1 Abami 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritandika enyũmba yʼOmwami Mukulu

¹ Neryo omo mwaka wʼamagana ani nʼamakũmĩ munani (480) abana ba Ĩsraelĩ babĩlũa omo kihugo kyʼeMĩsĩrĩ, omo mwaka wʼakani wʼeritabala lya Solomono oko Ĩsraelĩ, oko mukera wa Zĩvũ, go mukera wʼakabiri, Solomono mwatsũka erĩhĩmba enyũmba yʼOmwami Mukulu.

² Nʼenyũmba eyo mwami Solomono ahĩmbĩra Omwami Mukulu, obuli bwayo bwabya metere 28, nʼobugali bwayo bwabya metere 9; nʼobuli bwayo erĩlolya endata bwabya emetere 14.

³ Nʼekĩsekũ embere wʼehekalũ, obuli bwakyo bwabya emetere 9 ngʼobugali bwʼenyũmba ko bwabya; nʼobugali bwakyo embere wʼenyũmba bwabya metere 5.

⁴ Kandi mwakokotya amadĩrĩsa awalukene.

⁵ Na hakũhĩ nʼolũhĩmbo lwʼenyũmba mwahĩmba otũnyũmba oko mbande syosĩ syʼehekalũ nʼahabũyĩrĩre kutsibu, litya mwayira otũnyũmba oko mbande syosĩ.

⁶ Ekyumba kyʼeyĩkwa kyabya kiwite obugali bwʼemetere 2; nʼekyʼomo katĩkatĩ kyabya nʼobugali bwʼemetere 3; nʼekyumba kyʼakasatu kyabya kiwite obugali bwʼemetere 3; kusangwa oko luhande lwʼeyĩhya, mwakehya obugali bwʼesyombĩmbo syʼenyũmba oko mbande syosĩ, neryo emigamba isiyangamatana omo syombĩmbo syʼenyũmba.

⁷ Nʼenyũmba yabere ĩkahĩmbwa moyahĩmbwa omo mabwe awabatsirawa omo mbũa; kandi mohatowĩbwa enyondo kutse embasa kutse ekindi kyuma omo nyũmba omugulu ĩkahĩmbawa.

⁸ Esyonyũyĩ syʼebyumba byʼomo katĩkatĩ syabya oko luhande lwʼamali lwʼenyũmba; kandi mobahetuka omo bisambiro ebĩtĩmbĩre eriya omo bisenge byʼomo katĩkatĩ, nʼerĩlũa omwʼaho katĩkatĩ erĩhĩka oko kyʼebisatu.

⁹ Kwʼahĩmba enyũmba yʼatya, neryo mwabugayo; kandi mwasakala enyũmba omo migamba nʼebisayi byʼemĩerezĩ.

¹⁰ Kandi mwahĩmba ebyumba oko ndambi syʼenyũmba yosĩ nʼobuli bwʼobuli kyumba kiguma erilola endata bwabya emetere (2); nasyo mosyamatana oko nyũmba omo miti yʼomũerezĩ.

¹¹ Ekĩnywa kyʼOmwami Mukulu mokyahĩka uku Solomono kiti,

¹² Busana nʼenyũmba eyo ũkahĩmba, wamalendera omo migambo yage, nʼerikola ebilayiro byage, nʼerĩteya ebihano byage byosĩ nʼerirendera mubyo; neryo nasyahanganĩa ekĩnywa kyage haguma nawe, ekyo nabwira tata wawe Dawĩdĩ.

¹³ Nage nasyĩkala omo katĩkatĩ kʼabana ba Ĩsraelĩ, ĩsĩndĩendĩsyasĩganĩa bandu bage Abaĩsraelĩ.

¹⁴ Neryo Solomono mwahĩmba enyũmba mwabugayo.

¹⁵ Kandi mwahĩmba esyombĩmbo syʼenyũmba syʼomwisi omo bisayi byʼemĩerezĩ erĩtsũka ahisi hʼenyũmba erĩhĩka oko kitanda eriswikasyo omo bisayi; kandi mwasesa ahisi omo bisayi byʼekĩlagũ.

¹⁶ Kandi mwahĩmba ekisenge kyʼemetere (9) oko luhande lwʼenyũma lwʼenyũmba omo bisayi byʼemĩerezĩ erĩtsũka ahisi erĩhĩka oko syombĩmbo syʼekitanda; mwahĩmbasyo busana nʼaho mwisi, eribya ahʼerisabira, busana nʼahabũyĩrĩre kutsibu.

¹⁷ Nʼenyũmba eyo yʼehekalũ emuliro wʼahʼerisabira obuli bwayo bwabya metere 18.

¹⁸ Neryo omwisi wʼenyũmba mohabya esyomũerezĩ esĩbatsĩre omo sĩsosĩre ebyobe nʼomusanga owasanzukere; omosĩ imutsungene emĩerezĩ; isihali erĩbwe erikalolawako.

¹⁹ Neryo mwategekanĩa ahʼerisabira omo katĩkatĩ kʼenyũmba omwisi, erĩhĩraho erĩsandũko lyʼendagano yʼOmwami Mukulu.

²⁰ Nʼomwisi wʼahʼerisabira habya omwanya wʼobuli bwa metere 9, nʼobugali bwʼemetere 9, nʼerilola endata obuli bwʼemetere 9, kandi mwaswikaho omo syamagetsi esĩtũkwĩre. Neryo mwaswika ekiherero omo mĩerezĩ.

²¹ Solomono mwahakabya enyũmba omwisi omo syamagetsi esĩtũkwĩre; kandi mwakyinga ahʼerisabira omo mahulula wʼesyamagetsi; kandi mwahakabyago omo syamagetsi.

²² Kandi mwahakabya enyũmba yosĩ omo syamagetsi, erĩhĩka aho abugira enyũmba yosĩ; kandi nʼekiherero kyosĩ ahabya ahʼerisabira mwahakabyaho nʼesyamagetsi.

Eritondeka amakerũbĩ

²³ Nʼomo kyumba ekyo mwakokotya amakerũbĩ abiri omo muti wʼemĩzeĩtũnĩ, obuli bwʼerilola endata bwago bwabya metere 4.4.

²⁴ Nʼobuli bwʼekĩpũpa kiguma kyʼomũkerũbĩ bwabya bwa metere 2.2 nʼobuli bwʼekindi kĩpũpa kyʼomũkerũbĩ bwabya metere 2. Erĩlũa oko ndũlĩ yʼekĩpũpa kiguma erĩhĩka oko yindi ndũlĩ yʼekindi yabya metere 4.

²⁵ Nʼogundi mũkerũbĩ abya wa metere 4, amakerũbĩ gosĩ abiri abya lulengo luguma nʼerisosa liguma.

²⁶ Obuli bwʼendata bwʼomũkerũbĩ muguma bwabya metere 4, ogundi mũkerũbĩ ikwʼane atya.

²⁷ Neryo mwahĩra amakerũbĩ omwisi wʼekisenge; nʼebĩpũpa byʼamakerũbĩ ĩbĩyĩsanzĩre, nʼekĩpũpa kiguma ĩkĩtũlĩre oko lũhĩmbo luguma, nʼekĩpũpa kyʼogundi mũkerũbĩ ĩkĩtũlĩre oko lundi lũhĩmbo; nʼebĩpũpa byago ĩbĩtũleneko omo katĩkatĩ kʼenyũmba.

²⁸ Neryo mwahakabya amakerũbĩ gʼomo syamagetsi.

Erisitika esyonyũyĩ syʼeHekalũ

²⁹ Neryo esyombĩmbo syosĩ syʼenyũmba omwʼibatsa lĩsosĩre amakerũbĩ nʼamabondo nʼomusanga owasanzwĩrye, omwisi nʼeyĩhya.

³⁰ Neryo mwahakabya olubuga-buga lwʼenyũmba omo syamagetsi, omwisi nʼeyĩhya.

³¹ Na busana nʼahʼeriingira lyʼekyumba mwabatsa esyonyũyĩ syʼomuti wʼomũzeĩtũnĩ. Omuti owahambĩre esyonzeguliro nʼesyonzeguliro byabya ekihande kiguma kyʼoko bitanu kyʼolũhĩmbo.

³² Kwʼabatsa atya esyonyũyĩ ĩbĩrĩ syʼomuti wʼemĩzeĩtũnĩ; neryo mwabatsa kusyo kwʼeribatsa lyʼamakerũbĩ nʼamabondo nʼomusanga owasanzwĩrye, mwahakabyabyo omo syamagetsi; kandi mwasesa esyamagetsi oko makerũbĩ, nʼoko mabondo.

³³ Kwʼabatsa atya esyonzeguliro busana nʼobwingiriro bwʼehekalũ omo muti wʼomũzeĩtũnĩ, omo kihande kyʼebini kyʼolũhĩmbo,

³⁴ nʼesyonyũyĩ ĩbĩrĩ syʼomuti wʼekĩlagũ; ebisayi bibiri byʼolũyĩ luguma byabya bĩkayĩrĩnga, nʼebisayi bibiri byʼolundi lũyĩ byabya bĩkayĩrĩnga.

³⁵ Neryo mwabatsa kusyo kwʼamakerũbĩ nʼamabondo nʼomusanga owasanzwĩrye; kandi mwahakabyasyo omo syamagetsi esyabiritondekwa oko kĩbatsĩre.

³⁶ Neryo mwahĩmba ekibuga kyʼomwisi omo milondo ĩsatu yʼamabwe awabatsĩre nʼomulondo muguma wʼemigamba yʼomũerezĩ.

³⁷ Oko mwaka wʼakani ekibanza kyʼenyũmba yʼOmwami Mukulu mokyahandwa, omo mukera wʼeZĩvũ.

³⁸ Nʼomo mwaka wʼerĩkũmĩ nʼomuguma omo mukera wʼeBũlĩ, oyo go mukera wʼomunani, enyũmba moyahwa omo bihande byayo byosĩ, ngʼemisosere yayo yosĩ. Kwʼahĩmbayo atya omo myaka irinda.