1 Abami 18 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Neryo enyũma wʼebiro bingi, ekĩnywa kyʼOmwami Mukulu mokyahĩka uku Elĩya, oko mwaka wʼakasatu, kiti, Ugende, ũyĩkangaye uku Ahabũ; nage ngandituma embũla oko kihugo.

² Neryo Elĩya mwayayĩkangya uku Ahabũ. Nʼenzala yabya ĩkalĩre eSamarĩa.

³ Na Ahabũ mwabirikira Obadĩa, oyo wabya mukulu wʼenyũmba. Nĩkwa Obadĩa abya iniakakenga Omwami Mukulu yo kutsibu;

⁴ kusangwa omugulu Yezebele ĩta abamĩnyererĩ bʼOmwami Mukulu, Obadĩa mwatwala abamĩnyererĩ erĩgana mwabĩsabo mo makũmĩ atanu-atanu omo mwangalũ, mwalĩsyabo akalyo nʼamagetsi.

⁵ Neryo Ahabũ mwabwira Obadĩa ati, Ulabe omo kihugo kyosĩ, erĩhĩka oko syongũnũnũko syosĩ syʼamagetsi, nʼoko hyũsĩ hyosĩ; kwamũhwa twangabana ebiti nʼerĩlamya esyosabayĩrĩ nʼesyonyumbu sibyeho, ĩsĩtwangatalya esyonyama syosĩ.

⁶ Neryo mobagaba ekihugo omo katĩkatĩ kabo erilaba mukyo ekyosĩ; Ahabũ mwalola omo nzira yiwe mwʼĩyowene, na Obadĩa mwalola omo yindi nzira mwʼĩyowene.

⁷ Neryo omugulu Obadĩa abya omo nzira, lebaya, Elĩya mwahĩndana naye, na Obadĩa mwamuminya, mwamũnamira ahisi, mwabũga ati, Nina we, omukama wage Elĩya kwehĩ?

⁸ Elĩya mwamũsũbĩrya ati, Nĩna ngye; ugende Ubwire omukama wawe uti, Lebaya, Elĩya ane hano.

⁹ Naye mwabũga ati, Ko namahalya ũkũkĩ uti wangahĩra omugombe wawe omo byala bya Ahabũ erĩnyĩta kwehĩ?

¹⁰ Ngoko Mwami Mukulu Nyamuhanga wawe aneho, sihali ekihanda kutse bwami aho mukama atetatuma erikũsondya; nʼomugulu babũga bati, Siali hano, mwalahĩrĩrya obwami obo nʼekihanda ekyo, bati sibetakubana.

¹¹ Neryo lino ũkabũga uti Genda, Ubwire omukama wawe uti, Lebaya, Elĩya ali hano.

¹² Neryo omugulu namabĩkũsĩga, Omũlĩmũ wʼOmwami Mukulu akandikutwala eyo ndasĩ; neryo omugulu namabiyabwira Ahabũ, naye amatendikubana, asyanyĩta; nĩkwa ĩngye mugombe wawe ngakenga Omwami Mukulu erĩtsũka omo bũlwana bwage.

¹³ Omukama wage mutabwirwa ebyo nakola omugulu Yezebelĩ ĩta abamĩnyererĩ bʼOmwami Mukulu kwehĩ, ngoko nabĩsa abamĩnyererĩ bʼOmwami Mukulu abandu erĩgana, mo makũmĩ atanu-atanu omo mwangalũ, kandi monahabo akalyo nʼamagetsi.

¹⁴ Na lino ũkabũga uti, Ugende, Ubwire omukama wawe uti, Lebaya, Elĩya ali hano; naye akandĩnyĩta.

¹⁵ Neryo Elĩya mwabũga ati, Ngoko Mwami Mukulu Wʼemilondo aneho, nage nyimene embere siwe, kwenene ngandĩyĩkangya ukwʼiye mũnabwĩre.

¹⁶ Neryo Obadĩa mwayahĩndana na Ahabũ, mwamubwira; na Ahabũ mwayahĩndana na Elĩya.

¹⁷ Neryo omugulu Ahabũ alola uku Elĩya, Ahabũ mwamubwira ati, Nina we embandanganĩa ya Ĩsraelĩ kwehĩ?

¹⁸ Naye mwasũbĩrya ati, Sĩndĩtagalya Ĩsraelĩ; nĩkwa ni we nʼekĩtũnga kya tata wawe, kusangwa wabĩrĩsĩganĩa ebihano byʼOmwami Mukulu, kandi wabirikwama Baalĩ.

¹⁹ Nĩkwa lino Utume, Ũnyĩhĩndanĩraye Abaĩsraelĩ bosĩ oko kitwa kyʼeKarmelĩ, nʼabamĩnyererĩ ba Baalĩ amagana ani nʼamakũmĩ atanu (450), nʼabamĩnyererĩ ba Asera magana ani (400), abakalira oko mesa ya Yezebelĩ.

Elĩya akasĩnga abamĩnyererĩ ba Baalĩ

²⁰ Neryo Ahabũ mwatumira oko bana bʼeĨsraelĩ bosĩ, mwahĩndanĩa abamĩnyererĩ oko kitwa kyʼeKarmelĩ.

²¹ Neryo Elĩya mwayĩtũnda hakũhĩ nʼabandu bosĩ, mwabũga nabo ati, Mwasyakolyahi eritika-tika oko mbande ĩbĩrĩ? Omwami Mukulu amabya ali Nyamuhanga, mumukwame; nĩkwa amabya ĩnĩ Baalĩ, mumukwame. Nʼabandu mobatamũsũbĩrya ekĩnywa nʼekiguma.

²² Neryo Elĩya mwabwira abandu ati, Ingye, ĩngyowene namasĩgala mo mũmĩnyererĩ wʼOmwami Mukulu; nĩkwa abamĩnyererĩ ba Baalĩ ni bandu magana ani nʼamakũmĩ atanu.

²³ Neryo batuhe esyonume ĩbĩrĩ syʼesyonde; kandi bayisoge enume yʼende nguma busana nabo, batweyo mo tuhindi-tuhindi bahĩreyo oko syongwĩ, kandi sĩbahĩre omuliro gʼomwisi; nage ngandikera eyindi nume, nʼerĩhĩrayo oko syongwĩ, butsira erĩhĩra omuliro omwisi.

²⁴ Nenyũ mulakire erĩna lya nyamuhanga wenyũ, nage ngandilakira erĩna lyʼOmwami Mukulu; na Nyamuhanga oyũkasũbĩraya omo muliro, oyo abye Nyamuhanga. Nʼabandu bosĩ mobasũbĩrya bati, Amabũga ndeke.

²⁵ Neryo Elĩya mwabwira abamĩnyererĩ ba Baalĩ ati, Muyisoge enume yʼende nguma busana nenyũ, mũtsũke erikerayo; kusangwa muli bangi; mulakire erĩna lya nyamuhanga wenyũ, nĩkwa sĩmũhĩre omuliro gʼomwisi.

²⁶ Neryo mobahamba enume yʼende eyo bahabawa, mobakerayo, mobabirikira oko lĩna lya Baalĩ erĩtsũka omo ngyakya-ngyakya erĩhika omwʼitungi, bati, Uwe Baalĩ Ũtowe. Nĩkwa mohatabya omulenge, kutse oyũkasũbĩraya. Neryo mobayisumbanga bakatĩmba-tĩmba oko kiherero ekyo bakokotaya.

²⁷ Neryo oko mugulu wʼeritungi, Elĩya mwatenyera kubo, ati, Mulake kutsibu kusangwa ni nyamuhanga; mbino ali oko mũbĩrĩ, kutse alũĩreho, kutse ali oko lugendo, kutse kwamũhwa agotsere neryo angabũkĩbwa.

²⁸ Neryo mobalaka kutsibu mobayibandanga omo mihamba nʼomo matũmo, ngʼemitsye yabo erĩhĩka aho musasi alũĩra kubo.

²⁹ Neryo omugulu eritungi lyamabilaba, mobalaka erĩhĩka oko buhere bwʼerigolo-golo; nĩkwa sihabya omulenge kutse oyũkasũbĩraya, kutse oyukatsomana.

Erĩkwa lyʼabamĩnyererĩ ba Baalĩ

³⁰ Neryo Elĩya mwabwira abandu bosĩ ati, Musegere hakũhĩ nage; nʼabandu bosĩ mobasegera hakũhĩ naye. Neryo mwasũbya ekiherero kyʼOmwami Mukulu ahaterĩbawa ahisi.

³¹ Neryo Elĩya mwĩmya amabwe erĩkũmĩ nʼawabiri ngʼemiganzo yʼebihanda byʼabagala ba Yakobo, oyo ekĩnywa kyʼOmwami Mukulu kyahĩkako, kiti, Erĩna lyawe lyasyabya Ĩsraelĩ.

³² Neryo Elĩya mwahĩmba omo mabwe ayo mwʼekiherero omo lĩna lyʼOmwami Mukulu; neryo mwatakula omugende owatĩmbĩre oko kiherero, obunene bwago bwangahamba ndengĩ ĩbĩrĩ syʼembuto.

³³ Neryo Elĩya mwatondeka esyongwĩ, neryo mwatsũtsanga enume yʼende mo bihande-bihande mwahĩrayo oko syongwĩ. Neryo mwabũga ati, Mũsũlaye amalega ani mwʼamagetsi mũtangego oko buhere bwʼerĩokererya, nʼendata oko syongwĩ.

³⁴ Neryo Elĩya mwabũga ati, Mukolekyo engendo yʼakabiri, nabo mobakolakyo engendo yʼakabiri. Neryo mwabũga ati, Muswekolakyo engendo yʼakasatu. Nabo mobakolakyo engendo yʼakasatu.

³⁵ Nʼamagetsi mwasendera omo ndambi syʼekiherero; neryo mũsũlya amagetsi gʼomo mugende nibya.

³⁶ Neryo omugulu wʼobuhere bwʼerĩgolo-golo, omũmĩnyererĩ Elĩya mwahĩka hakũhĩ, mwabũga ati, Omwami Mukulu, Nyamuhanga wa Abrahamũ, nʼowa Ĩsaka nʼowa Ĩsraelĩ, kiminyikale mũnabwĩre kʼuli Nyamuhanga wʼAbaĩsraelĩ, kandi ko ndi mugombe wawe, kandi ngoko nabirikola emyatsi yosĩ eyĩ omo bĩnywa byawe.

³⁷ Uwe Mwami Mukulu, ũnyowe, abandu aba batoke eriminya ngoko uwe, Mwami Mukulu, uli Nyamuhanga, nʼakandi ngoko wabiribindula omutima wabo erisubula.

³⁸ Neryo omuliro wʼOmwami Mukulu mwatoga mwahĩsĩrĩrya obuhere bwʼerĩokererya, nʼesyongwĩ nʼamabwe, nʼolũtũtũ, kandi mwalyatsirira amagetsi awabya omo mugende.

³⁹ Nʼomugulu abandu bosĩ balangirakyo mobawa ahisi oko mũsũ wabo; mobabũga bati, Omwami Mukulu yo na Nyamuhanga; Omwami Mukulu yo na Nyamuhanga.

⁴⁰ Neryo Elĩya mwabwirabo ati, Muhambe abamĩnyererĩ ba Baalĩ; simuleke nʼomuguma akabala. Neryo mobahambabo; na Elĩya mwandagalĩryabo oko kũsĩ kʼeKĩsonĩ, mwĩtĩrabo aho.

⁴¹ Neryo Elĩya mwabwira Ahabũ ati, Uhetuke, ulye, Ũpũlaye; kusangwa hali mulenge wʼembũla nyingi.

⁴² Neryo Ahabũ kwʼahetũka atya akayalya nʼerĩpũlya. Elĩya naye mwahetukira endata oko kitwa kyʼeKarmelĩ; neryo mwatũlama oko kitaka mwahĩra obũsũ buwe omo katĩkatĩ kʼamarwĩ wuwe.

⁴³ Neryo mwabwira omugombe wuwe ati, Uhetuke lino erĩrebya oko luhande lwʼengetsi. Neryo mwahetuka, mwalebya, mwabũga ati Sihali kindu. Neryo mwabũga ati, Uyeyo kandi, esyongendo sirinda.

⁴⁴ Neryo oko ngendo yʼakalinda, mwabũga ati, Lebaya, ekĩtũ kyike kĩkalũa omo ngetsi, ekyike ekingana nʼebyala byʼomundu. Neryo mwamubwira ati, Uhetuke Ubwire Ahabũ uti, Ũtegekanaye egalĩ yawe, Wandagale embũla sĩyĩkũlĩbĩraye.

⁴⁵ Neryo oko katambĩ kake, olubula molwakĩna omo bĩtũ nʼerihunga, neryo embũla nene, moyawa. Na Ahabũ mwagenda oko galĩ yiwe mwaya oko Yezreelĩ.

⁴⁶ Nʼebyala byʼOmwami Mukulu mobyabya uku Elĩya, neryo mwaboha embindi yiwe mwatibita embere sya Ahabũ mwamutanga erĩhĩka eYezreelĩ.