Шусьӧгъяс 4 - Коми Библия 2023

Веськыд туй да лёк туй

¹ Пиянӧй, кывзӧй батьнытӧ, кылӧй велӧдӧмсӧ да вежӧрсялӧй.

² Ме велӧда тіянӧс бурас, энӧ вунӧдӧй менсьым туйдӧдӧмӧс.

³ Менӧ, ӧтка пиӧс, мамӧй видзис, батьӧй менӧ

⁴ велӧдіс тадзи: «Менсьым кывъясӧс пукты сьӧлӧмад, тшӧктӧмъясӧс видз да ов на серти.

⁵ Мывкыдмы, вежӧрсяв, эн вунӧд менсьым кывъясӧс, эн кеж менам шуӧмысь.

⁶ Эн эновт мывкыдлунсӧ, и сійӧ видзас тэнӧ, радейт мывкыдлунсӧ, и сійӧ доръяс тэнӧ.

⁷ Олӧмас медся коланаыс – мывкыдлун, корсь сійӧс, ставсӧ сет, медым вежӧрсявны.

⁸ Вылӧ пукты мывкыдлунсӧ, и сійӧ кыпӧдас тэнӧ, сибӧд мывкыдлунсӧ, и сійӧ нимӧдас тэнӧ.

⁹ Мича юркытш сійӧ пуктас юр вылад, дзирдалана юркытш ваяс тэныд».

¹⁰ Кывзы, пиӧй, сибӧд менсьым кывъясӧс, и тэнад нэмыд нюжалас.

¹¹ Ме инда тэныд мывкыдлуныслысь туйсӧ, нуӧда тэнӧ веськыд ордымӧд.

¹² Воськовтан да, воськолыд лоӧ зумыд, котӧртан да, он крукась.

¹³ Велӧдӧмӧй серти ов, эн коль сійӧс, видз сійӧс, ӧд сэні тэнад олӧмыд.

¹⁴ Мыж вӧчысьяс туйӧд эн ветлы, лёк йӧз туй вылӧ эн сувт.

¹⁵ Ылыстчы налӧн туйысь, эн мун сэті, кеж сэтысь, мун бокиті.

¹⁶ Найӧ оз вермыны унмовсьны, оз кӧ вӧчны лёксӧ, налӧн унмыс вошӧ, оз кӧ дойдны кодӧскӧ.

¹⁷ Ӧд лёк вӧчӧмыс налы нянь сёйӧм кодь, виалӧм-дзескӧдӧмыс – вина юӧм кодь.

¹⁸ Веськыда олысьлӧн туйыс – асъя югӧр кодь, сійӧ ӧтарӧ югдӧ луншӧра югыдӧдз.

¹⁹ Лёк вӧчысьлӧн туйыс – пемыдсьыс-пемыд, сійӧ оз тӧд кытчӧ крукасяс.

²⁰ Пиӧй, кывзы менсьым кывъясӧс, менам сёрнилань бергӧд пельтӧ.

²¹ Эн вешты кывъясӧс син водзсьыд, видз найӧс сьӧлӧмад,

²² ӧд найӧс аддзысь аддзӧ олӧмсӧ, аслас вир-яйыслы – дзоньвидзалунсӧ.

²³ Ставсьыс медъёна видз ассьыд сьӧлӧмтӧ, ӧд сьӧлӧмыд – олӧмыслӧн визувтанін.

²⁴ Вомсьыд мед пӧръясьӧм оз пет, ылӧг сёрни ас дінсьыд вӧтлы.

²⁵ Синмыд мед видзӧдас веськыда, видзӧдласыд мед лоӧ сӧстӧм.

²⁶ Мӧвпышт, кутшӧм туйӧд мунны, воськовъясыд мед лоӧны зумыдӧсь.

²⁷ Веськыдвылӧ ни шуйгавылӧ эн кеж, кокыд мед лоӧ ылын лёксьыс.

²⁸ [Господь тӧдӧ веськыд туйяссӧ, чукля туйясыд Сылы шогмытӧмӧсь.

²⁹ Сійӧ веськӧдас тэнсьыд туйтӧ, тэ кутан восьлавны повтӧг.]