1 Abami 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Solomono akatahaya mwali wʼeMĩsĩrĩ

¹ Neryo Solomono mwasakana na Farao omwami wʼeMĩsĩrĩ, mwahĩkya mwali wa Farao, mwamuleta omo mũyĩ wa Dawĩdĩ erĩhĩka okwʼihwa lyʼerĩhĩmba enyũmba yiwe nʼenyũmba yʼOmwami Mukulu, nʼolũhĩmbo olũtĩmbĩre oko Yerũsalema.

² Nĩkwa abandu ibakinahongera ahendata, kusangwa ĩsĩhahĩmbĩre enyũmba busana nʼerĩna lyʼOmwami Mukulu erĩhĩka oko biro ebyo.

³ Na Solomono mwanza Omwami Mukulu, iniakalendera omo migambo ya tata wuwe Dawĩdĩ; nĩkwa mwahonga nʼerĩhĩsĩrya obukwa bwʼahʼendata.

Nyamuhanga akahuluklra Solomono omo nzolĩ eGĩbeonĩ

⁴ Neryo omwami mwaya eGĩbeonĩ erihongera obuhere eyo; kusangwa aho habya ahendata hanene. Solomono mwahera amahere wʼerĩokererya elfu nguma (1,000) oko kiherero ekyo.

⁵ EGĩbeonĩ Omwami Mukulu mwahulukira Solomono omo nzolĩ omo kiro; na Nyamuhanga mwamubwira ati, Bũlaya ekyo nangakuha.

⁶ Neryo Solomono mwabũga ati, Wabĩrĩkangya omugombe wawe tata wage Dawĩdĩ obubuya bunene bʼolwanzo ngoko alendera embere syawe omo kwenene, nʼomo litunganene, nʼomo bulungukale bʼomutima haguma nawe; nawe wabirimubikira obubuya bʼolwanzo bunene obũ, iwabirimuha mugala erĩĩkala oko kĩtũmbĩ kiwe kyʼobwami, ngoko biri mũnabwĩre.

⁷ Na lino, uwe Mwami Mukulu Nyamuhanga wage, wabiriyira omugombe wawe eribya mwami omo mwanya wa tata wage Dawĩdĩ; nage indi mwana mulere musa; Sĩnyasĩ ngoko nangahuluka kutse eriingira.

⁸ Nʼomugombe wawe ali omo katĩkatĩ kʼabandu bawe abo wayisoga, abandu bangi abatetoka eriganzwa, kutse eriganzika busana nʼobungi bwabo.

⁹ Busana nʼekyo, uhe omugombe wawe omutima wʼeriminya eritswera abandu bawe, inatoka eriminyerera omo katĩkatĩ kʼebibuya nʼebibi; kusangwa nindi wangatoka eritswera abandu bawe bangaha aba kwehĩ?

¹⁰ Neryo mokyatsemesya Omwami Mukulu, ngoko Solomono amũbũlaya omwatsi oyũ.

¹¹ Neryo Nyamuhanga mwamubwira ati, Kusangwa wabĩrĩbũlya omwatsi oyũ, ĩsũlĩtayĩbũlĩrya erikota biro bingi, kutse sũlĩtabũlya ebindu busana nawe, kutse sũlĩtabũlya erihola lyʼesyonzĩgũ syawe, nĩkwa wabĩrĩyĩbũlĩrya obowĩka eriminyerera erĩbanza;

¹² lebaya, nabirikola ngʼekĩnywa kyawe. Lebaya, nabirikuha omutima wʼamenge nʼowʼobowĩka; sihetabya oyuli nga we embere syawe, kutse enyũma kuwe sihendisyahangana oyuli nga we.

¹³ Kandi nabirikuha nibya ebyo ũtabũlaya, ebindu nʼerĩsĩkya ebibiri byosĩ, neryo sihendisyabya oyuli nga we omo katĩkatĩ kʼabami, oko biro byawe byosĩ.

¹⁴ Nawe wamagenda omo nzira syage erĩteya emigambo yage nʼebihano byage ngoko tata wawe Dawĩdĩ alendera, neryo nasyakanyĩrĩrya ebiro byawe.

¹⁵ Neryo Solomono mwabuka; neryo, lebaya, lyabya ilota, neryo mwahĩka eYerũsalema mwahangana embere syʼerĩsandũko lyʼerilagana lyʼOmwami Mukulu, kandi mwahera amahere wʼerĩokererya, mwahera nʼamahere wʼobuholo, kandi mwayira erirya ĩnene busana nʼabagombe buwe bosĩ.

Eritswera lya Solomono busana nʼabana babiri

¹⁶ Neryo abakalĩ babiri ababya bamalaya mobahĩka oko mwami, mobahangana embere siwe.

¹⁷ Nʼomũkalĩ muguma mwabũga ati, Uwe, mukama wage, ĩngye nʼomũkalĩ oyũ twĩkere omo nyũmba nguma; nage monabũtĩre omwana itune haguma naye omo nyũmba.

¹⁸ Neryo enyũma wʼebiro bisatu nabere nabibuta, nʼomũkalĩ oyũ naye mwabũtĩre; kandi twabya haguma; sihabya owʼehandi haguma netu omo nyũmba, nĩna twe babiri basa omo nyũmba.

¹⁹ Nʼomwana wʼomũkalĩ oyũ mwahola omo kiro, kusangwa amulalirako.

²⁰ Neryo mwahanganĩre omo katĩ-kanene, mwanyĩlũsĩrye kʼomugala wage aho wage, omugulu omugombe wawe wʼobũkalĩ abya agotsere, mwamũhĩrĩre oko kĩkũba kiwe, nʼomwana wuwe oyũholĩre mwamũhĩrĩre oko kĩkũba kyage.

²¹ Nʼomugulu nabuka omo ngyakya erĩongya omwana wage, kwehĩ iniabirihola; nĩkwa omugulu namusamalira omo ngyakya, lebaya, kwesĩ isi yo mugala wage, oyo nabuta.

²² Nʼogundi mũkalĩ mwabũga ati, Iyihi; nĩkwa oyuliho yo mugala wage, nʼoyũholĩre ni mugala wawe. Nʼoyũ mwabũga ati, Iyihi; nĩkwa oyũholĩre ni mugala wawe, nʼoyuliho ni mugala wage. Ko babũga batya embere syʼomwami.

²³ Neryo omwami mwabũga ati, Omuguma ati, Oyũ ni mugala wage oyuliho, nʼomugala wawe yũholĩre; nʼogundi ati, Iyihi; nĩkwa omugala wawe yũholĩre, nʼomugala wage yuliho.

²⁴ Neryo omwami mwabũga ati, Munyendere omũyalĩ. Neryo mobaleta omũyalĩ embere syʼomwami.

²⁵ Nʼomwami mwabũga ati, Mũtwe omwana oyuliho mo bihindi bibiri, muhe ekihindi oko muguma nʼekindi kihindi oko gundi.

²⁶ Neryo omũkalĩ wʼomwana oyuliho mwabũga nʼomwami kusangwa omutima wuwe mwaganyira omugala wuwe, ati, Iyo-o, mukama wage, umuhe omwana oyuliho, sũmwĩte nʼahake. Nĩkwa ogundi mwabũga ati, Siabye wage kutse wawe; atwĩbawe mo bihindi bibiri.

²⁷ Neryo omwami mwasũbĩrya ati, Muhe omũkalĩ wʼerĩmbere omwana oyuliho, sĩmũmwĩte nʼahake; iye nĩ nyĩnya wuwe.

²⁸ NʼAbaĩsraelĩ bosĩ mobowa eritswera eryo mwami atswera; mobubaha omwami; kusangwa balangira amenge wa Nyamuhanga kwʼabya omwisi wuwe, erikola erĩbanza libuya.