1 Abami 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Elĩya akabwira Ahabũ engulu yʼenzala

¹ Neryo Elĩya Omũtĩsĩbe ogʼoko babunga bʼeGĩleadĩ, mwabwira Ahabũ ati, Ngoko Mwami Mukulu Nyamuhanga wʼeĨsraelĩ aneho, Oyo nyimene embere siwe, sihendisyabya ekimi kutse embũla oko mĩtũta eyĩ, butsira oko kĩnywa kyage.

² Neryo ekĩnywa kyʼOmwami Mukulu mokyamũhĩkako kiti,

³ Ũlũe hano, ulole ebwanga bwʼendata, ũyĩbĩse oko mũsĩke wʼakũsĩ kʼeKerĩtĩ, akali endata oko Yorodanĩ.

⁴ Neryo kyasyabya ĩnũkapũlaya oko kũsĩ ako; nage nabirihana ebikororo erĩkũlĩsĩrya aho.

⁵ Neryo Elĩya mwagenda atya mwakola ngʼekĩnywa kyʼOmwami Mukulu; kusangwa mwayĩkala hakũhĩ nʼakũsĩ Kerĩtĩ, akali endata oko Yorodanĩ.

⁶ Nʼebikororo mobyamuletera obundu nʼeyĩswĩ omo ngyakyangyakya, nʼobundu nʼeyĩswĩ omwʼĩgologolo; neryo mwabya akapũlya oko kũsĩ.

⁷ Neryo enyũma wʼaho, akũsĩ mokuma, kusangwa isihali mbũla omo kihugo.

Elĩya akaya eZarefatĩ

⁸ Neryo ekĩnywa kyʼOmwami Mukulu mokyamũhĩkako, kiti,

⁹ Uhangane, uye eZarefatĩ, omũyĩ wʼeSĩdonĩ, wĩkaleho; lebaya, nabirihamula omũkwakalĩ erĩkũlĩsya eyo.

¹⁰ Neryo mwahangana atya mwagenda eZarefatĩ; neryo abere ahĩka oko lũkyo lʼomũyĩ, kwesĩ omũkwakalĩ inianemusenyeraho; neryo Elĩya mwamubirikira, mwamubwira ati, Ngakũbũlaya nyiti unyendere otugetsi omo lĩtambya nyĩpũlaye.

¹¹ Neryo abere akagenda eriyaletago, mwamubirikira ati, ngakũbũlaya nyiti unyiretere akahande kʼobundu omo byala byawe.

¹² Nĩkwa omũkalĩ mwabũga ati, Ngoko Mwami Mukulu Nyamuhanga wawe aneho, singwite akatole, nĩkwa erĩkĩnda iguma lyʼeyĩsyano omwʼĩrega, nʼotũgũta tuke omwʼĩtambya; kandi lebaya ngakumakuma otũkwe tubiri, inatoka eriingira nʼeritsumbayo busana nage nʼomugala wage, itwatoka eriryabo itwahola.

¹³ Neryo Elĩya mwamubwira ati, Sigubahe, ugende Ukole ngoko wamabũga; nĩkwa Ũtsũke erinyitsumbira akatole, nʼerinyireterako nʼenyũma wʼaho ukandiyitsumbira nʼomugala wawe.

¹⁴ Kusangwa Omwami Mukulu Nyamuhanga wa Ĩsraelĩ, ati, Erĩrega lyʼeyĩsyano siryendisyakeha, kutse erĩtambya lyʼamagũta siryendisyahwa gomo, erĩhĩka oko kiro Omwami Mukulu asyatuma embũla oko kihugo.

¹⁵ Neryo mwagenda mwakola ngoko Elĩya abũga; neryo iye haguma nʼenyũmba yiwe, mobalya biro bingi.

¹⁶ Nʼeyĩsyano omwʼĩrega moyitakeha, kutse amagũta omwʼĩtambya mwatakeha ngʼekĩnywa kyʼOmwami Mukulu, ekyo abũga uku Elĩya.

Elĩya akasũbaya omugala wʼomũkwakalĩ

¹⁷ Neryo enyũma wʼemyatsi eyĩ, omugala wʼomũkalĩ Omwenye nyũmba mwalwala; nʼendwala yiwe moyakala, neryo mwataswahumula.

¹⁸ Neryo omũkalĩ mwabwira Elĩya ati, Uwe mundu wa Nyamuhanga, nĩkĩ omo katĩkatĩ ketu tunawe kwehĩ? Wabiriasa erireta erĩyĩbũkya ebibi byage, nʼerĩĩta mugala wage!

¹⁹ Neryo Elĩya mwamubwira ati, Umba mugala wawe. Naye mwamũlũsya oko kĩkũba kiwe mwamutwala omo kyumba kyʼendata aho abya akĩkala, nʼerĩmũhĩra oko ngyingo yiwe.

²⁰ Neryo mwalakira Omwami Mukulu ati, Uwe Mwami Mukulu Nyamuhanga wage, ko wabirireta ebibi oko mũkwĩrwa oyo nyĩkere naye erĩĩta mugala wuwe kwehĩ?

²¹ Neryo Elĩya mwayilungika oko mwana ngendo ĩsatu, neryo mwalakira Omwami Mukulu ati, Uwe Mwami Mukulu Nyamuhanga wage, ngakusaba nyiti, ũsũbaye ekĩrĩmũ kyʼomwana oyũ omwisi siwe kandi.

²² Neryo Omwami Mukulu mwowa omulenge wa Elĩya; nʼekĩrĩmũ kyʼomwana mokyamusubako, mwasuba.

²³ Neryo Elĩya mwĩmya omwana oyo mwamwandagalya erĩlũa omo kyumba ekyo erĩmũhĩkya omo nyũmba, mwamuha koyo wuwe; na Elĩya mwabũga ati, Lebaya, mugala wawe aneho.

²⁴ Nʼomũkalĩ mwabwira Elĩya ati, Lino namaminya kʼuli mundu wa Nyamuhanga, kandi kwʼekĩnywa kyʼOmwami Mukulu omo buno bwawe ni kwenene.