1 Abami 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Solomono akahĩra erĩsandũko lyʼerilagana omo Hekalũ

¹ Neryo Solomono mwahĩndanĩa abakulu bʼAbaĩsraelĩ, nʼabasondolĩ bosĩ bʼebihanda, nʼabasondolĩ bʼebĩtũnga byʼabotata bʼabana bʼAbaĩsraelĩ, erĩhĩka oko mwami Solomono eYerũsalema, busana nʼerĩhetũkya erĩsandũko lyʼerilagana lyʼOmwami Mukulu oko mũyĩ wa Dawĩdĩ, eyo ye Sĩonĩ.

² Nʼabandu bosĩ ba Ĩsraelĩ mobayĩhĩndanĩa embere syʼomwami Solomono, oko kiro kikulu oko mukera wʼeEtanĩmũ, go mukera wʼakalinda.

³ Nʼabakulu bosĩ bʼAbaĩsraelĩ mobasa, nʼabahererĩ mobaheka erĩsandũko eryo.

⁴ Mobahetũkya erĩsandũko lyʼOmwami Mukulu, nʼeHema yʼerĩhĩndanamo, nʼebindu byosĩ bĩbũyĩrĩre ebyabya omo Hema; bye byo abahererĩ nʼAbalawĩ bahetũkaya.

⁵ Nʼomwami Solomono nʼendeko yosĩ yʼAbaĩsraelĩ, abahĩndana embere siwe, mobabya haguma naye embere syʼerĩsandũko, ibakahonga esyombũlĩ nʼesyonume esiteganzika busana nʼobungi bwasyo.

⁶ Nʼabahererĩ mobĩngĩrya erĩsandũko lyʼerilagana lyʼOmwami Mukulu, omo mwanya walyo, omo kyumba ahabũyĩrĩre kutsibu hʼenyũmba, ahabũyĩrĩre kutsibu, eyĩkwa oko bĩpũpa byʼamakerũbĩ.

⁷ Kusangwa amakerũbĩ mobasanza ebĩpũpa byabo endata oko mwanya wʼerĩsandũko, nʼamakerũbĩ mobaswikira erĩsandũko nʼemiti yalyo.

⁸ Nʼemiti eyo moyabya miri kyaleka amasongera wayo inialangirwa ahabũyĩrĩre embere wʼekyumba kyʼahabũyĩrĩre kutsibu; nĩkwa ĩsĩalolĩrweko eyĩhya; na lino kwʼine hʼitya mũnabwĩre.

⁹ Simwabya kindu, bye nʼebisayi bibiri byʼamabwe ebyo Musa ahĩramo eHorebũ, omugulu Omwami Mukulu ayira endagano haguma nʼabana ba Ĩsraelĩ, omugulu balũa omo kihugo kyʼeMĩsĩrĩ.

¹⁰ Neryo abahererĩ babere babĩlũa ahabũyĩrĩre, ekĩtũ mokyũsũlya enyũmba yʼOmwami Mukulu,

¹¹ kyaleka abahererĩ ibatatoka erihangana erikola busana nʼekĩtũ; kusangwa olukengerwa lwʼOmwami Mukulu molũsũlya enyũmba yʼOmwami Mukulu.

Solomono akatũlago busana nʼeHekalũ

¹² Neryo Solomono mwabũga ati, Omwami Mukulu abĩrĩbũga ati asyĩkala omo kĩtũ kĩkalĩre.

¹³ Kwenene nabĩrĩkũhĩmbĩra enyũmba yʼerĩĩkalamo, ahʼerĩĩkala busana nawe kera na kera.

¹⁴ Nʼomwami mwakeba mwabindula obũsũ buwe, mwatsumula endeko yosĩ yʼAbaĩsraelĩ; nʼendeko yosĩ yʼAbaĩsraelĩ moyahangana.

¹⁵ Neryo mwabũga ati, Omũyĩsa abye oko Mwami Mukulu Nyamuhanga wʼeĨsraelĩ, oyo wabũga omo buno buwe na tata wage Dawĩdĩ, nʼakandi abĩrĩberereryabyo omo byala biwe ati,

¹⁶ Erĩtsũka ekiro ekyo nalũsaya bandu bage Abaĩsraelĩ eMĩsĩrĩ, mondayisoga omũyĩ omo bihanda byosĩ bya Ĩsraelĩ ahʼerĩhĩmba enyũmba, erĩna lyage litoke eribyaho, nĩkwa monayisoga Dawĩdĩ eritabala oko bandu bage Abaĩsraelĩ.

¹⁷ Nĩkwa mokyabya omo mutima wa tata wage Dawĩdĩ erĩhĩmba enyũmba busana nʼerĩna lyʼOmwami Mukulu, Nyamuhanga wa Ĩsraelĩ.

¹⁸ Nĩkwa Omwami Mukulu mwabwira tata wage Dawĩdĩ ati, Kusangwa kyabya omo mutima wawe erĩhĩmba enyũmba busana nʼerĩna lyage, mowakola ndeke ekyo kikabya omo mutima wawe.

¹⁹ Nĩkwa ni we ũtendĩsyahĩmba enyũmba; nĩkwa omugala wawe oyo wasyalũa omo nda yawe, iye yo wasyahĩmba enyũmba busana nʼerĩna lyage.

²⁰ Kandi Omwami Mukulu abĩrĩberererya ekĩnywa kiwe ekyo abũga; kusangwa nabirihangana omo mwanya wa tata wage Dawĩdĩ, nʼerĩĩkala omo kĩtũmbĩ kyʼobwami kya Ĩsraelĩ, ngoko Mwami Mukulu alaga, kandi nabĩrĩhĩmba enyũmba busana nʼerĩna lyʼOmwami Mukulu, Nyamuhanga wa Ĩsraelĩ.

²¹ Nʼomo nabĩrĩhĩra omwanya wʼerĩsandũko, omuli endagano yʼOmwami Mukulu, eyo alagana nʼabotata wetu, omugulu alũsayabo omo kihugo kyʼeMĩsĩrĩ.

Erisaba lya Solomono akahigula eHekalũ busana na Nyamuhanga

²² Neryo Solomono mwahangana embere wʼekiherero nʼemuliro wʼendeko yosĩ yʼAbaĩsraelĩ, mwasumbira ebyala biwe byʼendata.

²³ Mwabũga ati, Uwe Mwami Mukulu, Nyamuhanga wa Ĩsraelĩ, sihali Nyamuhanga oyuli nga we, omo lubula endata, kutse omo kihugo eyĩkwa; oyũkategaya endagane nʼobubuya bwʼolwanzo busana nʼabagombe bawe, abakalendera embere syawe nʼomutima wabo gosĩ.

²⁴ Wabĩrĩberererya uku tata wage Dawĩdĩ ebyo wamulaga; ega, mowabũga omo buno bwawe, kandi wabĩrĩberereryabyo omo byala byawe ngoko biri mũnabwĩre.

²⁵ Na lino uwe Mwami Mukulu, Nyamuhanga wa Ĩsraelĩ, Ũberereraye busana nʼomugombe wawe tata wage Dawĩdĩ, ebyo wamulaga uti, Sihendisyabula mundu omo meso wage erĩĩkala oko kĩtũmbĩ kyʼobwami kya Ĩsraelĩ, abana bawe bamateya enzira yabo, erirendera embere syage ngoko wabirirendera embere syage.

²⁶ Na lino, uwe Nyamuhanga wa Ĩsraelĩ, ngakusaba, nyiti ekĩnywa kyawe kibererere, ekyo wabwira omugombe wawe tata wage Dawĩdĩ.

²⁷ Nĩkwa kwenene Nyamuhanga asyĩkala oko kihugo kwehĩ? Lebaya, elubula, nʼekyanya kyʼebyanya sibyangatoka erikutolera; nʼenyũmba eyĩ nabĩrĩhĩmba ni nge kwʼaho kwilaba!

²⁸ Nĩkwa Ũlĩge erisaba lyʼomugombe wawe, nʼerigongagonga liwe, uwe Mwami Mukulu Nyamuhanga wage, erihulikirira erilaka nʼerisaba lyʼomugombe wawe akasaba embere syawe mũnabwĩre.

²⁹ Ameso wawe alĩbũkale erĩlolya oko nyũmba eyo omo kiro nʼomwʼitungi, erĩlolyago aho wabiriahula uti, Erĩna lyage lyasyabyaho; erĩowa erisaba eryo mugombe wawe asyasaba akalĩlolya hano.

³⁰ Kandi uhulikirire emilake yʼomugombe wawe, nʼeyʼabandu bawe Abaĩsraelĩ, omugulu basyalolya erisaba lyabo hano; ega, gowe omo lubula eyo aho wĩkere; nʼomugulu ũkowa, ubuyire.

³¹ Omundu amakolere mũlĩkyabo yo kibi, nʼerĩlahĩrya lĩkahĩrwa kwiye erĩmũlahĩrĩrya, neryo akasa nʼerĩlahĩrya embere syʼekiherero kyawe omo nyũmba eyĩ;

³² neryo eyo elubula gowe, kandi utole, utswere abagombe bawe, eritswera ababi bo lubi, nʼerĩsũbya omusango wuwe oko mutwe wuwe, nʼeriha erĩbanza libuya oko batunganene, nʼerimuliha ngʼeritunganene riwe.

³³ Omugulu abandu bawe Abaĩsraelĩ bakakĩndawa embere wʼesyonzĩgũ syabo, kusangwa babĩrĩkũhalyako; bamakubindukirako, nʼerĩkangya erĩna lyawe, nʼerisaba nʼerikugonga-gonga omo nyũmba eyĩ;

³⁴ neryo gowe omo lubula, ubuyire ebibi byʼabandu bawe Ĩsraelĩ, iwaswaletabo omo kihugo ekyo waha abotata wabo.

³⁵ Omugulu olubula lwasyakingwa, isihali mbũla, kusangwa babĩrĩkũhalyako; bamasaba bakalolya eno, nʼerĩkangya erĩna lyawe, nʼeribinduka oko bibi byabo, omugulu ũkagalayabo;

³⁶ neryo gowe elubula, ubuyire ebibi byʼabagombe bawe, nʼebyʼabandu bawe Abaĩsraelĩ, omugulu Akakangĩrĩrayabo enzira yowene eyo bangalenderamo; nʼerituma embũla oko kihugo kyawe, ekyo wabiriha bandu bawe eribya mwandu.

³⁷ Enzala yamabya omo kihugo, mwamabya nʼobũkonĩ bwʼakasũsũ, mwamabya endwala yʼebyalya kutse embuhu, esyongĩke, kutse obũngũkũ; nʼesyonzĩgũ syabo syamagoterabo omo kihugo kyʼemĩyĩ yabo; kutse ekĩhũnzo kyahi, kutse hamabya endwala;

³⁸ erisaba lyahi kutse erigonga-gonga lyʼomundu wahi, kutse lyʼabandu bawe bosĩ Abaĩsraelĩ, abasĩ obuli mundu endwala yʼomutima wuwe, akasanza ebyala biwe erĩlolyabyo oko nyũmba eyĩ.

³⁹ Neryo omo lubula aherĩĩkala lyawe gowe, ubuyire, utole, ulihe obuli mundu ngʼesyonzira siwe, ĩnũnasĩ omutima wuwe; kusangwa uwe, ĩgowene, ĩgũnasĩ emitima yʼabagala bʼabandu bosĩ;

⁴⁰ ibatoka erikubaha ebiro byosĩ ebyo bakabyaho omo kihugo ekyo waha abotata wetu.

⁴¹ Kandi busana nʼowʼehandi, oyute gʼoko bandu bawe Abaĩsraelĩ, omugulu asyasa akalũa omo kihugo kyʼehali busana nʼerĩna lyawe,

⁴² kusangwa basyowa engulu yʼerĩna lyawe ĩnene, nʼebyala byawe byʼamaka, nʼokuboko kwawe kũyĩsũmbĩre; omugulu asyasa nʼerisaba erĩlolya oko nyũmba eyĩ;

⁴³ omo lubula aherĩĩkala lyawe, gowe, utole ngʼebyosĩ ebyo owʼehandi asyakũbũlya; ebihanda byosĩ byʼekihugo bitoke eriminya erĩna lyawe, erikubaha, ngoko bandu bawe Abaĩsraelĩ bakakola, baminye kwʼenyũmba eyo nabĩrĩhĩmba ikahulawa oko lĩna lyawe.

⁴⁴ Abandu bawe bamayalwa nʼesyonzĩgũ syabo, omo nzira yahi ukatumabo, nabo bamasaba Omwami Mukulu nʼerĩlolya oko mũyĩ ogo wabiriyisoga, nʼerĩlolya oko nyũmba nabĩrĩhĩmba busana nʼerĩna lyawe;

⁴⁵ neryo omo lubula gowe erisaba lyabo nʼerilaka lyabo, kandi wimire erĩbanza lyabo.

⁴⁶ Bamakũhalyako, kusangwa sihali mundu oyutekola ebibi nawe ukahitana kubo, nʼerihabo oko nzĩgũ, bakahekabo mo banyegwa omo kihugo kyʼesyonzĩgũ, hali kutse hakũhĩ;

⁴⁷ nĩkwa bamayĩbũlya omo mitima yabo omo kihugo eyo batwalawa mo banyegwa bati, Twabirikola ebibi, twabirikola ebĩhengemĩre, twabirikola nabi;

⁴⁸ bamakusubako nʼomutima wabo gosĩ nʼekĩrĩmũ kyabo kyosĩ omo kihugo kyʼesyonzĩgũ syabo, abahekabo mo banyegwa, bamakusaba erĩlolya oko kihugo kyabo ekyo waha oko botata-kulu wabo, nʼomũyĩ ogo wabiriyisoga, nʼenyũmba eyo nabĩrĩhĩmba busana nʼerĩna lyawe;

⁴⁹ omo lubula aherĩĩkala lyawe gowe erisaba lyabo nʼerilaka lyabo, kandi wimire erĩbanza lyabo;

⁵⁰ ubuyire abandu bawe ababĩrĩkũhalyako, nʼamalolo wabo gosĩ ago babĩrĩkũhalyako; kandi uganyirebo embere syʼabahekabo mo banyegwa, batoke eriganyirabo,

⁵¹ kusangwa ibo ni bandu bawe, nʼomwandu wawe, ogo walũsaya eMĩsĩrĩ erĩlũa omwʼirunga lyʼekyuma;

⁵² ameso wawe alĩbũkale busana nʼerilaka lyʼomugombe wawe, nʼerilaka lyʼabandu bawe Abaĩsraelĩ, erĩowabo emigulu yosĩ bakakulakira.

⁵³ Kusangwa mowasololabo erĩlũa omo katĩkatĩ kʼebihanda byosĩ byʼekihugo, eribya mwandu wawe, ngoko wabũgĩra omo buno bwa Musa omugombe wawe, omugulu walũsaya abotata-kulu betu bʼeMĩsĩrĩ, uwe Mukama Iye Omwami Mukulu.

⁵⁴ Neryo Solomono abere abibuga erisaba atya nʼerilakira Omwami Mukulu, neryo mwahangana akalũa embere syʼekiherero kyʼOmwami Mukulu aho abya akũkamĩre omo marwĩ wuwe nʼebyala biwe ĩbĩnayĩsũmbĩre erĩlolya elubula.

⁵⁵ Neryo mwahangana mwatsumula endeko yosĩ yʼAbaĩsraelĩ omo mulenge munene ati,

⁵⁶ Omũyĩsa abye oko Mwami Mukulu, oyo wabiriha abandu buwe Abaĩsraelĩ eriluhuka, ngʼebyosĩ alaga. Mohatabula nʼekĩnywa nʼekiguma omwʼilaga liwe libuya lyosĩ, eryo alaga uku Musa omugombe wuwe.

⁵⁷ Omwami Mukulu Nyamuhanga wetu abye netu ngoko abya nʼabotata-kulu betu. Sĩatũsĩge, kutse erĩtũlekeranĩa;

⁵⁸ neryo alolaye emitima yetu ukwʼiye, nʼerirendera omo nzira siwe syosĩ, nʼerĩteya ebihano biwe, nʼemigambo yiwe, nʼebilayiro biwe ebyo ahana abotata-kulu betu.

⁵⁹ Nʼebĩnywa ebĩ nabirisaba embere syʼOmwami Mukulu, bibye hakũhĩ nʼOmwami Mukulu Nyamuhanga wetu omo musibo nʼomo kiro, ĩnĩahanganĩa omwatsi wʼomugombe wuwe, nʼomwatsi wʼabandu buwe Abaĩsraelĩ ngʼobwaga bwabo bʼobuli kiro;

⁶⁰ ebihanda byosĩ byʼekihugo biminye ngoko Mwami Mukulu, yo na Nyamuhanga; sihali gundi.

⁶¹ Neryo emitima yenyũ ibye ĩnĩnahĩkene oko Mwami Mukulu Nyamuhanga wetu, erirendera omo migambo yiwe, nʼerĩteya ebihano biwe ngoko biri mũnabwĩre.

⁶² Neryo omwami, nʼAbaĩsraelĩ bosĩ haguma naye mobahonga amahere embere syʼOmwami Mukulu.

⁶³ Na Solomono mwahera ehongo yʼamahere wʼobuholo, esyo aherera Omwami Mukulu, esyonume syʼesyonde elfu makũmĩ abiri nʼĩbĩrĩ (22,000), nʼesyombũlĩ elfu erĩgana nʼamakũmĩ abiri (120,000). Neryo omwami nʼabana bosĩ bʼeĨsraelĩ mobahigula batya enyũmba yʼOmwami Mukulu.

⁶⁴ Oko kiro ekyo kisa-kisa omwami mwahigula ekibuga kyʼomo katĩkatĩ ekyabya embere syʼenyũmba yʼOmukama Mukulu; kusangwa aho mwahera obuhere bwʼerĩokererya, nʼobuhere bwʼeyĩsyano, nʼamagũta wʼamahere wʼobuholo, kusangwa ekiherero kyʼomulinga ekyabya embere syʼOmwami Mukulu kyabya kyike ĩsĩkĩhĩkene busana nʼeriangirira obuhere bwʼerĩokererya, nʼobuhere bwʼeyĩsyano, nʼamagũta wʼamahere wʼobuholo.

⁶⁵ Neryo Solomono mwayira ekiro kikulu oko mugulu oyo, na Ĩsraelĩ yosĩ haguma naye, endeko nene, erĩtsũka oko lũkyo lwa Hamatĩ nʼerĩhĩka oko lũsĩ lwʼeMĩsĩrĩ, embere syʼOmwami Mukulu Nyamuhanga wetu, ebiro birinda nʼebiro birinda, byo biro ĩkũmĩ na bini.

⁶⁶ Nʼoko kiro kyʼomunani mwalagana nʼabandu; nabo mobatsumula omwami, mobaya omo mahema wabo ĩbatsemĩre nʼerĩyĩsyandira omo mitima yabo busana nʼebibuya byosĩ ebyo Mwami Mukulu akangaya omugombe wuwe Dawĩdĩ, nʼabandu buwe Abaĩsraelĩ.