1 Abami 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Abĩyamũ akatabala eYũda

¹ Neryo omo mwaka wʼerĩkũmĩ nʼomunani wʼOmwami Yeroboamũ mugala wa Nebatĩ, Abĩyamũ mwatsũka eritabala oko Yũda.

² Mwatabala emyaka ĩsatu eYerũsalema; nʼerĩna lya nyĩnya wuwe lyabya Maaka mwali wa Abĩsalomĩ.

³ Kandi Abĩyamũ mwalendera omo bibi byosĩ bya tata wuwe, ebyo akola embere siwe; nʼomutima wuwe mwatakwama ndeke oko Mwami Mukulu Nyamuhanga wuwe, ngʼomutima wa Dawĩdĩ tata wuwe.

⁴ Nĩkwa busana na Dawĩdĩ, Omwami Mukulu mwamuha etala eYerũsalema, erĩhanganĩa mugala wuwe enyũma siwe, nʼerĩsĩkya eYerũsalema;

⁵ kusangwa Dawĩdĩ mwakola ekitunganene omo meso wʼOmwami Mukulu mwatakitira ehandi erĩsĩga kindu nʼekiguma oko byosĩ amuhana ebiro byosĩ byʼeribyaho liwe, go nʼomwatsi wa Ũrĩa Omũhĩtĩ.

⁶ Neryo mohabya amalwa omo katĩkatĩ ka Rehoboamũ na Yeroboamũ ebiro byosĩ byʼeribyaho liwe.

Oluholo lwa Abĩyamũ

⁷ Nʼeyindi mĩbĩrĩ ya Abĩyamũ, nʼebyosĩ akola, sĩbĩsakĩre omo kitabu kyʼemyatsi yʼabami ba Yũda kwehĩ? Neryo mohabya amalwa omo katĩkatĩ ka Abĩyamũ na Yeroboamũ.

⁸ Na Abĩyamũ mweya abĩse-kulu buwe; mobamuta omo mũyĩ wa Dawĩdĩ; nʼomugala wuwe Asa mwabya mwami omo mwanya wuwe.

Asa akatabala omo mwanya wa Abĩyamũ

⁹ Nʼoko mwaka wʼamakũmĩ abiri wa Yeroboamũ omwami wa Ĩsraelĩ, Asa mwatsũka eritabala oko Yũda.

¹⁰ Mwatabala myaka makũmĩ ani nʼomuguma eYerũsalema; nʼerĩna lya nyĩnya wuwe lyabya Maaka mwali wa Abĩsalomĩ.

¹¹ Neryo Asa mwakola ebyabya bitunganene omo meso wʼOmwami Mukulu ngoko Dawĩdĩ tata wuwe akola.

¹² Neryo mwahiga abamalaya bʼesyonyamuhanga erĩlũa omo kihugo, kandi mwalũsya nʼesyosanamu syosĩ esyo abotata wuwe bakokotaya.

¹³ Kandi mwalũsya Maaka nyĩnya wuwe okwʼibya mugole; kusangwa ĩnĩabĩrĩkokotya esanamu yʼesyonye busana na Asera; neryo Asa mwakondera ahisi esanamu yiwe, mwahĩsĩryayo oko kũsĩ kʼeKĩdũronĩ.

¹⁴ Nĩkwa ahendata mohatalũsĩbwaho; nĩkwa omutima wa Asa abya akwamĩre ndeke Omwami Mukulu oko biro byosĩ biwe.

¹⁵ Neryo mwaleta omo nyũmba yʼOmwami Mukulu mwʼebindu ebyo tata wuwe ahigula, nʼebindu ebyo iye ahigula, ebĩtsĩpa nʼesyamagetsi, nʼebindu.

¹⁶ Kandi mohabya amalwa omo katĩkatĩ ka Asa na Baasa omwami wʼAbaĩsraelĩ ebiro byosĩ byabo.

¹⁷ Neryo Baasa omwami wʼAbaĩsraelĩ mwahetuka eriyalwa na Yũda, mwahĩmba eRama iniatoka erĩkakĩrya omundu erĩlũayo nʼeriingirayo erĩhĩka uku Asa omwami wʼeYũda.

¹⁸ Neryo Asa mwaheka ebĩtsĩpa nʼesyamagetsi byosĩ ebyasaka omo bigona byʼenyũmba yʼOmwami Mukulu nʼebigona byʼenyũmba yʼomwami, mwahĩrabyo omo byala byʼabagombe buwe; neryo omwami Asa mwatumabo uku Benĩ-Hadadĩ, mugala wa Tabrĩmonĩ mugala wa Hezĩonĩ, omwami wʼeSũrĩa oyo wabya ĩkere eDamaseke, ati,

¹⁹ Habye endagano omo katĩkatĩ kage nawe, nʼomo katĩkatĩ ka tata wage na tata wawe; lebaya, nabirikutumira oluhembo lwʼebĩtsĩpa nʼesyamagetsi; ugende ũtwe endagano yawe haguma na Baasa omwami wa Ĩsraelĩ, anyĩlũeko.

²⁰ Na Benĩ-Hadadĩ mwahulikirira omwami Asa, neryo mwatuma abakulu bʼemilondo yiwe erilwa nʼemĩyĩ ya Ĩsraelĩ, neryo mwakĩnda Ĩjonĩ, na Danĩ, na Abel-betĩ-maka, na Kĩnarotĩ hosĩ, haguma nʼekihugo kyosĩ kya Nafũtalĩ.

²¹ Neryo omugulu Baasa owago, mwaleka erĩhĩmba eRama, mwĩkala eTĩrza.

²² Neryo omwami Asa mwatũlaganĩa oko Yũda yosĩ; mohatabya nʼomuguma wasĩgala, neryo mobaheka amabwe wʼeRama, nʼemiti yago, ebyo Baasa ahĩmbamo; neryo Asa mwahĩmba eGeba wa Benyamĩna, nʼeMĩsĩpa.

Oluholo lwa Asa

²³ Nʼeyindi mĩbĩrĩ yosĩ ya Asa, nʼamaka wuwe gosĩ, nʼebyosĩ akola, nʼemĩyĩ eyo ahĩmba, sĩbĩsakĩre omo kitabu kyʼemyatsi yʼabami ba Yũda kwehĩ? Nĩkwa oko mugulu wʼobũsyakulu buwe mwalwala omo bisando biwe.

²⁴ Na Asa mweya abotata-kulu buwe, mwatabwa haguma nʼabotata-kulu buwe omo mũyĩ wa Dawĩdĩ tata wuwe; na Yehosafatĩ mugala wuwe mwatabala omo mwanya wuwe.

Nadabũ akatabala oko Ĩsraelĩ

²⁵ Neryo Nadabũ mugala wa Yeroboamũ mwatsũka eritabala oko Baĩsraelĩ omo mwaka wʼakabiri wa Asa omwami wa Yũda; mwatabala oko Baĩsraelĩ emyaka ĩbĩrĩ.

²⁶ Naye mwakola ekyabya kibi omo meso wʼOmwami Mukulu, mwagendera omo nzira ya tata wuwe, nʼomo bibi biwe ebyo akolesaya Abaĩsraelĩ.

²⁷ Na Baasa mugala wa Ahĩya wʼekĩtũnga kya Ĩsakarĩ, mwaya embĩta yʼerĩmwĩta; neryo Baasa mwamwĩtĩra eGĩbetonĩ ewʼAbafĩlĩstĩnĩ; omugulu Nadabũ na Ĩsraelĩ yosĩ babya bakagotera eGĩbetonĩ.

²⁸ Nʼomo mwaka wʼakasatu wa Asa omwami wʼeYũda, Baasa mwĩta Nadabũ neryo mwatabala omo mwanya wuwe.

²⁹ Neryo Baasa abere abibya mwami, mwĩta ekĩtũnga kyosĩ kya Yeroboamũ; mwatasĩgĩra Yeroboamũ nʼomuguma oyukahumula, erĩhĩka aho abĩrĩheryabo, ngʼekĩnywa kyʼOmwami Mukulu ekyo abũga nʼomugombe wuwe Ahĩya Omũsĩlonĩ.

³⁰ Kandi busana nʼebibi bya Yeroboamũ ebyo akola, nʼebyo akolesaya Abaĩsraelĩ, busana nʼerĩagalĩranĩa eryo lyaleka Omwami Mukulu Nyamuhanga wʼAbaĩsraelĩ iniahitana.

³¹ Nʼeyindi mĩbĩrĩ ya Nadabũ, nʼebyosĩ akola sĩbĩsakĩre omo kitabu kyʼemyatsi yʼabami bʼAbaĩsraelĩ kwehĩ?

³² Neryo mohabya amalwa omo katĩkatĩ ka Asa na Baasa omwami wʼAbaĩsraelĩ oko biro byosĩ byabo.

³³ Nʼomo mwaka wʼakasatu wa Asa omwami wʼeYũda, Baasa mugala wa Ahĩya mwabya mwami oko Baĩsraelĩ bosĩ eTĩrza, kandi mwatabala emyaka makũmĩ abiri nʼeyĩnĩ.

³⁴ Neryo mwakola ekyabya kibi omo meso wʼOmwami Mukulu, mwalendera omo nzira ya Yeroboamũ omo kibi kiwe ekyo akosesayamo Abaĩsraelĩ.