1 Abami 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Amalwa wa Benĩ-Hadadĩ na Ahabũ

¹ Neryo Benĩ-Hadadĩ omwami wʼeSũrĩa mwahĩndanĩa emilondo yiwe yosĩ haguma; kandi mohabya abami makũmĩ asatu nʼababiri haguma naye, nʼesyosabayĩrĩ nʼesyogalĩ. Neryo mwahetukira eSamarĩa nʼeriyabambirago nʼerilwa.

² Neryo mwatuma abakwenda uku Ahabũ omwami wʼAbaĩsraelĩ omo mũyĩ, mwamubwira ati, Ye Benĩ-Hadadĩ akabũga ati,

³ Ebĩtsĩpa byawe nʼesyamagetsi syawe ni syage; nʼabakalĩ bawe nʼabana bawe ababuya kutsibu, ni bage.

⁴ Nʼomwami wʼAbaĩsraelĩ mwasũbĩrya mwabũga ati, Biri ngoko ũlĩabũga mukama wage, uwe mwami; ĩngye indi wawe, nʼebyosĩ ebyo ngwite.

⁵ Nʼabakwenda mobaswasa, bati, Benĩ-Hadadĩ amabũga ati, Monakutumako nyiti, Wasyamba ebĩtsĩpa byawe, nʼesyamagetsi syawe nʼabakalĩ bawe nʼabana bawe;

⁶ nĩkwa omo ngyakya oko ndambĩ ngʼeno nasyatuma abagombe bage ukʼuwe, basyakwesa omo nyũmba yawe, nʼomo manyũmba wʼabagombe bawe; neryo, ebyosĩ ebĩkakũtsemesaya, byo basyĩmya omo byala byabo, ibahekabyo.

⁷ Neryo omwami wʼAbaĩsraelĩ mwabirikira abakulu bosĩ bʼekihugo, mwabũga ati, Ngababwira nyiti mũyĩtegereraye, mũlebaye ngoko mundu oyũ akasonda omwaga; kusangwa mwanyitumako busana nʼabakalĩ bage nʼabana bage, nʼebĩtsĩpa byage, nʼesyamagetsi syage; nage mondamuganira.

⁸ Neryo abakulu bosĩ nʼabandu bosĩ mobamubwira bati, Sĩgowe, kandi Sũlĩge.

⁹ Busana nʼekyo mwabwira abakwenda ba Benĩ-Hadadĩ ati, Mubwire omukama wage omwami muti, Ebyosĩ ebyo watumirako oko mugombe wawe erĩmbere ngandikola; nĩkwa omwatsi oyo sinangatoka erikolago. Neryo abakwenda mobagenda mobamuletera ekĩnywa ekyo.

¹⁰ Na Benĩ-Hadadĩ mwamutumirako ati, Esyonyamuhanga sĩsĩnzĩge, na kwilaba aho nibya, olũtũtũ lwʼeSamarĩa lwamatenditsungana omo biganza byʼabandu bosĩ abangwamĩre.

¹¹ Nʼomwami wʼeĨsraelĩ mwasũbĩrya mwabũga ati, Mumubwire muti, Oyukambala ebindu byʼamalwa biwe siayipipe ngʼoyukambulabyo.

¹² Neryo omugulu Benĩ-Hadadĩ owa omwatsi oyũ, omugulu abya akalũmba, iye nʼabami omo bitalikirire, neryo mwabwira abagombe buwe ati, Muyitondeke. Nabo mobayitondeka eribambira omũyĩ.

¹³ Neryo, lebaya, omũmĩnyererĩ mwahĩka hakũhĩ na Ahabũ omwami wʼeĨsraelĩ, mwabũga ati, Omwami Mukulu akabũga ati, Wabirilangira endeko nene yosĩ eyĩ kwehĩ? Lebaya, ngandĩhĩrayo omo byala byawe mũnabwĩre; nawe wasyaminya ko ndi Mwami Mukulu.

¹⁴ Neryo Ahabũ mwabũga ati, Busana nandi kwehĩ? Naye mwabũga ati, Omwami Mukulu akabũga ati, Busana nʼabalwana bʼabatabalĩ bʼebihugo. Neryo Ahabũ mwabũga ati, Nindi wasyatsũka amalwa kwehĩ? Naye mwasũbĩrya ati, Ni we.

¹⁵ Neryo mwahĩndanĩa abalwana bʼabatabalĩ bʼebihugo, nabo babya magana abiri nʼamakũmĩ asatu nʼababiri (232); neryo enyũma wʼaho mwahĩndanĩa abandu bosĩ, abandu ba Ĩsraelĩ, nabo ni elfu irinda (7,000).

¹⁶ Nabo mobahongoka omwʼitungi. Nĩkwa Benĩ-Hadadĩ abya akalũmba nʼeritamirira omo bitalikirire, haguma nʼabami makũmĩ asatu nʼababiri abamũwatĩkaya.

¹⁷ Nʼabalwana bʼabatabalĩ bʼebihugo mobahuluka erĩmbere; na Benĩ-Hadadĩ mwatuma eyĩhya, neryo mobamubwira bati, Hali bandu bakabĩlũa eSamarĩa.

¹⁸ Naye mwabũga ati, Bamabya baliasira buholo muhambebo ibaneho, kutse bamabya baliasira malwa, muhambebo ibaneho.

¹⁹ Ko bahuluka omo mũyĩ mo batya, abalwana bʼabatabalĩ bʼebihugo, nʼemilondo eyakwamabo.

²⁰ Obuli mundu mwĩta omundu wuwe. Abanya Sũrĩa mobatibita, nʼAbaĩsraelĩ mobakwamabo, na Benĩ-Hadadĩ omwami wʼeSũrĩa mwabala oko sabayĩrĩ haguma nʼababya oko syosabayĩrĩ.

²¹ Nʼomwami wʼAbaĩsraelĩ mwahuluka mwĩta esyosabayĩrĩ nʼesyogalĩ, mwĩta Abasũrĩa omwʼĩkwa lĩnene.

²² Nʼomũmĩnyererĩ mwahĩka hakũhĩ nʼomwami wa Ĩsraelĩ mwamubwira ati, Ugende, uyatunde amaka wawe, neryo ũyĩtegereraye, Ũlebaye ekyo wangakola, kusangwa Omwaka owakasa, omwami wʼeSũrĩa asyasa nʼerilwa nawe.

²³ Neryo abagombe bʼomwami wʼeSũrĩa mobamubwira bati, Esyonyamuhanga syabo ni nyamuhanga syʼebitwa; kyaleka ibayira amaka kwilaba twe; nĩkwa tulwe nabo omo lukwesese, neryo kwenene twasyayira maka kwilababo.

²⁴ Kandi Ukole omwatsi oyũ: Ũlũsayeho abami, obuli mwami alũe aho wuwe, ũhĩre abakulu omo myanya yabo,

²⁵ kandi uyiganzire omulondo, ngʼomulondo ogo wabĩrĩtalya, esabayĩrĩ omo mwanya wʼesabayĩrĩ, nʼegalĩ omo mwanya wʼegalĩ; netu tukandisyalwa nabo omo bwerere, kwenene twasyalabyabo amaka. Naye mwahulikirira omulenge wabo, mwakola atya.

Ahabũ akakĩnda Benĩ-Hadadĩ engendo yʼakabiri

²⁶ Neryo omũtũta abere aswahĩka, Benĩ-Hadadĩ mwahĩndanĩa Abasũrĩa mwahetukira eAfekĩ eriyalwa nʼAbaĩsraelĩ.

²⁷ Nʼabana ba Ĩsraelĩ mobahĩndanĩbwa mobahabwa ebitolerebo, mobayahĩndana nabo; nʼabana ba Ĩsraelĩ mobahanda ekilaliriro embere syabo ngʼehĩhyo hibiri hyʼehyana hyʼesyombene; nĩkwa Abasũrĩa mobũsũlya ekihugo.

²⁸ Neryo omundu wa Nyamuhanga mwahĩka hakũhĩ mwabwira omwami wʼeĨsraelĩ ati, Omwami Mukulu akabũga ati, Kusangwa Abasũrĩa babĩrĩbũga bati, Omwami Mukulu ni Nyamuhanga wʼebitwa, nĩkwa si nyamuhanga wʼemisya; busana nʼekyo ngandĩsyahĩra endeko nene yosĩ eyĩ omo byala byawe, nenyũ mwasyaminya ko ndi Mwami Mukulu.

²⁹ Kandi mobalalirira ebiro birinda ibanasamalirene. Neryo oko kiro kyʼebirinda amalwa mwatsũka; nʼabana ba Ĩsraelĩ mobĩta Abanya Sũrĩa oko kiro kiguma elfu ĩgana (100,000) abayigendera omo bisando.

³⁰ Nĩkwa abandi mobatibita erĩhĩka eAfekĩ, omo mũyĩ; nʼolũhĩmbo molwaterera oko bandu abasaka elfu makũmĩ abiri nʼirinda (27,000). Na Benĩ-Hadadĩ mwatibita mwingira omo mũyĩ, omo kyumba kyʼomwisi.

³¹ Nʼabagombe buwe mobamubwira bati, Lebaya, twabĩrĩowa ngoko abami bʼekihanda kya Ĩsraelĩ ni bami bʼeriganyira, tũkakũbũlaya twambale emisarandwe omo mbindi syetu, nʼemihungi oko mitwe yetu, tũhĩke oko mwami wa Ĩsraelĩ; kwamũhwa asyabalya engebe yetu.

³² Neryo mobambala emisarandwe omo mbindi syabo, nʼemihungi omo mitwe yabo, mobahĩka oko mwami wa Ĩsraelĩ, mobabũga bati, Omugombe wawe Benĩ-Hadadĩ akabũga ati, Kĩsĩ-kĩsĩ uleke nyibyeho. Neryo Ahabũ mwabũga ati, Akineho kwehĩ? Iye ni mugala wetu.

³³ Nʼabandu abo mobahamba ekĩnywa ekyo ngʼekĩmĩnyĩsyo mobahamba ekĩnywa kiwe lũba, bati, Omugala wenyũ Benĩ-Hadadĩ. Neryo Ahabũ mwabũga ati, Mugende mumulete. Neryo Benĩ-Hadadĩ mwahuluka embere siwe; naye mwamũsambya oko galĩ yiwe.

³⁴ Neryo Benĩ-Hadadĩ mwamubwira ati, Emĩyĩ eyo tata wage apũra uku tata wawe nasyasũbũlyayo; nawe wasyayitulira esyonzira eDamaseke ngoko tata wage akola eSamarĩa. Na Ahabũ mwabũga ati, Nage ngandĩkũlwĩka omo ndagano eyĩ. Neryo mwalagana naye mwamũlwĩka agende.

Nyamuhanga akakunga Ahabũ busana nʼobũkĩrũ buwe

³⁵ Nʼomundu muguma oko bagala bʼabamĩnyererĩ mwabwira mũlĩkyabo omo kĩnywa kyʼOmwami Mukulu ati, Kĩsĩ-kĩsĩ nyiti ũnyĩswĩraye. Nʼomundu oyo mwagana erĩmũswĩrya.

³⁶ Neryo mwamubwira ati, Kusangwa sulitakenga omulenge wʼOmwami Mukulu, lebaya, wamabĩlũa aho nyiri, endale ĩkandĩkwĩta. Neryo abere abĩlũa aho ali, endale moyamweya moyamwĩta.

³⁷ Neryo enyũma wʼaho mwabana ogundi mundu mwamubwira ati, Kĩsĩ-kĩsĩ nyiti, ũnyĩswĩraye. Nʼomundu oyo mwamũswĩrya, nʼerĩmũswĩrya mwamũhũtalya.

³⁸ Nʼomũmĩnyererĩ oyo mwalũaho atya, mwayalindirira omwami yʼomo nzira, mwayihindula busana nʼakakimba akabya oko meso wuwe.

³⁹ Nʼomugulu omwami alaba, mwabirikira oko mwami; mwabũga ati, Omugombe wawe mwaya omo katĩkatĩ kʼamalwa; neryo lebaya, omundu muguma mwanyikitirako, mwanyiretera omundu, ati, Ũtegaye omundu oyũ; neryo amatala, engebe yawe yasyahingana nʼengebe yiwe, kutse wasyaliha etalanta nguma yʼebĩtsĩpa.

⁴⁰ Neryo omugulu omugombe wawe abya akakola eyĩ nʼeyĩ, omundu oyo mwatswa. Nʼomwami wʼeĨsraelĩ mwamubwira ati, Eritswera lyawe ko likandibya litya; wamayĩtwĩralyo.

⁴¹ Neryo mwanguha mwalũsya akakimba kʼoko meso wuwe; nʼomwami wʼeĨsraelĩ mwamuminya kwʼabya gʼoko bamĩnyererĩ.

⁴² Neryo omũmĩnyererĩ mwamubwira ati, Omwami Mukulu ati, Kusangwa wabĩrĩlwĩka omo byala byawe omundu oyo nasombola erĩkwa, neryo engebe yawe ikandihingana nʼengebe yiwe, nʼabandu bawe ibahingana nʼabandu buwe.

⁴³ Nʼomwami wʼeĨsraelĩ mwagenda omo nyũmba yiwe ĩnĩaswekĩre ĩsĩatsemĩre, neryo mwahĩka eSamarĩa.