Шусьӧгъяс 31 - Коми Библия 2023

Лемуил ӧксылӧн кывъяс

¹ Лемуил ӧксылӧн кывъясыс. Тайӧ кывъясӧн мамыс велӧдіс сійӧс.

² Муса пиӧй, ме тэнӧ чужті, тэ йылысь ме кыв сетӧмӧн кевмыси.

³ Эн сет вынтӧ аньяслы, ӧксыясӧс уськӧдысь аньяс мед оз бергавны тэ гӧгӧр.

⁴ Лемуил пиӧй, ӧксыяслы оз позь вина юны, юралысьяслы – сур юны.

⁵ Код юрнад вунӧдан индӧдсӧ, коньӧръясӧс он веськыда мыжды.

⁶ Сетӧй сурсӧ куланвыйӧдз воӧмалы, сетӧй винасӧ курыд шогас вӧйӧмалы.

⁷ Мед юас да, вунӧдлас ассьыс гӧльлунсӧ, вунӧдлас ассьыс курыд шогсӧ.

⁸ Сёрнит вермытӧм пыдди, дорйы батьтӧм-мамтӧмӧс.

⁹ Мыжды веськыда, дорйы гӧльӧс да коньӧрӧс.

Бур гӧтырӧс ошкӧм

¹⁰ Бур гӧтыртӧ аддзыны абу кокньыд! Став дона изйысь на сійӧ дона.

¹¹ Эскӧ сылы верӧсыс став сьӧлӧмнас, верӧсыслы эмбурсӧ сійӧ содтӧ.

¹² Бур гӧтыр верӧсыслы бур вайӧ, оз вӧч сылы лёксӧ став олан лунъяс чӧжыс.

¹³ Сійӧ судзӧдӧ вурун да шабді, зіля вӧчӧ став кипомса уджсӧ.

¹⁴ Вузӧс новлӧдлысь корабль кодь сійӧ, ылісянь сёян-юансӧ вайӧ.

¹⁵ Водз асывсянь чеччӧ, дасьтӧ гортсаыслы сёян, кесйӧг аньяслы индӧ удж.

¹⁶ Сійӧ видзӧдалӧ муяс, аслас сьӧм вылӧ ньӧбӧ му, пуктӧ сэтчӧ виноград пуяс.

¹⁷ Сійӧ дась вӧчны сьӧкыд удж, ӧд сылӧн киыс вына.

¹⁸ Сійӧ тӧдӧ, мый уджсӧ бура вӧчӧма, войбыд биыс сылӧн оз куслы.

¹⁹ Киыс нюжӧдчӧ печканӧ, чуньясыс чӧрссӧ оз лэдзлыны.

²⁰ Сійӧ сетӧ гӧльяслы, отсасьӧ коньӧръяслы.

²¹ Тӧвся кӧдзыдысь сійӧ оз пов, ӧд став гортсаыслы вурӧма тӧвся паськӧм.

²² Ачыс шебрасъяс вурӧ, шабді дӧраысь да пемыдгӧрд вурунысь паськӧмсӧ лӧсьӧдӧ.

²³ Верӧсыс сылӧн пыдди пуктана, юрнуӧдысьяслӧн чукӧртчӧмын сійӧ пукалӧ.

²⁴ Бур гӧтыр вурӧ да вузалӧ дӧрӧмъяс, ханаанса вузасьысьяслы вайӧ вӧньяс.

²⁵ Выныс да морттуйыс сылӧн тыдалӧ, сійӧ долыда виччысьӧ аскиа лунсӧ.

²⁶ Вомас сылӧн мывкыд сёрни, шань сьӧлӧмӧн туйдӧдӧ.

²⁷ Гортас ставыс сылӧн син улас, дась нянь вылын сійӧ оз ов.

²⁸ Ныв-пиыс чеччӧны да шуӧны сійӧс майбырӧн, верӧсыс ошкӧ сійӧс тадзи:

²⁹ «Шань да зіль аньыс уна, но тэ – ставсьыс медбурыс».

³⁰ Авъялуныд ылӧдлӧ, мичлуныд бырӧ, а Господьысь полысь гӧтырыд ошкана лоӧ.

³¹ Уджыс серти сійӧс нимӧдӧй, йӧз водзын сійӧс ошкӧй!