Закар 11 - Коми Библия 2023

Ливанӧс да Васанӧс бырӧдӧм йылысь водзвыв висьталӧм

¹ Восьт ассьыд дзиръяястӧ, Ливан, мед биыс ньылыштас тэнсьыд сус пуястӧ.

² Сыркъялӧмӧн бӧрд, кипарис, ӧд сус пуыд пӧрис, ыджыд пуястӧ бырӧдӧма. Сыркъялӧмӧн бӧрдӧй, васанса тупуяс, ӧд сук вӧрыд пӧрласис.

³ Кылӧ ыж видзысьяслӧн бӧрдӧм, ӧд налысь йирсянінъяссӧ бырӧдӧма. Кылӧ левъяслӧн равзӧм, ӧд Йӧрдан ю бокысь вӧрсӧ куштӧма.

Кыкпӧлӧс ыж видзысь

⁴ Господь, менам Ен, тадзи висьталӧ: «Видз ыжъясӧс, кодъясӧс шуӧма начкыны.

⁵ Ыжъясӧс ньӧбысь кор начкӧ найӧс, таысь оз кыв асьсӧ мыжаӧн. Ыжъясӧс вузалысь шуалӧ: ”Аттьӧ Господьлы! Ме озырми”. Ыжъяс понда весиг видзысьныслӧн сьӧлӧмыс оз нормы.

⁶ И Ме ог нин бурсьӧлӧмтчы тайӧ муас олысьяс дінӧ, – висьталӧ Господь. – Ме сета найӧс ӧта-мӧдныслӧн киӧ да ӧксыныслӧн кабыр улӧ. Найӧ пасьясны-куштасны ассьыныс мусӧ, и Ме некодӧс ог мезды налӧн киысь».

⁷ Вузасьысьяс медалісны менӧ, медым ме видзи начкыны шуӧм ыжъясӧс. Ме босьті кык бедь, ӧтиыслы сеті Буралӧм ним, мӧдыслы – Ӧтувъялун ним. Наӧн ме видзи ыжъясӧс.

⁸ Ӧти тӧлысьӧн ме вӧтлі куим видзысьӧс, дӧзми тшӧтш ыжъяс вылӧ, и найӧ мустӧмтісны менӧ.

⁹ Ме шуи ыжъяслы: «Водзӧ ме ог кут видзны тіянӧс. Коді тіян пиысь кулас, мед кулас. Коді вошас, мед вошас. Ловйӧн кольысьяс мед сёясны ӧта-мӧднысӧ».

¹⁰ Ме босьті Буралӧм нима бедьсӧ да чеги. Тадзи ме пом пукті став войтыръяскӧд кӧрталӧм йитӧдлы.

¹¹ Сійӧ лунӧ йитӧдсӧ вӧлі орӧдӧма. Кор вузасьысьяс аддзисны, мый ме вӧчи, найӧ гӧгӧрвоисны, мый тадзи вӧчнысӧ тшӧктӧма Господь.

¹² Ме шуи налы: «Кӧсъянныд кӧ, мынтӧй меным ассьым удждонӧс, онӧ кӧ кӧсйӧй – энӧ мынтӧй». Найӧ сетісны меным комын эзысь сьӧм.

¹³ Господь шуис меным: «Мун да шыбит тайӧ сьӧмсӧ гырнич вӧчысьлы». Та донысь найӧ и донъялісны менӧ! Ме босьті комын эзысь сьӧмсӧ да шыбиті Господьлӧн крамӧ гырнич вӧчысьлы.

¹⁴ Сэсся ме чеги Ӧтувъялун нима бедьсӧ. Тадзи орӧді Иуда да Израиль костын воклунсӧ.

¹⁵ Господь шуис меным: «Нӧшта босьт сійӧ, мый колана мывкыдтӧм ыж видзысьлы.

¹⁶ Со, Ме сувтӧда тайӧ муас олысьяслы видзысьӧс, коді оз кут тӧждысьны кулысь ыжъяс вӧсна, оз кут корсьны вошӧмаясӧс, оз кут бурдӧдавны доймалӧмаясӧс да оз кут вердны ёнъясӧс. Но сійӧ чегъялас тшӧгӧм ыжъяслысь гыжъяссӧ, а яйсӧ сёяс.

¹⁷ – Курыд шог шогмытӧм видзысьлы, коді эновтіс ыж чукӧрсӧ! Шыпурт мед керыштас сылысь кисӧ да перъяс сылысь веськыд синсӧ! Мед сылӧн киыс дзикӧдз косьмас да сылӧн веськыд синмыс пемдас!»