1 Abami 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami-kalĩ wʼeSeba akayabana Solomono

¹ Nʼomugulu omwami-kalĩ wʼeSeba owa engulu ya Solomono busana nʼerĩna lyʼOmwami Mukulu, mwasa erimulengako erĩmũbũlya ebĩkala-kalĩre.

² Neryo mwahĩka eYerũsalema nʼabagombe bangi kutsibu, nʼesyongamia esĩhekĩre amanũkato, nʼesyamagetsi nyingi kutsibu, nʼamabwe wʼobũgũlĩ bunene; neryo abere ahĩka uku Solomono mwakanĩa naye oko byosĩ byabya omo mutima wuwe.

³ Na Solomono mwamũkũmbũlĩra erĩbũlya liwe ryosĩ; mohatabya kindu ekyamulema ekyo atamubwira.

⁴ Nʼomugulu omwami-kalĩ wʼeSeba alangira amenge gosĩ wa Solomono, nʼenyũmba eyo ahĩmba,

⁵ nʼakalyo kʼoko mesa yiwe, nʼerĩĩkala lyʼabagombe buwe, nʼomũbĩrĩ wʼabasondolĩ buwe, nʼesyongimba syabo, nʼabahekĩ bʼesyondehĩ siwe, nʼebisambiro ebyo ahetukirako akaya oko nyũmba yʼOmwami Mukulu, mwayirekulira.

⁶ Neryo mwabwira omwami ati, Engulu nowa omo kihugo kyage busana nʼemĩbĩrĩ yawe nʼamenge wawe yabya ya kwenene.

⁷ Nĩkwa mondĩkĩrĩrya ebĩnywa, nde nabyasa, nʼerilangirabyo omo meso wage. Neryo lebaya, mondabwirwa nʼembindi; amenge wawe nʼerikamaha lyawe bĩrengĩre engulu nowa.

⁸ Obutseme buli nʼabandu bawe, nʼobutseme buli nʼabagombe bawe, abakahangana embere syawe emigulu yosĩ, abakowa menge wawe.

⁹ Omũyĩsa abye oko Mwami Mukulu Nyamuhanga wawe, oyukakutsemera, erĩkũhĩra oko kĩtũmbĩ kyʼobwami kyʼAbaĩsraelĩ; kusangwa Omwami Mukulu mwanza Abaĩsraelĩ kera na kera, kyaleka iniakuyira mo mwami, erikola erĩbanza libuya nʼekwenene.

¹⁰ Kandi mwaha omwami esyotalanta syʼesyamagetsi erĩgana nʼamakũmĩ abiri (120), nʼamanũkato mangi kutsibu, nʼamabwe wʼobũgũlĩ; mohataswasa manũkato mangi ngʼaya ago mwami-kalĩ wʼeSeba aha omwami Solomono.

¹¹ Nʼamato wa Hĩramũ mwaleta esyamagetsi erĩlũa eOfĩrĩ, nʼerireta emiti ĩkalũa eOfĩrĩ, emiti yʼealmũgĩ, mingi kutsibu nʼamabwe wʼobũgũlĩ bunene.

¹² Nʼomwami Solomono mwabatsa esyondũyĩ omo miti yʼealmũgĩ busana nʼenyũmba yʼOmwami Mukulu, na busana nʼenyũmba yʼomwami, nʼenanga nʼenzenze busana nʼabĩmbĩ, mohatahĩka emiti ya almũgĩ ngʼeyĩ, kutse siriyatalolwako, erĩhĩka mũnabwĩre.

¹³ Neryo omwami Solomono mwaha omwami-kalĩ wʼeSeba ebyosĩ ebyo anzĩre, obuli kindu abũlaya na kwilaba aho ebyo Solomono ayĩsũnza ebĩkalũa oko bukama buwe. Neryo omwami-kalĩ mwabũnũkala mwaya oko kihugo kiwe, iye nʼabagombe buwe.

¹⁴ Nĩkwa obũlĩto bwʼesyamagetsĩ esyahĩka uku Solomono oko mwaka muguma bwabya esyotalanta magana ndatu nʼamakũmĩ ndatu nʼendatu (666),

¹⁵ esyo abatũndĩ baleta siteko, nʼebindu byʼabatũndĩ, nʼebyʼabami bosĩ bʼeArabĩa nʼebyʼabatabalĩ bʼekihugo, biteko.

¹⁶ Nʼomwami Solomono mwahesa esyongabo nene-nene amagana abiri (200) syʼesyamagetsi esyahesawa; kandi oko buli ngabo nene-nene yabya yʼesyosekelĩ amagana ndatu (600) yʼesyamagetsi.

¹⁷ Kandi mwahesa ehingabo magana asatu omo syamagetsi esĩtũkwĩre, obuli ngabo moyabya yʼekĩlo kiguma nʼembindi yʼesyamagetsi; nʼomwami mwahĩrasyo omo nyũmba yʼomo mũsĩtũ wʼeLebanonĩ.

¹⁸ Kandi omwami mwakokotya ekĩtũmbĩ kinene kyʼobwami omo meno wʼesyonzogũ, neryo mwaswikakyo omo syamagetsi nyibuya.

¹⁹ Ekĩtũmbĩ ekyo kyabya kwʼebisambiro ndatu, nʼendata wʼekĩtũmbĩ habya esingi, ĩhayĩtĩmbĩreko; kandi mohabya ebikokola oko kĩtũmbĩ oko mbande ĩbĩrĩ hakũhĩ nʼahʼerĩĩkala, nʼesyondale ĩbĩrĩ isihangene hakũhĩ nʼebikokola.

²⁰ Nʼesyondale erĩkũmĩ nʼesĩbĩrĩ mosyahangana oko bisambiro ndatu oko lundi luhande nʼoko lundi luhande. Sihehatakolwa ekindi ekiri ngakyo omo bundi bwami.

²¹ Nʼesyonyungu syosĩ syʼerĩpũlyamo sya Solomono syabya syʼesyamagetsi. Nʼebindu byosĩ byʼenyũmba yʼomo mũsĩtũ wʼeLebanonĩ byabya byʼesyamagetsi nyibuya; sihabya byʼekĩtsĩpa; kandi ekĩtsĩpa mokitaganzwa nga kindu kyʼobũgũlĩ oko biro bya Solomono.

²² Kusangwa omwami abya awite oko ngetsi amato wʼeTarsĩsĩ haguma nʼamato wa Hĩramũ; engendo nguma oko buli myaka ĩsatu ihakasa amato wʼeTarsĩsĩ akaleta esyamagetsi, nʼebĩtsĩpa, nʼameno wʼenzogũ, nʼesyongima, nʼesyonyonyũ nyibuya.

²³ Neryo Solomono mwalaba abami bosĩ bʼekihugo omo bindu nʼamenge.

²⁴ Nʼekihugo kyosĩ mokyasonda aho wa Solomono, erĩowa amenge wuwe ago Nyamuhanga ahĩra omo mutima wuwe.

²⁵ Obuli mundu mwaleta olũsũnzo luwe, ebindu byʼebĩtsĩpa, nʼebindu byʼesyamagetsi, nʼesyongimba, nʼebindu byʼamalwa, nʼamanũkato, nʼesyosabayĩrĩ, nʼesyonyumbu, emiganzo yabyo oko buli mwaka.

²⁶ Kandi Solomono mwahĩndanĩa esyogalĩ syʼamalwa nʼabali oko syosabayĩrĩ. Kandi abya awite esyogalĩ elfu nguma nʼamagana ani (1,400), nʼabali oko syosabayĩrĩ elfu erĩkũmĩ nʼĩbĩrĩ (12,000), abo ahĩra omo mĩyĩ yʼesyogalĩ, na haguma nʼomwami eYerũsalema.

²⁷ Nʼomwami mwayira ebĩtsĩpa eribya ngʼamabwe eYerũsalema, kandi mwayira emĩerezĩ eribya mingi ngʼemiti yʼemikuyu eyiri omo lukwesese.

²⁸ Nʼesyosabayĩrĩ esyo Solomono abya awite syalũsĩbawa eMĩsĩrĩ; nʼeKĩlĩkĩa, nʼabatũndya bʼomwami mobagulasyo omo bũgũlĩ.

²⁹ Nʼegalĩ moyahetuka ĩkalũa eMĩsĩrĩ busana nʼesyosekelĩ magana ndatu syʼekĩtsĩpa (600), nʼesabayĩrĩ nguma busana nʼerĩgana nʼamakũmĩ atanu (150); ko bagũlaya batya oko bami bosĩ bʼAbahĩtĩ nʼabami bʼeSũrĩa.