1 Abami 11 - AMASAKO ABOYTRTRE WA NYAMUHANGA AWAKAHULAWA MO BIBLIA

Solomono nʼabakalĩ biwe bʼebihanda bakamũtsandaya

¹ Nĩkwa Solomono mwanza abakalĩ bangi bʼehandi, haguma nʼomwali wa Farao, abakalĩ Abamoabũ, nʼAbaamonĩ, nʼAbaedomũ, nʼAbasĩdonĩ, nʼAbahĩtĩ;

² bʼebihanda ebyo Mwami Mukulu abwira abana ba Ĩsraelĩ ati, Simusyesiba haguma nabo, nabo sibasyesiba omo katĩkatĩ kenyũ; kusangwa kwenene basyabindula emitima yenyũ erikwama esyonyamuhanga syabo. Solomono mwamakirirabo atya erianzabo.

³ Naye abya awite abakalĩ magana alinda, abali bʼabami, nʼabahwekĩ magana asatu; nʼabakalĩ buwe mobabindula omutima wuwe.

⁴ Kusangwa Solomono abere abikula, abakalĩ buwe mobabindula omutima wuwe erikwama esindi nyamuhanga; nʼomutima wuwe siabya akwamĩre Omwami Mukulu Nyamuhanga wuwe, ngoko mutima wa tata wuwe Dawĩdĩ abya.

⁵ Kusangwa Solomono mwakwama Asterotĩ, nyamuhanga wʼobũkalĩ wʼAba­nya. Sĩdonĩ, nʼerikwama Milkomũ esyonye syʼAbanya Amonĩ.

⁶ Na Solomono mwakola ekibi omo meso wʼOmwami Mukulu, mwatakwama Omwami Mukulu yo ndeke ngoko tata wuwe Dawĩdĩ akola.

⁷ Neryo Solomono mwahĩmbĩra Kemosĩ, esyonye sya Moabũ, yʼahendata, oko kitwa ekiri embere wʼeYerũsalema, nʼerĩhĩmbĩra Molekĩ, esyonye syʼabana ba Amonĩ.

⁸ Mwakola atya busana nʼabakalĩ buwe bosĩ bʼehandi, abalũsaya obukwa nʼerihongera esyonyamuhanga syabo.

Omwami Mukulu akahitana uku Solomono

⁹ Neryo Omwami Mukulu mwahitana uku Solomono, kusangwa omutima wuwe abya iniabirikitira ehandi nʼerĩlũa oko Mwami Mukulu, Nyamuhanga wa Ĩsraelĩ, oyo wamuhulukira esyongendo ĩbĩrĩ,

¹⁰ oyo wamuhana busana nʼomwatsi oyũ ati syakwame esindi nyamuhanga; nĩkwa mwatabika ebyo Mwami Mukulu amuhana.

¹¹ Busana nʼekyo, Omwami Mukulu mwabwira Solomono ati, Kusangwa wabirikola ekĩ, ĩsũlĩtateya endagano yage, nʼemigambo yage eyo nakuhana, kwenene nasyakusagula obwami, nʼerihabo oko mugombe wawe.

¹² Nĩkwa sindiendisyakolakyo omo biro byawe, busana na tata wawe Dawĩdĩ; nĩkwa nasyasagulabo omo byala bya mugala wawe.

¹³ Nĩkwa sindiendisyasagula obwami bosĩ; nĩkwa nasyaha mugala wawe ekihanda kiguma, busana nʼomugombe wage Dawĩdĩ, na busana nʼeYerũsalema ogo nayisoga.

¹⁴ Neryo Omwami Mukulu mwahanganĩrya Solomono yʼenzĩgũ, ye Hadadĩ Omũedomũ; naye abya wʼekĩtũnga kyʼobwami bwʼeEdomũ.

¹⁵ Kusangwa omugulu Dawĩdĩ abya eEdomũ, na Yoabũ omukulu wʼemilondo ahetuka eriyata abĩtawa, abere abĩta obuli mulume eEdomũ,

¹⁶ kusangwa Yoabũ nʼAbaĩsraelĩ bosĩ mobĩkalayo emikera ndatu, erĩhĩka aho amabĩtĩra obuli mulume eEdomũ;

¹⁷ neryo Hadadĩ mwatibita, iye nʼabandi Banya Edomũ ba bagombe ba tata wuwe eritibita eMĩsĩrĩ, na Hadadĩ iniakine mwana mulere.

¹⁸ Mobahangana erĩlũa eMĩdĩanĩ, nʼerĩhĩka eParanĩ, mobatwala bandu haguma nabo erĩlũa eParanĩ, kandi mobahĩka eMĩsĩrĩ uku Farao omwami wʼeMĩsĩrĩ, oyo wamuha enyũmba, nʼerimutegekera akalyo, nʼerimuha ekitaka.

¹⁹ Neryo Hadadĩ mwasĩmwa kutsibu omo meso wa Farao kyaleka ĩnĩamũherũkĩrya mwali wabo mũkalĩwe, ye mwali wabo Tapanesĩ omugole wʼomwami.

²⁰ Neryo mwali wabo Tapanesĩ mwamubutira mugala ye Genũbatĩ, oyo Tapanesĩ atsĩrĩsaya amabere omo nyũmba ya Farao; na Genũbatĩ abya omo nyũmba ya Farao omo katĩkatĩ kʼabagala ba Farao.

²¹ Kandi omugulu Hadadĩ owĩra eMĩsĩrĩ ngoko Dawĩdĩ ameya abĩse-kulu buwe, na Yoabũ omukulu wʼemilondo iniabirihola, Hadadĩ mwabwira Farao ati, Unyihamule nyigende omo kihugo kyage.

²² Neryo Farao mwamubwira ati, Nĩkwa wamatabulakĩ, kikaleka iwasonda eriya omo kihugo kyawe kwehĩ? Naye mwamũsũbĩrya ati, Sikiri, nĩkwa Unyihamule nyigende.

²³ Kandi Nyamuhanga mwamuhanganĩrya eyindi nzĩgũ, ye Rezonĩ mugala wa Elĩada, oyo watswa oko mukama wuwe ye Hadadezerĩ omwami wʼeZoba.

²⁴ Na Rezonĩ mwahĩndanĩa bandu, mwabya mukulu wʼomulondo omugulu Dawĩdĩ ĩta Abesoba; neryo mobaya eDamaseke mobĩkalayo, mobatabala eDamaseke.

²⁵ Neryo Rezonĩ abya nzĩgũ yʼAbaĩsraelĩ oko biro byosĩ bya Solomono eritomekera omwaga ogo Hadadĩ akola. Naye mwakwa Ĩsraelĩ yʼesyonye, mwatabala oko Sũrĩa.

²⁶ Na Yeroboamũ mugala wa Nebatĩ, Omũefũraĩmũ wʼeZereda, omugombe wa Solomono, na nyĩnya wuwe abya Zerũa, omũkwakalĩ, na Yeroboamũ mwahona oko mwami.

²⁷ Nʼekyaleka iniahona oko mwami kyekĩ: Solomono mwahĩmba eMĩlo, kandi mwasũbya ahabya hahĩmbũkere hʼomũyĩ wa tata wuwe Dawĩdĩ.

²⁸ Nʼomundu oyo ye Yeroboamũ abya mbangĩ; na Solomono omugulu alangira omũlwana oyo kwʼabya mundu wʼomũhwa wʼomũbĩrĩ, neryo mwamuha obũteya bʼomũbĩrĩ wʼekĩtũnga kya Yosefũ.

²⁹ Neryo oko mugulu oyo, omugulu Yeroboamũ ahuluka akalũa eYerũsalema, omũmĩnyererĩ Ahĩya mwamweya omo nzira; nĩkwa Ahĩya iniamabiambala olukimba luhya-luhya; nʼababiri abo babya ĩbobene omolĩ.

³⁰ Neryo Ahĩya mwahamba olukimba luhya-luhya olo abya ambite, mwatulalo mo bihande erĩkũmĩ nʼebibiri.

³¹ Neryo mwabwira Yeroboamũ ati, wĩmaye ebihande ĩkũmĩ; kusangwa Omwami Mukulu Nyamuhanga wa Ĩsraelĩ akabũga ati, Lebaya, nasyasagula obwami erĩlũa omo byala bya Solomono, kandi nasyakuha ebihanda ĩkũmĩ.

³² Nĩkwa asyabya nʼekihanda kiguma busana nʼomugombe wage Dawĩdĩ, na busana nʼeYerũsalema, omũyĩ ogo nayisoga omo bihanda byosĩ bya Ĩsraelĩ;

³³ kusangwa babĩrĩnyĩsĩganĩa, kandi babĩrĩramya Asterotĩ, nyamuhanga wʼobũkalĩ wʼAbanya Sĩdonĩ, na Kemosĩ nyamuhanga wa Moabũ, na Mĩlkomũ nyamuhanga wʼabana ba Amonĩ; kandi sibetalendera omo nzira syage, erikola ebitunganene omo meso wage, nʼerĩteya ebihano byage nʼebilayiro byage, ngoko tata wuwe Dawĩdĩ akola.

³⁴ Nĩkwa sĩndiendĩsyalũsya obwami bosĩ omo byala biwe; nĩkwa nasyamuyira mo mũtabalĩ oko biro byosĩ byʼeribyaho liwe, busana na Dawĩdĩ omugombe wage oyo nayisoga oyo wategaya ebihano byage nʼemigambo yage.

³⁵ Nĩkwa nasyalũsya obwami bʼomo byala byʼomugala wuwe, nasyakuha ebihanda ĩkũmĩ.

³⁶ Nĩkwa nasyaha mugala wuwe ekihanda kiguma, omugombe wage Dawĩdĩ atoke eribya nʼetala emigulu yosĩ embere syage eYerũsalema, omũyĩ ogo nayisoga busana nage erĩhĩraho erĩna lyage.

³⁷ Nage nasyakwĩmya, nawe Wasyatabala oko byosĩ ebyo wanzĩre kandi Wasyabya mwami wʼAbaĩsraelĩ.

³⁸ Neryo wamasyowa ebyosĩ ebyo ngakuhana, nʼerirendera omo syonzira syage, nʼerikola ekitunganene omo meso wage, nʼerĩteya emigambo yage nʼebihano byage, ngoko mugombe wage Dawĩdĩ akola, nasyabya haguma nawe, kandi nasyakũhĩmbĩra enyũmba yĩsĩkĩre, ngoko nahĩmbĩra Dawĩdĩ, kandi nasyakuha Abaĩsraelĩ.

³⁹ Nage nasyagalya abana ba Dawĩdĩ busana nʼekĩ, nĩkwa butsira ebiro byosĩ.

⁴⁰ Neryo Solomono mwasonda erĩĩta Yeroboamũ busana nʼekyo; nĩkwa Yeroboamũ mwahangana mwatibita eMĩsĩrĩ, ewa Sĩsakĩ omwami wʼeMĩsĩrĩ, kandi mwabya eMĩsĩrĩ erĩhĩka oko luholo lwa Solomono.

Erĩkũlũka lya Solomono

⁴¹ Nĩkwa eyindi mĩbĩrĩ ya Solomono, nʼebyosĩ akola, nʼamenge wuwe, sĩbĩsakĩre omo kitabu kyʼemĩbĩrĩ ya Solomono kwehĩ?

⁴² Nʼebiro ebyo Solomono atabala eYerũsalema oko Baĩsraelĩ bosĩ byabya myaka makũmĩ ani.

⁴³ Neryo Solomono mweya abĩse-kulu buwe, mwatabwa omo mũyĩ wa tata wuwe Dawĩdĩ; na Rehoboamũ mugala wuwe mwatabala omo mwanya wuwe.