Сьылан 1 - Коми Библия 2023

¹ Соломонлӧн сьылан. (Ныв:) – Окав менӧ юмов вомдорнад! Тэнад муслуныд вина дорысь на чӧскыд.

Муслуныд вина дорысь на чӧскыд

² Тэсянь чӧскыд мавтасӧн ӧвтӧ, тэнад нимыд – визувтысь дона вый, та вӧсна тэнӧ радейтӧны нывъяс.

³ Босьт менӧ киӧд, вай котӧртам! Пырт менӧ аслад вежӧсӧ, ӧксыӧй! Пондам долыда нимкодясьны, вина дорысь ёнджыка ошкыны тэнсьыд муслунтӧ. Оз весьшӧрӧ тэнӧ радейтны.

⁴ Ерусалимса нывъяс! Менам кучикӧй кедарсаяслӧн чом кодь мугов, но ме Соломонлӧн дӧраыс кодь мича.

⁵ Энӧ видзӧдӧй менам гожъялӧм чужӧм вылӧ, гож водзас сійӧ сотчӧма. Менам вокъяс скӧрмисны ме вылӧ, тшӧктісны видзны виноград йӧръяс. Но ассьым виноград йӧрӧс ме эг видз.

⁶ Висьтав меным, мусукӧй, кӧні ыжъястӧ йирсьӧдан, кӧні луншӧрнас найӧс шойччӧдан. Мыйла меным шӧйтны, мыйла корсьны тэнӧ ыж видзысьяс пӧвстысь? (Зон:)

⁷ – Он кӧ тӧд, медмича аньӧй, мун ыжъяслӧн кок туйӧд, видз ассьыд кӧзапиянтӧ ыж видзысьяслӧн чом дорын.

⁸ Фараон тарантас бердӧ доддялӧм вӧв кодь тэ, мусаӧй.

⁹ Тэнад мича бандзибыд мыччысьлӧ юркытш сыръя увсьыд, тэнад сикӧтша сьыліыд мичасьыс-мича.

¹⁰ Ми вӧчам тэныд зарни сикӧтш, эзысь чиръясӧн сійӧс мичмӧдам. (Ныв:)

¹¹ – Кор ӧксы пукаліс пызан сайын, месянь чӧскыд нард мавтасӧн ӧвтіс.

¹² Смирна ёкмыль моз мусукӧй ляскысьӧ менам морӧс бердӧ.

¹³ Менам мусукӧй дзоридзалысь хна кодь, Эн-Гедиын виноград йӧрын быдмысь хна кодь. (Зон:)

¹⁴ – Тэ сэтшӧм мича, мусаӧй, тэнад синмыд гулю кодь. (Ныв:)

¹⁵ – Мусукӧй, тэ медлӧсьыдыс да медмусаыс! Миян вольпасьным – веж турун,

¹⁶ миян сайӧдыс – сус пуяс, миян лэбулыс – кипарис.