1 Abami 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũmĩnyererĩ akakunga Yeroboamũ

¹ Neryo, mohahuluka omundu wa Nyamuhanga akalũa eYũda busana nʼekĩnywa kyʼOmwami Mukulu nʼerĩhĩka eBetelĩ omugulu Yeroboamũ abya iniahangene hakũhĩ nʼekiherero erĩhĩsya obukwa.

² Neryo omundu oyo mwabirikirira ekiherero omo kĩnywa kyʼOmwami Mukulu ati, Uwe kiherero, uwe kiherero, Omwami Mukulu ati, Lebaya, omugala asyabutwa busana nʼekĩtũnga kya Dawĩdĩ, erĩna liwe yo Yosĩa; nʼukʼuwe hasyahongerwa abahererĩ bʼahendata abakahĩsaya obukwa ukʼuwe, nʼamakũha wʼabandu basyahĩsĩrĩryago endata kuwe.

³ Neryo mwaha ekiminyikalo oko kiro ekyo, ati, Ekĩ kye kiminyikalo ekyo Mwami Mukulu abĩrĩbũga: lebaya, ekiherero kyasyatulika nʼerĩbũ eriri endata kukyo lyasyũtĩkĩra ahisi.

⁴ Neryo, omugulu omwami owa ebĩnywa byʼomundu wa Nyamuhanga, ebyo abirikirira oko kiherero eBetelĩ, neryo Yeroboamũ mwasumba ebyala biwe oko kiherero ati, Mumuhambe. Nĩkwa ebyala biwe ebyo amũkanganayamo mobyumirira, mwatatoka erĩyĩsũbya byoko.

⁵ Nʼekiherero mokyatulika, nʼerĩbũ molyũtĩkĩra ahisi rĩkalũa omo kiherero, ngʼekiminyikalo ekyo mundu wa Nyamuhanga ahula busana nʼekĩnywa kyʼOmwami Mukulu.

⁶ Nʼomwami mwasũbĩrya, mwabũga nʼomundu wa Nyamuhanga ati, Ũbũlaye lino eriganyira lyʼOmwami Mukulu Nyamuhanga wawe, kandi unyisabire, ebyala byage binyisubeko. Nʼomundu wa Nyamuhanga mwasaba Omwami Mukulu, nʼebyala byʼomwami mobyamusubako mobyabya ngoko byabya erĩmbere.

⁷ Nʼomwami mwabwira omundu wa Nyamuhanga ati, Wase omwage haguma nage, ũyĩhabũkaye, nage ngandikuhemba.

⁸ Neryo omundu wa Nyamuhanga mwabwira omwami ati, Nomo wangamba oluhande lwʼenyũmba yawe, Sindiendigenda omwawe, kutse Sindiendirya akalyo kutse erĩpũlya amagetsi go hano.

⁹ Kusangwa ekĩnywa kyʼOmwami Mukulu mokyanyihana kiti, Susyerya kalyo, kutse erĩpũlya amagetsi, kutse erisubula omo nzira eyo wasiramo.

¹⁰ Neryo mwagenda atya omo yindi nzira mwatasubula omo nzira eyo asiramo erĩhĩka eBetelĩ.

¹¹ Neryo omũmĩnyererĩ muguma mukulu abya ĩkere eBetelĩ; nʼomuguma oko bagala buwe mwahĩka mwamubwira emĩbĩrĩ yosĩ eyo mundu wa Nyamuhanga akola ekiro ekyo eBetelĩ; nʼebĩnywa ebyo abwira omwami mobabwirabyo tata wabo.

¹² Kandi tata wabo mwabwirabo ati, Alolere omo nzira yahi kwehĩ? Neryo abagala buwe ibamabilangira enzira eyo mundu wa Nyamuhanga oyo walũa eYũda alyalabamo.

¹³ Neryo mwabwira abagala buwe ati, Munyisesere epunda. Neryo mobamusesera epunda; naye mwagenda kuyo.

¹⁴ Neryo mwakwama omundu wa Nyamuhanga, neryo mwamweya omo ndĩna yʼomuti gʼomũalonĩ; neryo mwamũbũlya ati, Ko nina we mundu wa Nyamuhanga oyo walũa eYũda kwehĩ? Naye mwabũga ati, Nĩna ngye.

¹⁵ Neryo mwamubwira ati, Wase eka haguma nage, ulye akalyo.

¹⁶ Naye mwabũga ati, Sinangasubula haguma nawe kutse eriya omwawe haguma nawe; kutse Sindiendirya kalyo kutse erĩpũlya amagetsi haguma nawe hano.

¹⁷ Kusangwa nahanawa nʼekĩnywa kyʼOmwami Mukulu kiti, Susyerya kalyo kutse erĩpũlya amagetsi eyo, kutse susyesuba eriya omo nzira eyo wasiramo.

¹⁸ Naye mwamubwira ati, Nage nibya indi mũmĩnyererĩ nga we; nʼomũlaĩka mwambwira omo kĩnywa kyʼOmwami Mukulu ati, Ũmũsũbũlaye haguma nawe omo nyũmba yawe iniatoka erirya kalyo nʼerĩpũlya magetsi. Nĩkwa mwamubihira.

¹⁹ Kwʼasubula atya haguma naye, nʼerirya akalyo omo nyũmba yiwe, nʼerĩpũlya amagetsi.

Endale ĩkĩta omũmĩnyererĩ busana nʼerĩtendĩowa liwe

²⁰ Neryo omugulu babya banĩkere oko mesa ekĩnywa kyʼOmwami Mukulu mokyahĩka oko mũmĩnyererĩ oyo wamũsũbũlaya;

²¹ naye mwabirikira omundu wa Nyamuhanga oyo walũa eYũda, ati, Omwami Mukulu akabũga ati, Kusangwa sulitakenga ekihano kyʼOmwami Mukulu, ĩsũlĩtateya ekihano ekyo Mwami Mukulu Nyamuhanga wawe akuhana,

²² nĩkwa mowasubula, kandi wabirirya akalyo nʼerĩpũlya amagetsi aho akubwira ati, Sulye kalyo nʼerĩpũlya magetsi; omubiri wawe sĩendĩsyahĩka omwʼisinda yʼabotata-kulu bawe.

²³ Neryo enyũma abere abirya akalyo nʼerĩpũlya, mwasesa epunda, busana nʼomũmĩnyererĩ oyo asũbũlaya.

²⁴ Neryo abere abigenda, endale moyahĩndana naye omo nzira, moyamwĩta; nʼekĩnda mokyaguswa omo nzira, nʼepunda moyimana hakũhĩ nakyo; nʼendale nayo moyahangana hakũhĩ nʼekĩnda.

²⁵ Neryo, lebaya, abandu mobalabaho, mobalangira ekĩnda ĩkĩnagũsĩre omo nzira, nʼendale ininahangene hakũhĩ nʼekĩnda; neryo mobayatũlago omo mũyĩ aho mũmĩnyererĩ mũsyakulu abya ĩkere.

²⁶ Nʼomugulu omũmĩnyererĩ oyo wamũsũbũlaya omo nzira owago mwabũga ati, Ni mundu wa Nyamuhanga oyutakenga ekihano kyʼOmwami Mukulu; kyalekĩre Omwami Mukulu iniamuha oko ndale, eyabirimutula nʼerĩmwĩta, ngʼekĩnywa kyʼOmwami Mukulu ekyo amubwira.

²⁷ Neryo omũmĩnyererĩ oyo mwabwira bagala buwe ati, Munyisesere epunda. Nabo mobamuseserayo.

²⁸ Naye mwayeya ekĩnda ĩkĩnagũsĩre omo nzira, nʼepunda nʼendale isinimene hakũhĩ nʼekĩnda; endale isiritalya ekĩnda, kutse erĩĩta epunda.

²⁹ Neryo omũmĩnyererĩ mwaheka ekĩnda kyʼomundu wa Nyamuhanga, mwahĩrakyo oko punda neryo mwasũbũlyakyo; mwahĩka oko mũyĩ wʼomũmĩnyererĩ mũsyakulu erimulira nʼerimuta.

³⁰ Neryo mwahĩra ekĩnda kiwe kyʼomwʼisinda yiwe; kandi mobamulira, bati Ĩyo-o, mugala wetu!

³¹ Neryo enyũma wʼerimuta, mwabwira bagala buwe ati, Omugulu nasyahola neryo mwasyanyita omwʼisinda eyatabawamo omundu wa Nyamuhanga; mwasyahĩra amakũha wage aho mũsĩke wʼamakũha wuwe.

³² Kusangwa omwatsi asyabererera ogo abirikira omo kĩnywa kyʼOmwami Mukulu busana nʼekiherero eBetelĩ, na busana nʼamanyũmba gosĩ wʼahendata awali omo mĩyĩ yʼeSamarĩa.

³³ Enyũma wʼomwatsi oyũ, Yeroboamũ mwatabinduka eritsira enzira nyibi yiwe, nĩkwa mwaswahĩra abahererĩ bʼahendata omo bandu bosĩ; Omundundi oyo abya anzĩre mwamusolola, batoke eribya bahererĩ bʼahendata.

³⁴ Nʼomwatsi oyo mwabya ĩlolo busana nʼekĩtũnga kya Yeroboamũ, busana nʼerĩheryakyo, eribugakyo omo kihugo kyosĩ.