1 Abami 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Dawĩdĩ akahana Solomono

¹ Neryo ebiro byʼerihola lya Dawĩdĩ mobyabya hakũhĩ; neryo mwahana mugala wuwe Solomono, ati,

² Ngagenda omo nzira yʼekihugo kyosĩ; neryo ubye nʼamaka, ũyĩkangaye kʼuli mulume;

³ ũtegaye erĩhano lyʼOmwami Mukulu Nyamuhanga wawe, erirendera omo syonzira siwe, nʼerĩteya emigambo yiwe, nʼebihano biwe, nʼebilayiro biwe, nʼerĩtũlago liwe, ngʼebyosĩ ko bĩsakĩre omo migambo ya Musa, iwatoka eribana omũyĩsa omo byosĩ ukakola, nʼehosĩ eyo wasyalolera,

⁴ Omwami Mukulu atoke erĩhanganĩa ekĩnywa kiwe ekyo abũga busana nage, ati, Abana bawe bamateya enzira yabo, erirendera embere syage omo kwenene omo mutima wabo gosĩ, nʼomo kĩrĩmũ kyabo kyosĩ, siwendisyabula busana nawe omundu oko kĩtũmbĩ kyʼobwami kya Ĩsraelĩ.

⁵ Nawe ũnasĩ nibya ebyo Yoabũ mugala wa Zerũya anyikola, bye nʼebyo akola abakulu babiri bʼemilondo ya Ĩsraelĩ, Abĩnerĩ mugala wa Nerĩ, na Amasa mugala wa Yeterĩ, abo ĩta, nʼerĩũta omusasi wʼamalwa oko mugulu wʼobuholo, nʼerĩhĩra omusasi wʼamalwa oko mukoba wuwe owabya omo mbindi yiwe, nʼomo ngendero siwe esyabya omo bisando biwe.

⁶ Neryo Ukole ngʼamenge wawe, Suleke omutwe wuwe owali kwʼesyombwĩ eriandagalira eKũlĩmũ omo buholo.

⁷ Nĩkwa ũkangaye ebibuya oko bana ba Barzĩlaĩ Omũgĩlĩadĩ, kandi babye oko bakalira oko mesa yawe; kusangwa mobambĩkako batya omugulu nasaga Abũsaloma mugala wenyũ.

⁸ Kandi Ũlebaye Sĩmeĩ, omugala wa Gera, Omũbenyamĩna, wʼeBahũrĩmũ, ali haguma nawe, oyo wanyitsuma nʼekĩtsũmĩ kĩkalĩre ekiro naya eMahanaĩmũ; nĩkwa omugulu andagala erĩhĩndana nage eYorodanĩ, monamũlahĩrĩrya busana nʼOmwami Mukulu nyiti sĩndĩendĩsyakwĩta omo mũyalĩ.

⁹ Neryo lino sumuleke butsira lubanza, kusangwa uli mundu wʼamenge; ĩnũnasĩ ekyo wangamukola, wasyandagalĩrya omutwe wuwe owali kwʼesyombwĩ eKũlĩmũ haguma nʼomusasi.

Erihola lya Dawĩdĩ

¹⁰ Neryo Dawĩdĩ mweya abĩse-kulu buwe, neryo mwatabwa oko mũyĩ wa Dawĩdĩ.

¹¹ Nʼebiro ebyo Dawĩdĩ atabalira Ĩsraelĩ byabya myaka makũmĩ ani; eHebũronĩ mwatabala emyaka irinda, nʼe Yerũsalema mwatabala emyaka makũmĩ asatu nʼeyĩsatu.

¹² Neryo Solomono mwĩkala oko kĩtũmbĩ kyʼobwami kya tata wuwe Dawĩdĩ; nʼobwami buwe mobwahangana ndeke.

¹³ Neryo Adonĩa mugala wa Hagĩtĩ mwasa uku Batĩseba nya-Solomono. Naye mwabũga ati, Unemwasira buholo kwehĩ? Naye ati, Ni buholo.

¹⁴ Kandi mwabũga ati, Nyiri nʼekĩnywa kyʼerikubwira. Naye ati, Ego bũga.

¹⁵ Neryo mwabũga ati, Ũnasĩ ngoko bwami bwabya bwage, na Ĩsraelĩ yosĩ mobanyĩhĩra kwʼameso bati nyitabale. Nĩkwa lino obwami bwabiribinduka eribya bwa mugala wetu; kusangwa bwabya buwe erĩtsũka oko Mwami Mukulu.

¹⁶ Neryo lino ngakũbũlaya ekĩnywa kiguma; sũnyĩganaye. Naye mwamubwira ati, Ego, bũga.

¹⁷ Neryo Adonĩa mwabũga ati, Ngakũbũlaya, ũbũge nʼomwami Solomono kusangwa siangakuganira, ambe Abĩsagĩ Omũsũnamĩ abye mũkalĩ wage.

¹⁸ Na Batĩseba mwabũga, ati, Lyowene; ngandibwira omwami busana nawe.

Adonĩa akayĩbũlĩraya oluholo

¹⁹ Neryo Batĩseba mwaya eyiri omwami Solomono, erĩbũga naye busana na Adonĩa. Nʼomwami mwahangana erĩhĩndana naye, mwamũnamira, kandi mwĩkala oko kĩtũmbĩ kiwe kyʼobwami, kandi mwalayira ati baletere nyĩnya wʼOmwami yʼekĩtũmbĩ kyʼobwami; naye mwĩkala oko byala biwe byʼamali.

²⁰ Neryo Batĩseba mwabũga ati, Ngakũbũlaya ekĩnywa kyike kiguma; sũnyĩganaye. Nʼomwami mwamubwira ati, Ego, koyo wage, bũga; kusangwa sindiendikuganira.

²¹ Neryo Batĩseba mwabũga ati, Ũlĩge Abĩsagĩ Omũsũnamĩ ahabawe Adonĩa mugala wenyũ eribya mũkalĩwe.

²² Nʼomwami Solomono mwasũbĩrya mwabwira nyĩnya ati, Busana nakĩ ũkabũlaya Abĩsagĩ Omũsũnamĩ busana na Adonĩa kwehĩ? Ũmũbũlĩraye nʼobwami nibya, kusangwa ni mukulu wage; ega, busana naye na busana nʼomũhererĩ Abĩatarĩ, na busana na Yoabũ mugala wa Zerũya.

²³ Neryo omwami Solomono mwalahĩrya oko Mwami Mukulu, ati, Nyamuhanga anyikole atya, na kwilaba aho, nibya, Adonĩa amabya atalĩabũga ekĩ erĩyĩta ĩyowenewene.

²⁴ Neryo lino ngoko Mwami Mukulu aliho, Oyo wabĩrĩnyĩsĩkya, nʼerĩnyĩkalya oko kĩtũmbĩ kyʼobwami kya tata wage Dawĩdĩ, oyo wanyĩkokoteraya enyũmba, ngoko alaga, kwenene Adonĩa akandĩtwa mũnabwĩre.

²⁵ Neryo omwami Solomono mwatuma omo byala bya Benaya mugala wa Yehoyada; neryo mwamwĩta, neryo mwahola.

Abĩatarĩ akahigawa oko bũhererĩ

²⁶ Neryo omwami mwabwira omũhererĩ Abĩatarĩ ati, Ugende eAnatotĩ, omo malima wawe; kusangwa utolere erihola; nĩkwa sĩndĩendĩkwĩta mũnabwĩre, kusangwa mowaheka erĩsandũko lyʼerilagana lyʼOmukama Iye Omwami Mukulu embere sya tata wage Dawĩdĩ, kandi kusangwa mowagalwa omo byosĩ ebyo tata wage agalawamo.

²⁷ Neryo Solomono mwahiga Abĩatarĩ siabye mũhererĩ oko Mwami Mukulu, iniatoka erĩberererya ekĩnywa kyʼOmwami Mukulu ekyo abũga busana nʼekĩtũnga kya Elĩ eSĩlo.

Erĩkwa lya Yoabũ

²⁸ Nʼengulu moyahĩka uku Yoabũ; kusangwa Yoabũ iniamabikwama Adonĩa, isialitakwama Abũsoloma. Neryo Yoabũ mwatibita omo Hema yʼOmwami Mukulu, mwahamba oko mahembe wʼekiherero.

²⁹ Neryo omwami Solomono mwabwirwa ko Yoabũ abiritibita omo Hema yʼOmwami Mukulu, neryo lebaya ane hakũhĩ nʼekiherero. Neryo Solomono mwatuma Benaya mugula wa Yehoyada, ati, Ũyamwĩte.

³⁰ Na Benaya mwahĩka oko Hema yʼOmwami Mukulu, mwamubwira ati, Omwami amabũga ati, Uhuluke. Naye mwabũga ati, Iyihi; nĩkwa ngandiholera hano. Na Benaya mwaleta engulu eyo oko mwami ati, Yoabũ kwʼabũgĩre atya nʼerĩnyĩsũbĩrya atya.

³¹ Nʼomwami mwamubwira ati, Umukole ngoko alĩabũga, ũmwĩte nʼerimuta; iwatoka erĩnyĩlũsyako nʼoko kĩtũnga kya tata wage, omusasi ogo Yoabũ ũta buyira.

³² Neryo Omwami Mukulu asyasũbya omusasi wuwe oko mutwe wuwe, kusangwa ĩta bandu babiri abatunganene nʼababuya kwilaba ye, mwĩtabo omo mũyali, na tata wage Dawĩdĩ ĩsĩasĩgo, ye Abĩnerĩ mugala wa Nerĩ, omukulu wʼemilondo ya Ĩsraelĩ, na Amasa mugala wa Yeterĩ, omukulu wʼemilondo ya Yũda.

³³ Omusasi wabo kwʼasyasuba atya oko mutwe wa Yoabũ, nʼoko mutwe wʼabana buwe kera na kera. Nĩkwa uku Dawĩdĩ nʼoko bana buwe, nʼoko kĩtũnga kiwe, nʼoko kĩtũmbĩ kiwe kyʼobwami hasyabya Obuholo kera na kera bũkalũa oko Mwami Mukulu.

³⁴ Neryo Benaya mugala wa Yehoyada mwahetukirayo, mwamutsimita mwamwĩta; naye mwatabwa omo nyũmba yiwe omo mbwarara.

³⁵ Nʼomwami mwahĩra Benaya mugala wa Yehoyada omo mwanya wuwe oko milondo; nʼomwami mwahĩra omũhererĩ Zadokĩ omo mwanya wa Abĩatarĩ.

³⁶ Kandi omwami mwatuma mwabirikira Sĩmeĩ, mwamubwira ati, Ũyĩhĩmbĩre enyũmba eYerũsalema, wĩkaleyo, kandi Sugende handi.

³⁷ Kusangwa oko kiro ekyo wasyahuluka, nʼerisoka akũsĩ kʼeKĩdũronĩ, Uminye kwenene ko wasyahola kwenene; omusasi wawe asyabya oko mutwe wawe.

³⁸ Na Sĩmeĩ mwabwira omwami ati, Ekĩnywa ekĩ kyowene. Ngoko mukama wage omwami abĩrĩbũga, omugombe wawe kwʼasyakola atya. Neryo Sĩmeĩ mwĩkala eYerũsalema ebiro bingi.

Erihola lya Sĩmeĩ

³⁹ Nĩkwa emyaka ĩsatu yabere yahwa, abagombe babiri ba Sĩmeĩ mobatswa eriya ewa Akĩsĩ, mugala wa Maka, omwami wʼeGatĩ. Neryo mobabwira Sĩmeĩ, bati, Lebaya, abagombe bawe bali eGatĩ.

⁴⁰ Na Sĩmeĩ mwahangana mwasesa epunda yiwe mwaya eGatĩ ewa Akĩsĩ, erisonda-sonda abagombe buwe; kandi Sĩmeĩ mwayaleta abagombe buwe erĩlũa eGatĩ.

⁴¹ Na Solomono mwabwirwa ngoko Sĩmeĩ mwalũa eYerũsalema eriya eGatĩ, nʼerĩswahĩka kandi.

⁴² Neryo omwami mwatumira uku Sĩmeĩ, neryo mwamubwira ati, Mondakũlahĩrĩrya oko Mwami Mukulu, nʼerĩkũtũlĩrago nyiti, Uminye kwenene ekiro wasyahuluka nʼeriya ehandi hosĩ, ko wasyahola kwenene; nawe mowambwira uti, Ekĩnywa namowa kyowene.

⁴³ Busana nakĩ sũlĩtateya erĩlahĩrya lyʼOmwami Mukulu nʼekihano ekyo nakuhana kwehĩ?

⁴⁴ Kandi omwami mwabwira Sĩmeĩ ati, Ũnasĩ ebibi byosĩ ebyo mutima wawe abĩkĩre, ebyo wakola tata wage Dawĩdĩ. Busana nʼekyo, Omwami Mukulu asyasũbya ebibi byawe oko mutwe wawe.

⁴⁵ Nĩkwa omwami Solomono asyatsumulwa, nʼekĩtumbĩ kyʼobwami kya Dawĩdĩ kyasyasĩkĩbwa embere syʼOmwami Mukulu ebiro byosĩ.

⁴⁶ Neryo omwami mwahamula Benaya mugala wa Yehoyada; naye mwahuluka mwamwĩta, neryo mwahola. Nʼobwami mobwahangana omo byala bya Solomono.