Восьтӧм 13 - Коми Библия 2023

Кык звер

¹ Сэсся ме сувті саридз дорӧ да аддзи саридзысь петӧм зверӧс. Сійӧ вӧлі сизим юра да дас сюра. Быд сюрын вӧлі ӧти юркытш, а юръясас вӧлі гижалӧма Енмӧс лёкӧдана нимъяс.

² Зверыс, кодӧс ме аддзылі, вӧлі леопард кодь. Сылӧн кокъясыс вӧліны ошлӧн кодьӧсь, а вомыс – левлӧн кодь. Гундыр сетіс сылы ассьыс вынйӧрсӧ, юралан пуклӧссӧ да ыджыдалан вынсӧ.

³ Ме аддзи, мый зверлӧн ӧти юрыс вӧлі кувмӧн доймӧма, но бурдіс. Став мувывса йӧзыс таысь ёна шензисны да вӧтчисны звер бӧрся. Найӧ копыртчылісны гундырлы, коді сетіс зверлы ыджыдалан вынсӧ.

⁴ Сэсся найӧ копыртчылісны зверлы да шуалісны: – Кодӧс позьӧ ӧткодявны тайӧ зверыскӧд? Коді вермас тышкасьны сыкӧд?

⁵ Зверлы вӧлі сетӧма позянлун тшапа сёрнитны да омӧльтны Енмӧс лёкӧдана кывъясӧн. Сылы вӧлі сетӧма вын вӧчны тадзи нелямын кык тӧлысь чӧж.

⁶ Сійӧ паськӧдіс вомсӧ да кутіс лёкӧдны Енмӧс, Сылысь нимсӧ, оланінсӧ да ловъя олысьясӧс.

⁷ Сылы вӧлі сетӧма тышкасьны вежа войтыркӧд да вермыны найӧс. Сылы вӧлі сетӧма ыджыдавны быд чужанвуж да чужанкотыр вылын, быд кыла йӧз да быд войтыр вылын.

⁸ Сылы копыртчыласны мувывса став йӧзыс, кодъяслысь нимсӧ му пуксьӧмсяньыс абу гижӧма начкӧм Балялӧн небӧгӧ – Олӧмыслӧн небӧгӧ.

⁹ Кодлӧн эм пель, мед кылӧ тайӧ кывъяссӧ:

¹⁰ Коді мӧдӧс дзескыдінӧ пуксьӧдас, ачыс сэтчӧ веськалас. Коді шыпуртӧн виас, сійӧс асьсӧ шыпуртӧн виасны. Татшӧм кадас вежа войтырлы колӧ зумыдлун да эскӧм.

¹¹ Сэсся ме аддзи мӧд зверӧс, коді петіс му пытшкысь. Сылӧн вӧлі балялӧн кодь кык сюр, но сёрнитіс сійӧ гундыр моз.

¹² Воддза зверыслӧн син водзын сійӧ ставсӧ вӧчӧ сылӧн ыджыдалан выннас. Став мусӧ да сэні олысьясӧс сійӧ тшӧктӧ копрасьны воддза зверыслы, кодлӧн бурдіс кулан дойыс.

¹³ Сійӧ вӧчӧ ыджыд шензьӧданаторъяс, весиг йӧз син водзын биыс лэччас енэжсяньыс му вылӧ.

¹⁴ Став шензьӧданаторнас, мый сійӧ вӧчӧ воддза зверыслӧн син водзын, сійӧ ылӧдлӧ му вылын олысьясӧс. Сійӧ тшӧктӧ налы вӧчны шыпуртӧн дойдӧм да ловзьӧм зверыслысь серпассӧ.

¹⁵ Мӧд зверыслы вӧлі сетӧма ловзьӧдны воддза зверыслысь серпассӧ, медым тайӧ серпасыс вермис сёрнитны. Сійӧ виас быдӧнӧс, коді оз копыртчыв сылы.

¹⁶ Мӧд зверыс тшӧктӧ пуктыны пас веськыд киас либӧ плешкас быдӧнлы – ичӧтлы и гырысьлы, озырлы и гӧльлы, мездлуна мортлы и кесйӧглы.

¹⁷ Некод оз вермы ньӧбны ни вузавны, оз кӧ ло сылӧн тайӧ пасыс, зверлӧн нимыс либӧ сы нимлӧн лыдпасыс.

¹⁸ Тані колӧ мывкыдлун. Кодлӧн эм вежӧр, сійӧ мед гӧгӧрвоӧ звер нимлысь лыдпассӧ, ӧд тайӧ мортлӧн лыдпасыс. Тайӧ лыдпасыс – квайтсё квайтымын квайт.