwe eyo Solomono amũhĩmbĩra; neryo Solomono mwahĩmba eMĩlo.

²⁵ Kandi engendo ĩsatu oko mwaka Solomono mwahera amahere wʼerĩokererya nʼamahere wʼobuholo oko kiherero ekyo ahĩmbĩra Omwami Mukulu, nʼerĩhĩsya obukwa haguma nago oko kiherero ekyabya embere syʼOmwami Mukulu. Kwʼabuga atya enyũmba.

²⁶ Neryo Solomono nibya mwabatsira amato eEzĩonĩ-geberĩ, awali hakũhĩ nʼeElotĩ, oko mũsĩke wʼengetsi yʼOmunyama, omo kihugo kyʼeEdomũ.

²⁷ Na Hĩramũ mwatuma abagombe buwe omo mato, abandu ababya basĩ engetsi, haguma nʼabagombe ba Solomono.

²⁸ Neryo mobahĩka eOfĩrĩ, mobendayo esyamagetsi esyotalanta magana ani nʼamakũmĩ abiri (420), mobaletasyo oko mwami Solomono.