1 Abami 12 - AMASAKO ABOYTRTRE WA NYAMUHANGA AWAKAHULAWA MO BIBLIA

Obũkĩrũ bwa Rehoboamũ

¹ Neryo Rehoboamũ mwaya eSekemũ; kusangwa Abaĩsraelĩ bosĩ ĩbamabĩhĩka eSekemũ erimuyira mo mwami.

² Neryo omugulu Yeroboamũ mugala wa Nebatĩ owago kusangwa iniakine eMĩsĩrĩ, eyo atibita akalũa ahali omwami Solomono, omugulu Yeroboamũ abya ĩkere eMĩsĩrĩ,

³ neryo mobamutumirako erimubirikira, neryo Yeroboamũ nʼendeko yosĩ yʼAbaĩsraelĩ mobasa mobabwira Rehoboamũ, bati,

⁴ Tata wawe mwatũkalya kwʼengomo yetu; nĩkwa lino uwe wangũhaye omũbĩrĩ owakalĩre wa tata wawe, kandi wangũhaye engomo yiwe eyĩrĩtohĩre eyo atũhĩrako, netu twasyakukolera.

⁵ Neryo Rehoboamũ mwabwirabo ati, Mugende oko biro bisatu, neryo ĩmwaswambĩkako. Neryo abandu mobagenda.

⁶ Neryo omwami Rehoboamũ mwakanĩa haguma nʼabasyakulu, ababya bakakolera tata wuwe Solomono omugulu abya iniakineho, ati, ĩnywe muti nangasũbĩrya abandu aba bo nyiti kwehĩ?

⁷ Neryo mobamubwira bati, Wamasonda eribya mugombe wʼabandu aba mũnabwĩre, nʼerikolerabo, nʼerĩsũbĩryabo, erĩbũlya lyabo nʼerĩbũga ebĩnywa byowene nabo, basyabya bagombe bawe kera na kera.

⁸ Nĩkwa mwaleka ekihano kyʼabasyakulu ekyo bamuha, neryo mwayakanĩa nʼabalwana abakula haguma naye, nʼerimukolera.

⁹ Neryo mwabũlyabo ati, Ĩnywe mũkanyĩhanakĩ muti tũsũbĩraye abandu aba kwehĩ ababĩrĩbũga nage bati, Wangũhaye engomo eyo tata wawe atũhĩrako.

¹⁰ Nʼabalwana abakula haguma naye mobamubwira bati, Ebĩ byo wasyabwira bandu ababũga nawe, bati, Tata wawe mwalĩtohya engomo yetu, nĩkwa uwe wangũhayeyo busana netu; nĩkwa wasyabũga nabo uti, Akasanwe kage ni kanene kwilaba embindi ya tata wage.

¹¹ Neryo lino ngoko tata wage abahekaya engomo ĩrĩtohĩre, nage nasyatomekera oko ngomo yenyũ; tata wage mwabaswĩrya omo mikoba, nĩkwa ĩngye nasyabaswĩrya omo nge.

¹² Neryo Yeroboamũ nʼabandu bosĩ mobahĩka uku Rehoboamũ ekiro ekyo ngoko mwami abũga ati, Musube aho nyiri ekiro kyʼebisatu.

¹³ Nʼomwami mwasũbĩrya abandu omo bĩkalĩre, mwaleka erihana lyʼabasyakulu eryo bamuhana,

¹⁴ neryo mwabũga nabo erikwama erihana lyAbalwana, ati, Tata wage mwalĩtohya engomo yenyũ, nĩkwa ĩngye ngandisyatomeka oko ngomo yenyũ; tata wage mwabaswĩrya omo mikoba, nĩkwa ĩngye ngandĩbaswĩrya omo nge.

¹⁵ Neryo omwami mwatahulikirira bandu; kusangwa abya mwatsi Omwami Mukulu aberereraya, atoke erĩberererya ekĩnywa kiwe, ekyo Mwami Mukulu abwira Yeroboamũ mugala wa Nebatĩ omo buno bwa Ahĩya Omũsĩlonĩ.

Obwami bukagabana

¹⁶ Neryo omugulu Abaĩsraelĩ bosĩ balangira ngoko mwami sĩalĩtowabo, abandu mobasũbĩrya omwami bati, Tuwite erĩgabo lyahi uku Dawĩdĩ kwehĩ? Kandi situwite mwandu uku mugala wa Yese; ĩnywe Baĩsraelĩ, muye omo mahema wenyũ; na lino, uwe Dawĩdĩ, Ũlebaye ekĩtũnga kyawe ĩkyokyene. Neryo Abaĩsraelĩ mobasuba omo mahema wabo.

¹⁷ Nĩkwa abana bʼAbaĩsraelĩ ababya bĩkere omo mĩyĩ ya Yũda, Rehoboamũ mwatabala kubo.

¹⁸ Neryo omwami Rehoboamũ mwatuma Adoramũ, oyo wabya mukulu wʼabandu abakakola ekĩtũlĩ, na Ĩsraelĩ yosĩ mobamwĩta omo mabwe. Nʼomwami Rehoboamũ mwanguha eriya omo galĩ yĩwe, asagire eYerũsalema.

¹⁹ NʼAbaĩsraelĩ mobayisamambula oko kĩtũnga kya Dawĩdĩ nʼerĩhĩka mũnabwĩre.

²⁰ Neryo, omugulu Abaĩsraelĩ bosĩ bowa ngoko Yeroboamũ amabisubula, mobamutumirako erimubirikira bati ase omo ndeko, neryo mobamuyira mo mwami endata oko Baĩsraelĩ bosĩ. Mohatabya nʼomuguma oyo wakwama ekĩtũnga kya Dawĩdĩ, kye nʼekihanda kya Yũda ĩkyokyene.

²¹ Neryo Rehoboamũ abere abĩhĩka eYerũsalema, mwahĩndanĩa ekĩtũnga kyosĩ kya Yũda, nʼekihanda kya Benyamĩna abandu elfu erĩgana nʼamakũmĩ munani abayisogawa, ababya balwĩ, erilwa nʼekĩtũnga kya Ĩsraelĩ basũbaye obwami uku Rehoboamũ mugala wa Solomono.

²² Nĩkwa ekĩnywa kya Nyamuhanga mokyahĩka uku Semaya, omundu wa Nyamuhanga, kiti,

²³ Ubwire Rehoboamũ mugala wa Solomono, omwami wʼeYũda, nʼekĩtũnga kyosĩ kya Yũda na Benyamĩna, nʼabandu abasĩgalira, uti,

²⁴ Omwami Mukulu ati, Simusyehetuka nʼeriyalwa nʼabagala benyũ abana ba Ĩsraelĩ; obuli mundu asube omo nyũmba yiwe; kusangwa omwatsi oyũ akalũa kwĩngye. Neryo mobowa ekĩnywa kyʼOmwami Mukulu, mobasubula mobaya ewabo, ngʼekĩnywa kyʼOmwami Mukulu.

Yeroboamũ akahĩra esyosanamu syʼehyana hyʼesyonde

²⁵ Neryo Yeroboamũ mwahĩmba eSekemũ omo kihugo kyʼebitwa kya Efũraĩmũ, neryo mwĩkalamo; kandi mwalũa eyo mwahĩmba ePenũelĩ.

²⁶ Kandi Yeroboamũ mwabũga omo mutima wuwe ati, Obwami bukandisuba oko kĩtũnga kya Dawĩdĩ.

²⁷ Abandu aba bamayahonga mahere omo nyũmba yʼOmwami Mukulu eYerũsalema, neryo emitima yʼabandu aba yasyasuba oko mukama wabo ye Rehoboamũ, omwami wʼeYũda, kandi basyanyĩta nʼerisuba uku Rehoboamũ omwami wʼAbayũda.

²⁸ Busana nʼekyo omwami mwaya embĩta, neryo mwahesa ebyana bibiri byʼende omo syamagetsi; neryo mwabwirabo ati, Kĩkalĩre busana nenyũ erihetukira eYerũsalema; ĩnywe Baĩsraelĩ, musamalire esyonyamuhanga syenyũ esyabalũsaya omo kihugo kyʼeMĩsĩrĩ.

²⁹ Neryo Yeroboamũ mwahĩra esanamu nguma yʼende eBetelĩ, nʼeyindi sanamu mwahĩrayo e Danĩ.

³⁰ Neryo omwatsi oyũ mwabya ĩlolo; kusangwa bandu mobaya eDanĩ erĩyaramya embere syʼesanamu nguma.

³¹ Kandi Yeroboamũ mwahĩmba amanyũmba wʼahendata, kandi mwĩmya omo bandu bosĩ abahererĩ, abatabya bʼoko bagala ba Lawĩ.

³² Kandi Yeroboamũ mwahĩra ekiro kikulu omo mukera wʼomunani, oko kiro kyʼerĩkũmĩ nʼebitanu kyʼomukera, ekiri ngʼekiro kikulu ekyabya eYũda, neryo mwahetukira oko kiherero; mwakola atya eBetelĩ nibya, iniakahongera ebyana ebyo ahesa. Neryo mwahĩra eBetelĩ abahererĩ bʼahendata aho ahĩmba.

³³ Neryo mwahetukira oko kiherero aho ahĩmba eBetelĩ oko kiro kyʼerĩkũmĩ nʼebitanu kyʼomukera wʼomunani, go mukera ogo aganĩraya omo mutima wuwe; kandi mwahĩra ekiro kikulu busana nʼabana ba Ĩsraelĩ, neryo mwahetukira oko kiherero ekyo, erĩhĩsya obukwa.