Яков 3 - Коми Библия 2023

Кывлӧн выныс

¹ Вокъяс, энӧ унаӧн зільӧй лоны велӧдысьясӧн. Ті ӧд тӧданныд, мый миянӧс, велӧдысьясӧс, кутасны чорыдджыка на мыждыны мукӧдыс дорысь.

² Ми ставным унаторйын мыжмам. Коді оз мыжмы сёрнинас, сійӧ тыр-бур морт да вермӧ кутны ставнас ассьыс вир-яйсӧ.

³ Ми кӧртвомалам вӧлӧс, медым сійӧ кывзысис миянлысь. Тадзи ми веськӧдлам сылӧн став вир-яйнас.

⁴ Босьтны кӧ корабльяс, найӧ сэтшӧм ыджыдӧсь, найӧс новлӧдлӧ ыджыд тӧвныр, но ичӧтик руль отсӧгӧн бӧжалысьыс веськӧдӧ корабльсӧ кытчӧ кӧсйӧ.

⁵ Тадзи артмӧ и кывнымкӧд: миян вир-яйын сійӧ ичӧтик юкӧн, но вермӧ ошйысьны ыджыд уджъясӧн. Ичӧтик би вермӧ бырӧдны уна вӧр!

⁶ Миян кывным – тайӧ би. Миян вир-яйын сійӧ – лёк чукӧртанін, сійӧ пежалӧ дзоньнас вир-яйнымӧс. Ад бисянь ӧзйӧмӧн сійӧ сотӧ миянлысь став олӧмнымӧс.

⁷ Быдпӧлӧс пемӧсӧс, лэбачӧс, веглясьысьӧс да саридзын уялысьӧс мортыс вермӧ лӧньӧдны,

⁸ а кывсӧ лӧньӧдны некод оз вермы. Лёкыс вӧсна кывтӧ лӧньӧдны он вермы, сійӧ тырӧма виана ядӧн.

⁹ Кывйӧн ми ошкам Ен Батьӧс, кывйӧн и ёрам Ен нога вӧчӧм мортӧс.

¹⁰ Ӧти вомысь петӧ ошкӧм и ёрӧм. Вокъяс, тадзи оз вермы лоны!

¹¹ Вермас ӧмӧй ӧти визувтанінысь петны юмов да курыд ва?

¹² Вокъяс, инжир пу оз вермы вайны олив пулысь вотӧс, либӧ виноград пу – инжир вотӧс. Ӧти визувтанінысь оз вермы петны сола да юмов ва.

Мувывса да енэжвывса мывкыдлун

¹³ Эм-ӧ тіян пӧвстын мывкыда да сюсь вежӧра морт? Эм кӧ, сійӧ мед петкӧдлас ассьыс мывкыдлунсӧ рам сьӧлӧмыс да бур оласногыс пыр.

¹⁴ Но тіян сьӧлӧмын кӧ эм курыд вежалӧм да асьтӧ радейтӧм, сідзкӧ, энӧ ошйысьӧй да асланыд ылӧгӧн энӧ вевттьӧй збыльсӧ.

¹⁵ Ӧд татшӧм мывкыдыс – абу вылісянь сетӧм мывкыд, сійӧ – мувывса, мортсянь да пеж ловъяссянь.

¹⁶ Кӧні вежалӧм да сӧмын асьтӧ радейтӧм, сэні кывзысьтӧмлун да быдпӧлӧс лёкыс.

¹⁷ Но вылісянь сетӧм мывкыдлуныс – медвойдӧр сӧстӧм, сэсся лӧнь, рам, кывзысьысь, тырӧма буралӧмӧн да бур уджъясӧн. Сійӧ оз торйӧд мортӧс чужӧм вылӧ видзӧдӧмӧн, сійӧ ставсӧ вӧчӧ сьӧлӧмсяньыс.

¹⁸ Лӧньлунсӧ вайысьяс кӧдзӧны лӧньлунлысь кӧйдыс, а тайӧ кӧйдысыс вайӧ веськыда олӧмыслысь вотӧс.