1 Abami 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Obukulu bwa Dawĩdĩ

¹ Neryo omwami Dawĩdĩ mwabya mũsyakulu iniabiribuga myaka mingi; nabo mobamuswika nʼesyongimba, nĩkwa mwatahũha.

² Busana nʼekyo, abagombe buwe mobamubwira bati, Hasondawe omumbesa mulere busana nʼomukama wage, nʼomumbesa oyo ahangane embere wʼomwami, amulembere; agotsere oko kĩkũba kiwe, omukama omwami wetu abane erĩhũhana.

³ Neryo mobasondya omumbesa mubuya omo mitano yosĩ yʼeĨsraelĩ, neryo mobabana Abĩsagĩ, Omũsũnamũ, mobamuleta oko mwami.

⁴ Nʼomumbesa oyo abya mubuya kutsibu; neryo mwalembera omwami, nʼerimukolera; nĩkwa omwami mwatamuminya.

⁵ Neryo Adonĩa mugala wa Hagĩtĩ mwayĩhamya, ati, Ngandibya mwami; neryo mwayĩtegekanĩrya esyogalĩ nʼabandu oko syosabayĩrĩ, nʼabalume makũmĩ atanu bʼeritibita embere siwe.

⁶ Na tata wuwe ĩsĩalĩtamũlũhya emigulu yosĩ nʼerimubwira ati, Wamakola utya busana nakĩ kwehĩ? Kandi abya mundu gowene kutsibu; naye abutawa enyũma wa Abũsaloma.

⁷ Neryo mwakanĩa na Yoabũ mugala wa Zerũya, na haguma nʼomũhererĩ Abĩatarĩ; nabo ĩbanakwamĩre Adonĩa mobamũwatĩkya.

⁸ Nĩkwa omũhererĩ Zadokĩ, na Benaya mugala wa Yehoyada, nʼomũmĩnyererĩ Natana, na Sĩmeĩ, na Reĩ, nʼesyombangĩ sya Dawĩdĩ, sibabya haguma na Adonĩa.

⁹ Na Adonĩa mwakera esyombũlĩ nʼesyonume syʼesyonde, nʼesyʼebĩsabũ oko lĩbwe lyʼeZohelete, eriri hakũhĩ nʼErogelĩ; neryo mwabirikira bagala babo bosĩ, abagala bʼomwami, nʼabandu bosĩ bʼeYũda, abagombe bʼomwami.

¹⁰ Nĩkwa mwatabirikira omũmĩnyererĩ Natanĩ, na Benaya, nʼesyombangĩ, na Solomono mugala wabo.

¹¹ Neryo Natanĩ mwakanĩa na Batĩseba nya Solomono, ati, Sũlĩtowa ngoko Adonĩa mugala wa Hagĩtĩ amatabala kwehĩ? Na Dawĩdĩ omukama wetu ĩsĩasĩ.

¹² Neryo lino ngakusaba nyiti, wase, nyikuhane, iwatoka erĩlamya engebe yawe nʼengebe yʼomugala wawe ye Solomono.

¹³ Uyitwale oko mwami Dawĩdĩ, umubwire uti, Uwe mwami, omukama wage, mũtalahĩrya omugombe wawe wʼobũkalĩ, uti, Kwenene Solomono mugala wawe asyatabala enyũma wage, naye asyĩkala oko kĩtũmbĩ kyage kyʼobwami kwehĩ? Neryo busana nakĩ ye Adonĩa akatabala kwehĩ?

¹⁴ Lebaya, omugulu ũkĩnakanaya nʼomwami, nage nibya nasyakukwama erĩhĩkanĩa ebĩnywa byawe.

¹⁵ Neryo Batĩseba mwingira eyiri omwami omo kisenge. Nʼomwami abya mukulu kutsibu; na Abĩsagĩ Omũsũnamũ abya akakolera omwami.

¹⁶ Neryo Batĩseba mũnama, kandi mũnamĩrya obũsũ bwʼahisi oko mwami. Nʼomwami mwabũga ati, Ukasondakĩ kwehĩ?

¹⁷ Naye mwamũsũbĩrya ati, Mowalahĩrya oko Mwami Mukulu Nyamuhanga wawe busana nʼomũkalĩ mugombe wawe, uti, Kwenene Solomono mugala wawe asyatabala enyũma wage, naye asyĩkala oko kĩtũmbĩ kyage kyʼobwami.

¹⁸ Na lino, lebaya Adonĩa akatabala; nawe mukama wage mwami ĩsĩwasĩ.

¹⁹ Kandi abirikera esyonume syʼesyonde nʼesyʼebĩsabũ, nʼesyombũlĩ nyingi, kandi abiribirikira bagala bʼomwami bosĩ, nʼomũhererĩ Abĩatarĩ, na Yoabũ omukulu wʼemilondo; nĩkwa sialitabirikira Solomono omugombe wawe.

²⁰ Neryo uwe mwami, omukama wage, ameso wʼAbaĩsraelĩ bosĩ ali kuwe, iwaminya eribwirabo nga nindi asyĩkala oko kĩtũmbĩ kyʼobwami kyʼomukama wage omwami enyũma siwe.

²¹ Bite bitya kyasyabya omugulu omukama wage mwami asyeya abĩse-kulu buwe, ĩngye na mugala wage Solomono twasyaganzwa mo babi.

²² Neryo, lebaya, abere akĩnakanaya nʼomwami, omũmĩnyererĩ Natana mwahĩkamo.

²³ Neryo mobabwira omwami bati, Lebaya omũmĩnyererĩ Natana. Neryo abere abĩhĩkamo embere syʼOmwami, mũnamĩrya obũsũ buwe bwʼahisi oko kitaka embere syʼOmwami.

²⁴ Neryo Natana mwabũga ati, Mukama wage uwe mwami, wabĩrĩbũga uti, Adonĩa asyatabala enyũma wage, naye asyĩkala oko kĩtũmbĩ kyage kyʼobwami kwehĩ?

²⁵ Kusangwa mũnabwĩre abiriandagala nʼerikera esyonume syʼesyonde nʼesyʼebĩsabũ nʼesyombũlĩ nyingi, kandi abiribirikira abagala bosĩ bʼomwami, nʼabakulu bʼemilondo, nʼomũhererĩ Abĩatarĩ; neryo lebaya, bakalya nʼerĩpũlya embere siwe, bati, Omwami Adonĩa akote!

²⁶ Nĩkwa ĩngye, omugombe wawe, nʼomũhererĩ Zadokĩ, na Benaya mugala wa Yehoyada, nʼomugombe wawe Solomono, sialitatubirikira.

²⁷ Ko mukama wage mwami yunalyakola omwatsi oyũ kwehĩ, nʼerĩtĩndamĩnyĩsya abagombe bawe nga nindi wasyĩkala oko kĩtũmbĩ kyʼobwami kyʼomukama wage mwami enyũma wuwe kwehĩ?

²⁸ Neryo omwami Dawĩdĩ mwasũbĩrya ati, Munyibirikirire Batĩseba. Neryo mwasa embere syʼomwami, mwahangana aho embere syʼomwami.

²⁹ Nʼomwami mwalahĩrya, ati, Ngoko Mwami Mukulu aliho, oyo watongolaya ekĩrĩmũ kyage erĩlũa omo bũlĩge bosĩ,

³⁰ kwenene nakũlahĩrĩraya oko Mwami Mukulu Nyamuhanga wa Ĩsraelĩ, nyiti, Kwenene Solomono mugala wawe asyatabala enyũma syage, naye asyĩkala aho wage oko kĩtũmbĩ kyage kyʼobwami; kwenene ko ngandikola nyitya mũnabwĩre.

³¹ Neryo Batĩseba mũnamĩrya obũsũ buwe bʼoko kitaka, mũnamira embere syʼOmwami, mwabũga ati, Omukama wage omwami Dawĩdĩ akote!

Solomono akayirawa mo mwami

³² Neryo omwami Dawĩdĩ mwabũga ati, Munyibirikirire omũhererĩ Zadokĩ nʼomũmĩnyererĩ Natana, na Benaya mugala wa Yehoyada. Nabo mobahĩka embere syʼomwami.

³³ Nʼomwami mwabwirabo ati, Mutwale haguma nenyũ abagombe bʼomukama wenyũ, mũgendaye Solomono mugala wage oko nyumbu yage, mũmwandagalĩraye eGĩhonĩ.

³⁴ Nʼomũhererĩ Zadokĩ nʼomũmĩnyererĩ Natana bamũhakabaye amagũta eribya mwami busana na Ĩsraelĩ; kandi mubuhe engubi, mũbũge muti, Omwami Solomono akote!

³⁵ Neryo mwasyamukwama, naye asyasa nʼerĩĩkala oko kĩtũmbĩ kyage kyʼobwami; kusangwa asyabya mwami omo mwanya wage; nage nabĩrĩmũhĩra eribya mukulu oko Ĩsraelĩ na Yũda.

³⁶ Neryo Benaya mugala wa Yehoyada mwasũbĩrya omwami ati, Amina! Omwami Mukulu Nyamuhanga wʼomukama wage, omwami naye abũge atya.

³⁷ Ngoko Mwami Mukulu abiribya nʼomukama wage mwami, kwʼanabye atya na Solomono, kandi ayire ekĩtũmbĩ kiwe kyʼobwami mo kikulu kwilaba ekĩtũmbĩ kyʼobwami kyʼomukama wage omwami Dawĩdĩ!

³⁸ Neryo omũhererĩ Zadokĩ nʼomũmĩnyererĩ Natana na Benaya mugala wa Yehoyada, nʼAbakeretĩ nʼAbapeletĩ mobandagala erĩyagendya Solomono oko nyumbu yʼomwami Dawĩdĩ, mobamuleta eGĩhonĩ.

³⁹ Nʼomũhererĩ Zadokĩ mwĩmya erĩhembe lyʼamagũta omo hema mwahakabya Solomono yʼamagũta. Neryo mobabuha engubi; nʼabandu bosĩ mobabũga bati, Omwami Solomono akote!

⁴⁰ Nʼabandu bosĩ mobamukwama enyũma bakabuha amalenga, mobatsema nʼobutseme bunene, kyaleka ekihugo ĩkyasũkana busana nʼolukanda lwabo.

⁴¹ Neryo Adonĩa nʼabagenĩ bosĩ ababya haguma naye mobowalo omugulu bakabuga erirya. Nʼomugulu Yoabũ owa omulenge wʼengubi, mwabũga ati, Olukanda oluli omo mũyĩ nĩ lwakĩ kwehĩ?

⁴² Neryo abere akĩnabũga, lebaya Yonatana mugala wʼomũhererĩ Abĩatarĩ mwasa; neryo Adonĩa mwabũga ati, Wasemo; kusangwa uli mundu mubuya, ukaleta engulu yowene.

⁴³ Na Yonatana mwasũbĩrya mwabwira Adonĩa, ati, Kwenene omukama wetu omwami Dawĩdĩ abiriyira Solomono mo mwami.

⁴⁴ Nʼomwami abirituma omũhererĩ Zadokĩ haguma naye, nʼomũmĩnyererĩ Natana, na Benaya mugala wa Yehoyada, nʼAbakeretĩ nʼAbapeletĩ; kandi babĩrĩmũgendya oko nyumbu yʼomwami.

⁴⁵ Nʼomũhererĩ Zadokĩ nʼomũmĩnyererĩ Natana babĩrĩmũhakabya amagũta eGĩhonĩ eribya mwami; kandi babĩrĩlũayo bakatsema, kyaleka omũyĩ gosĩ ĩnĩasũka-sũkana kandi. Olũ lo lukanda mũkabĩowa.

⁴⁶ Na Solomono nibya amĩkala oko kĩtũmbĩ kyʼobwami.

⁴⁷ Kandi abagombe bʼomwami basĩre eritsumula omukama wetu omwami Dawĩdĩ, bati, Nyamuhanga wawe ayire erĩna lya Solomono mo libuya kwilaba erĩna lyawe, kandi ayire ekĩtũmbĩ kiwe kyʼobwami mo kikulu kwilaba ekĩtũmbĩ kyawe kyʼobwami! Nʼomwami mũnamira oko ngyingo.

⁴⁸ Nʼomwami naye mwabũga ati, Omũyĩsa abye oko Mwami Mukulu, Nyamuhanga wa Ĩsraelĩ, oyo wabiriha mũnabwĩre omundu erĩĩkala oko kĩtũmbĩ kyage kyʼobwami, ameso wage ĩnĩanasamalĩrekyo.

Eribala lya Adonĩa

⁴⁹ Neryo abagenĩ bosĩ ba Adonĩa mobubaha, mobahangana, mobagenda obuli mundu omo nzira yiwe.

⁵⁰ Na Adonĩa mubaha busana na Solomono; neryo mwahangana, mwagenda mwahamba oko mahembe wʼekiherero.

⁵¹ Neryo Solomono mwabwirwa, ambu, Lebaya Adonĩa akubaha omwami Solomono; kusangwa lebaya, abirihamba oko mahembe wʼekiherero, ati, Omwami Solomono atsũke erĩnyĩlahĩrĩrya mũnabwĩre ati, syendĩta omugombe wuwe omo mũyalĩ.

⁵² Na Solomono mwabũga ati, Amayĩkangya ngʼomundu mubuya, oluywiri luwe luguma silwendisyatogera oko kitaka; nĩkwa ekibi kyamamubanikako, asyahola.

⁵³ Neryo omwami Solomono mwatuma, mobamwandagalya erĩlũa oko kiherero. Neryo mwasa mwayĩlambamya embere syʼOmwami Solomono. Neryo Solomono mwamubwira ati, Ugende omo nyũmba yawe.