1 Abami 19 - AMASAKO ABOYTRTRE WA NYAMUHANGA AWAKAHULAWA MO BIBLIA

Elĩya akasaga Yezebelĩ

¹ Neryo Ahabũ mwabwira Yezebelĩ ebyosĩ ebyo Elĩya akola, ngoko ĩta abamĩnyererĩ bʼomo mũyalĩ.

² Neryo Yezebelĩ mwatuma omukwenda uku Elĩya, ati, Esyonyamuhanga sinyikole ekĩ, na kwilaba aho namatindayira engebe yawe eribya ngʼengebe yʼomuguma wa kubo, omo ngyakya oko ndambĩ ngʼeno.

³ Neryo Elĩya mubaha, mwahangana, mwasagya engebe yiwe, mwahĩka eBerĩ-seba, ye Yũda, neryo mwasĩga omugombe wuwe yʼeyo.

⁴ Nĩkwa ye Elĩya mwagenda olugendo lwʼekiro kiguma omo mbwarara, mwasa mwĩkala omo ndĩna yʼomuti wʼomusasa; neryo mwabũlya ati ahole, ati, Bingaho; lino uwe Mwami Mukulu ũlũsaye engebe yage; kusangwa Sindi mubuya kwilaba abotata-kulu bage.

⁵ Neryo mwagotsera ahisi omo ndĩna yʼomusasa; neryo lebaya, omũlaĩka mwamubandako, mwamubwira ati, Hangana, ulye.

⁶ Naye mwalangira, neryo, lebaya, hakũhĩ nʼomutwe wuwe ihali akatole akokĩrye oko makala, nʼekisya kyʼamagetsi. Neryo mwalya, nʼerĩpũlya mwaswagotsera ahisi.

⁷ Nʼomũlaĩka wʼOmwami Mukulu mwasa engendo yʼakabiri, mwamubandako, mwabũga ati, Hangana, ulye, kusangwa Ukandigenda olugendo luli olũkũlengĩre.

⁸ Neryo Elĩya mwahangana mwalya mwapũlya, mwagenda omo maka wʼebyalya ebyo, ebiro nʼemisibo makũmĩ ani erĩhĩka eHorebũ, ekitwa kya Nyamuhanga.

⁹ Neryo mwahĩka omo mwangalũ, mwagotseraho; neryo lebaya, ekĩnywa kyʼOmwami Mukulu mokyamũhĩkako, mwamubwira ati, Elĩya, ukakola hano hokĩ kwehĩ?

¹⁰ Naye mwabũga ati, Nabiribya nʼobũha bunene busana nʼOmwami Mukulu, Nyamuhanga Wʼemilondo; kusangwa abana ba Ĩsraelĩ babĩrĩsĩganĩa endagano yawe, nʼerĩterya ebiherero byawe, nʼerĩĩta abamĩnyererĩ bawe bʼomo mũyalĩ; nage, ĩngye nyĩkĩnasĩya; kandi bakasondaya engebe yage erĩnyĩta.

¹¹ Neryo Omwami Mukulu mwabũga ati, Huluka, wimane oko kitwa embere syʼOmwami Mukulu. Neryo, lebaya, Omwami Mukulu abya akalaba! Nʼerihunga lĩnene lyʼamaka molyatula ebitwa, nʼeritulanga amabwe mo bihandebihande embere syʼOmwami Mukulu; nĩkwa Omwami Mukulu siabya omwʼihunga. Nʼenyũma wʼerihunga omũsĩkĩ; nĩkwa Omwami Mukulu siabya omo mũsĩkĩ.

¹² Nʼenyũma wʼomũsĩkĩ omuliro; nĩkwa Omwami Mukulu siabya omo muliro; nʼenyũma wʼomuliro omulenge muke owahehere.

¹³ Neryo, omugulu Elĩya owago, mwaswika obũsũ buwe omo syongimba siwe, mwahuluka, mwahangana omo lũkyo lʼomwangalũ. Neryo lebaya, omulenge mwamũhĩkako, owabũga ati, Elĩya, ukakola hano hokĩ kwehĩ?

¹⁴ Naye mwabũga ati, Nabiribya nʼobũha bunene busana nʼOmwami Mukulu, Nyamuhanga Wʼemilondo; kusangwa abana ba Ĩsraelĩ babĩrĩsĩganĩa endagano yawe, nʼerĩterya ekiherero kyawe, nʼerĩĩta abamĩnyererĩ bawe bʼomo mũyalĩ. Nage ĩngyowene, nabĩrĩsĩgala; kandi bakasondaya engebe yage, erĩlũsyayo.

¹⁵ Neryo Omwami Mukulu mwamubwira ati, Ugende, usube omo nzira yawe omo mbwarara yʼeDamaseke; nʼomugulu wamabĩhĩka, ũhakabaye Hazaelĩ yʼamagũta eribya mwami oko Sũrĩa.

¹⁶ Na Yehũ mugala wa Nĩmsĩ, wasyamũhakabya amagũta eribya mwami wʼAbaĩsraelĩ; na Elĩsa mugala wa Safatĩ wʼeAbelĩmehola, wasyamũhakabya amagũta eribya mũminyererĩ omo mwanya wawe.

¹⁷ Neryo kyasyabya, oyukabala oko mũyalĩ wa Hazaelĩ, Yehũ asyamwĩta; nʼoyukabala oko mũyalĩ wa Yehũ, Elĩsa asyamwĩta.

¹⁸ Nĩkwa nasyayĩsĩgĩra omo Ĩsraelĩ abandu elfu irinda (7,000), amarwĩ wʼabo abatetakũkamira Baalĩ, nʼobuli buno obutamulyatsirira.

Elĩya akasĩgĩra Elĩsa yʼolukimba luwe

¹⁹ Neryo mwalũayo, mweya Elĩsa mugala wa Safatĩ iniakalima omo syongomo syʼesyonume syʼesyonde ĩkũmĩ nʼĩbĩrĩ embere siwe, naye abya haguma nʼeyʼerĩkũmĩ nʼesĩbĩrĩ; na Elĩya mwahĩka aho ali, mwamugusa kwʼerĩkotĩ riwe.

²⁰ Neryo Elĩsa mwasĩganĩa esyonume syʼesyonde, mwatibita akakwama Elĩya, mwabũga ati, Ngakũbũlaya nyiti uleke, natayalyatsirira tata na koyo, neryo inakukwama. Naye mwamubwira ati, Subula; kusangwa namatakukolakĩ kwehĩ?

²¹ Neryo mwasubula, kandi mwĩmya engomo yʼesyonume syʼesyonde, mwakera esyonde esyo, mwahũka esĩswĩ syasyo omo miti eyo yʼesyonde, esikalima, mwahasyo oko bandu, mobalya. Neryo mwahangana mwakwama Elĩya, nʼerimukolera.