1 Abami 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Solomono akayĩhĩmbĩra enyũmba yiwe

¹ Na Solomono mwayĩhĩmbĩra enyũmba yiwe oko myaka erĩkũmĩ nʼeyĩsatu, mwabuga enyũmba yiwe yosĩ.

² Kusangwa mwahĩmba enyũmba omo miti yʼomo mũsĩtũ wʼeLebanonĩ; obuli bwayo bwabya metere 46, nʼobugali bwayo ni metere 23, nʼobuli bwayo bwʼendata bwabya emetere 13-80, endata oko milondo ĩnĩ yʼesyondũyĩ syʼemĩerezĩ, nʼemigamba yʼomũerezĩ endata oko syondũyĩ.

³ Nayo moyaswikwa endata omo mũerezĩ endata oko migamba makũmĩ ani nʼeyĩtanu, eyabya endata oko syondũyĩ; erĩkũmĩ nʼesĩtanu omo buli mulondo.

⁴ Kandi mohabya emigamba omo milondo ĩsatu, akadĩrĩsa eyisirya oko kadĩrĩsa omo milondo ĩsatu.

⁵ Nʼesyonyũyĩ syosĩ syabya siringene busana nʼemigamba; nʼakadĩrĩsa kabya katungerere akandi kadĩrĩsa omo milondo ĩsatu.

⁶ Neryo mwakokotya ekisusu kyʼesyondũyĩ; obuli bwakyo ni maboko makũmĩ atanu, nʼobugali bwakyo amaboko makũmĩ asatu; nʼekisusu embere yasyo; nʼesyondũyĩ nʼekĩsekũ embere wabyo.

⁷ Kandi mwakokotya obũsekũ bwʼekĩtũmbĩ kyʼobwami aho angatswera emyatsi, bo bũsekũ bwʼeritswera; nabo mobwaswikwa omo mĩerezĩ erĩtsũka ahisi nʼerĩhĩka endata.

⁸ Nʼenyũmba yiwe aho asyĩkala, nʼekindi kibuga omwisi wʼobũsekũ bwakolawa butya. Kandi mwahĩmba enyũmba ya mwali wa Farao oyo Solomono ahĩkaya moyasosa obũsekũ obũ.

⁹ Esyosĩ esĩ mosyahĩmbwa omo mabwe wʼobũgũlĩ, amabwe awabatsĩre, awalingirirene nʼolulengo, awasegawa omo hisega, omwisi nʼeyĩhya, erĩtsũka oko kibanza nʼerĩhĩka oko lutwe, nʼeyĩhya nibya erĩhĩka oko kibuga kinene.

¹⁰ Nʼekibanza kyabya kyʼamabwe wʼobũgũlĩ bunene, amabwe manene-manene, amabwe wʼobuli bwa metere 4.60 nʼamabwe wa metere 3.68.

¹¹ Nʼendata habya amabwe wʼobũgũlĩ bunene amabwe awabatsĩre, awali oko lulengo, nʼebisayi byʼomũerezĩ.

¹² Nʼekibuga oko mbande syosĩ mokyabya nʼemilondo ĩsatu yʼamabwe awabatsĩre, nʼomulondo muguma wʼemigamba yʼomũerezĩ ekĩsosĩre ekibuga kyʼomwisi wʼenyũmba yʼOmwami Mukulu, nʼobũsekũ bwʼenyũmba.

¹³ Kandi Solomono mwatumira Hĩramũ erimwenda erĩlũa eTĩro.

¹⁴ Naye abya mugala wʼomũkwakalĩ owʼekihanda kya Nafũtalĩ, na tata wuwe abya mundu wʼeTĩro, omũhesĩ wʼemiringa; naye iniabiribya mundu wʼamenge nʼobowĩka nʼobunyima bwʼerikola emĩbĩrĩ yosĩ yʼemiringa. Naye mwahĩka eyiri omwami Solomono, neryo mwakola omũbĩrĩ wuwe gosĩ.

¹⁵ Kusangwa mwahesa esyondũyĩ ĩbĩrĩ syʼemiringa, obuli bwʼendata bwʼendũyĩ bwabya bwa metere 8; nʼengohe yʼemetere 6 yabya ĩtĩmbĩre oko ndũyĩ syosĩ.

¹⁶ Kandi mwahesa esyombĩta ĩbĩrĩ syʼemiringa eyĩnũnĩrye, esyʼerĩhĩra endata oko syondũyĩ; obuli bwʼendata bwʼembĩta nguma bwabya metere 2 nʼobuli bwʼendata bwʼeyindi mbĩta bwabya metere 2.

¹⁷ Kandi mohabya omũsĩndo wʼeriluka lyʼengohe, nʼobuhese bwʼamahulula, busana nʼesyombĩta esyabya endata oko syondũyĩ; ebirinda oko mbĩta nguma nʼebirinda oko yindi mbĩta.

¹⁸ Kwʼahesa esyondũyĩ syʼatya; kandi habya emilondo ĩbĩrĩ eyĩtĩmbĩre oko muluko muguma, eriswika esyombĩta esyabya endata oko syondũyĩ; mwakola atya busana nʼeyindi mbĩta nibya.

¹⁹ Nʼesyombĩta esyo esyabya endata oko syondũyĩ omo bũsekũ syabya syʼomũbĩrĩ wʼobũsoyo bʼobutsibira, bwa metere 1.84.

²⁰ Kandi habya esyombĩta endata oko syondũyĩ ĩbĩrĩ, hakũhĩ nʼahagalĩhĩre ahabya hakũhĩ nʼahalũkĩre. Amakomamanga abya magana abiri, oko milondo oko mbande syosĩ endata oko yindi mbĩta.

²¹ Neryo mwasingika esyondũyĩ omo bũsekũ bwʼeHekalũ; neryo mwasingika endũyĩ yʼamali, neryo mwahula erĩna lyayo mo Yakĩnĩ; neryo mwasingika endũyĩ yʼamalembe, neryo mwahulayo mo Boazĩ.

²² Nʼendata oko syondũyĩ habya omũbĩrĩ wʼobũsoyo bʼobutsibira; nʼomũbĩrĩ wʼesyondũyĩ kwʼahwa atya.

Erihesa lyʼengetsi yʼomulinga

²³ Neryo mwahesa engetsi eyĩyĩtĩmbĩreko eyĩnũnĩrye yʼobuli bwʼemetere 5 erĩlũa oko mũnywa muguma erĩhĩka oko gundi, nʼobuli bwayo erilola endata bwabya metere 2; nʼengohe eyĩtĩmbĩre kuyo oko mbande syosĩ yabya ya metere 14.

²⁴ Nʼeyĩkwa oko mũnywa wayo oko mbande syosĩ habya ebĩsosĩre ebĩgũma ebĩtĩmbĩreho, ĩkũmĩ omo buli metere 0.46, erĩtĩmba oko ngetsi; ebĩgũma ebĩ byabya omo milondo ĩbĩrĩ, ebĩhesĩre omugulu engetsi yahesawa.

²⁵ Moyahangana endata oko nume syʼesyonde ĩkũmĩ nʼĩbĩrĩ, esĩsatu esitungerere eluhande lwʼelutambi lwʼendata, nʼesĩsatu esitungerere ebwanga bwʼeyĩkwa, nʼesĩsatu esitungerere ebwanga bwʼelutambi lwʼeyĩkwa, nʼesĩsatu esitungerere ebwanga bwʼendata; nʼengetsi moyasingikwa endata kusyo, nʼamatako wasyo esyosĩ ĩnĩalolĩre omwisi.

²⁶ Nʼomũbĩmba wayo abya muraha nʼobugali bwʼebyala; nʼomũnywa wayo abya ahesĩre ngʼomũnywa wʼolũtehĩ, ngʼobũsoyo bʼobutsibira; imukaya lĩtre elfu makũmĩ ani nʼomunani.

²⁷ Neryo mwahesa esyondĩna ĩkũmĩ syʼemiringa; nʼobuli bwʼendĩna nguma bwabya metere 2; nʼobugali bwayo metere 2, nʼobuli bwʼerilola endata emetere 1.

²⁸ Nʼomũbĩrĩ wʼesyondĩna gʼomũsĩndo oyũ: syabya siwite ebihande; kandi habya ebihande omo katĩkatĩ kʼesyonũnga;

²⁹ nʼoko bihande ebyo ebyabya omo katĩkatĩ kʼesyonũnga habya esyondale, nʼesyonume syʼesyonde, nʼamakerũbĩ; nʼoko syonũnga esyo habya endĩna endata; nʼeyĩkwa oko ndale nʼesyonume habya ebĩrĩngo byʼemĩbĩrĩ eyikaleremba.

³⁰ Nʼobuli ndĩna iyiwite ebĩrĩngo bini byʼomulinga, nʼebyuma bĩwatĩrĩre ebyʼemiringa; nʼebisando bini byayo byabya nʼebĩhambĩrĩrĩ. Nʼeyĩkwa oko kitsinga habya ebĩhambĩrĩrĩ byʼemiringa ebĩnũnĩrye, nʼoko mũsĩke wʼobuli kiguma habya ebĩrĩngo bĩrũkĩre.

³¹ Nʼobuno bwakyo omwisi wʼembĩta, nʼendata kukyo habya sentĩmetere 46; nʼobuno bwakyo ĩbũyĩtĩmbĩreko ngʼomũbĩrĩ wʼendĩna, metere 69; kandi oko buno bwakyo habya eribatsa, nʼebihande byabyo byabya ĩbĩsarwĩre, bũtatĩmba.

³² Nʼebĩrĩngo bini byabya eyĩkwa oko bihande; nʼebyuma ebĩhambĩrĩre byʼebĩrĩngo byabya omo ndĩna; nʼobuli bwʼerĩlolya endata bwʼekĩrĩngo bwabya sentĩmetere 69 kitswe.

³³ Nʼomũbĩrĩ wʼebĩrĩngo abya ngʼomũbĩrĩ wʼekĩrĩngo kyʼegalĩ; nʼebyuma byʼeriwatirira, nʼebĩrĩngo, nʼebĩhambĩrĩrĩ ekĩrĩngo nʼebĩkũnĩngo, ebyosĩ byʼomulinga owanũnĩrye.

³⁴ Kandi habya ebĩhambĩrĩrĩ bini omo syonũnga ĩnĩ syʼobuli ndĩna. Ebĩhambĩrĩrĩ ebyo byabya kiguma nʼendĩna.

³⁵ Nʼendata wʼendĩna habya ekĩrĩngo, obuli bwʼerĩlolya endata bwakyo bwabya sentĩmetere 23; nʼendata oko ndĩna ebikahambayo nʼebihande byayo byabya omuhanda muguma.

³⁶ Nʼoko mũbĩrĩ wʼebĩhambĩrĩrĩ byayo nʼoko bihande byayo mwabatsa makerũbĩ nʼesyondale, nʼamabondo ngʼomwanya wʼobuli kiguma, haguma nʼebĩrĩngo ebĩlũkĩre oko mbande syosĩ.

³⁷ Mwahesa atya esyondĩna ĩkũmĩ; esyosĩ emihesere miguma, nʼolulengo luguma, nʼomuhanda muguma.

³⁸ Kandi mwahesa ebinabiro ĩkũmĩ byʼomulinga; omo kinabiro kiguma imukaya esyolĩtre magana mwenda nʼamakũmĩ ndatu; nʼobuli kinabiro kyabya metere 2 nʼoko syondĩna ĩkũmĩ oko buli ndĩna ihabya ekinabiro kiguma.

³⁹ Neryo mwasingika esyondĩna, esĩtanu oko luhande lwʼamali lwʼenyũmba, nʼesĩtanu oko luhande lwʼamalembe lwʼenyũmba. Neryo mwahĩra engetsi oko luhande lwʼamali lwʼenyũmba oko bwanga bwʼendata, erilola eLutambi lwʼeYĩkwa.

Hĩramũ akabuga erihesa ebindu byʼeHekalũ

⁴⁰ Kandi Hĩramũ mwahesa ebĩrĩba, nʼemyũko, nʼebibindi. Neryo Hĩramũ mwabuga emĩbĩrĩ yosĩ eyo akolera omwami Solomono omo nyũmba yʼOmwami Mukulu.

⁴¹ Nʼesyondũyĩ ĩbĩrĩ, nʼebibindi bibiri byʼesyombĩta esyabya endata oko syondũyĩ; nʼebĩlũkĩre ebibiri ebĩkakũnĩnga ebibindi bibiri byʼesyombĩta esyabya endata oko syondũyĩ;

⁴² nʼamakomamanga magana ani busana nʼebĩlũkĩre bibiri; emilondo ĩbĩrĩ yʼamakomamanga busana nʼobuli kĩlũkĩre erĩkũnĩnga ebibindi bibiri byʼesyombĩta esyabya endata oko ndũyĩ;

⁴³ nʼesyondĩna ĩkũmĩ, nʼebĩrĩba ĩkũmĩ endata oko ndĩna;

⁴⁴ nʼengetsi nguma, nʼesyonume syʼesyonde ĩkũmĩ nʼĩbĩrĩ eyĩkwa oko ngetsi;

⁴⁵ nʼesyonyungu, nʼemyũko, nʼebibindi byʼebindu byosĩ ebĩ, ebyo Hĩramũ akokoteraya omwami Solomono, omo nyũmba yʼOmwami Mukulu, ebyosĩ byabya byʼemiringa eyĩkakangabasanaya.

⁴⁶ Omo bwerere bwʼeYorodanĩ omwami mwanũnĩabyo, omo kitaka kyʼeribumba omo katĩkatĩ kʼeSũkotĩ nʼeZaratanĩ.

⁴⁷ Kandi Solomono mwaleka ebindu byosĩ ebyo butalengwa, kusangwa byabya bingi kutsibu; nʼobũlĩto bwʼemiringa mobutatoka eriminyikala.

Amena wʼebindu byahĩrawa omo Hekalũ

⁴⁸ Na Solomono mwakokotya ebindu byosĩ ebyabya omo nyũmba yʼOmwami Mukulu: ekiherero kyʼesyamagetsi nʼemesa byʼesyamagetsi aho Bundu bwʼErĩkanganĩa eyo bwabya;

⁴⁹ nʼebĩhambĩrĩrĩ byʼesyotala syʼesyamagetsi ebitanu oko luhande lwʼamali, nʼebitanu oko malembe, embere syʼahabũyĩrĩre kutsibu; nʼomusanga wʼesyotala, nʼebĩhomombyo, byʼesyamagetsi;

⁵⁰ nʼesyondehĩ, nʼemĩrĩmĩryo, nʼebibindi, nʼemyũko, nʼebindu byʼomuliro, byʼesyamagetsi nyibuya, nʼebikahamba Olũyĩ byʼesyamagetsi busana nʼesyonyũyĩ syʼomwisi wʼenyũmba, ahabũyĩrĩre kutsibu, na busana nʼesyonyũyĩ syʼenyũmba eyo ye Hekalũ.

⁵¹ Neryo omũbĩrĩ gosĩ oyo ogo mwami Solomono akola omo nyũmba yʼOmwami Mukulu mwahwa atya. Kandi Solomono mwĩngĩrya ebindu ebyo tata wuwe Dawĩdĩ ahigula, ebĩtsĩpa nʼesyamagetsi, nʼebindu, mwahĩrabyo omo mbĩso syʼenyũmba yʼOmwami Mukulu.