Шусьӧгъяс 29 - Коми Библия 2023

Мывкыд морт кутчысьӧ скӧрмӧмысь

¹ Ӧлӧдӧм бӧрын коді асныралӧ, сійӧс тӧдлытӧг лоӧ жугӧдӧма, и сійӧ оз нин бурд.

² Веськыда олысьяслӧн лыдыс кӧ содӧ, йӧзыс нимкодясьӧны, лёк вӧчысь кӧ ыджыдалӧ, йӧзыс ойзӧны.

³ Мывкыдсӧ радейтысь долыдмӧдӧ батьсӧ, а коді ветлӧ кырсалысь аньяс дінӧ, лотӧ эмбурсӧ.

⁴ Веськыда мыждӧмнас ӧксы ёнмӧдӧ ассьыс мусӧ, а козинъяс радейтысь – куштӧ сійӧс.

⁵ Коді леститчӧ матыссаыс водзын, тыв зэвтӧ сылӧн коклы.

⁶ Лёк мортлӧн мыжыс сійӧс асьсӧ тывйыштӧ, а веськыда олысь гажӧдчӧ да нимкодясьӧ.

⁷ Веськыда олысьыд гӧль мортлысь ёрдӧ вайӧм венсӧ тӧдмалӧ-туялӧ, а лёк вӧчысьлы тайӧ веськодь.

⁸ Яндысьтӧм йӧз гызьӧдӧны карсӧ, мывкыдаяс скӧрмӧмтӧ лӧньӧдӧны.

⁹ Мывкыд морт кор ёрдын вензьӧ вежӧртӧмкӧд, лӧгалӧ ли сералӧ вежӧртӧмыд – лӧньлуныс сылӧн абу.

¹⁰ Вир кисьтысьяс мустӧмтӧны сӧстӧма олысьӧс, веськыда олысьяс тӧждысьӧны сы вӧсна.

¹¹ Вежӧртӧм морт став ассьыс скӧрлунсӧ ортсӧ кисьтӧ, а мывкыд морт кутчысьӧ скӧрмӧмысь.

¹² Юралысь кӧ кывзӧ ылӧг сёрнияс, сылӧн кесъялысьясыс лёксӧ вӧчны кутасны.

¹³ Дзескӧдысь да гӧль морт ӧткодьӧсь, кыкнанныслы Господь югыдсӧ сетӧма.

¹⁴ Ӧксы кӧ гӧльясӧс веськыда мыждӧ, сылӧн пуклӧсыс нэмсӧ зумыд лоас.

¹⁵ Ньӧр да ӧлӧдӧм сетӧны мывкыдлун, дӧзьӧртӧг быдмӧм зон янӧдӧ мамсӧ.

¹⁶ Лёк вӧчысьыс кор уна, мыж вӧчӧмыс содӧ, но веськыда олысьяс аддзасны налысь усьӧмсӧ.

¹⁷ Велӧд питӧ, сэки сы вӧсна он кут майшасьны, мӧдарӧ, кутан нимкодясьны.

¹⁸ Войтырыс лэдзчысьӧ, абу кӧ Енсянь восьтӧмыс, но Индӧд серти олысьяс – майбырӧсь.

¹⁹ Кесйӧгыд кыв шуӧмнад оз велав, сійӧ кывсӧ гӧгӧрвоӧ, но оз кывзысь.

²⁰ Сы дорысь, коді мӧвпышттӧг кывсӧ шуӧ, бурджык вежӧртӧм вылӧ лача кутны.

²¹ Ичӧтдырсяньыс кӧ кесйӧгтӧ вельмӧдан, бурӧн тайӧ оз помась.

²² Скӧралысь мортыд зыксьӧм кӧдзӧ, ӧдйӧ пузьысь уна мыж вӧчӧ.

²³ Мортлӧн асьсӧ вылӧ пуктӧмыс янӧдӧ сійӧс, рам сьӧлӧма пыдди пуктӧма лоас.

²⁴ Коді ёртасьӧ гусясьыськӧд, аслыс лёксӧ вӧчӧ – сійӧ кылӧ гусясьысьӧс ёрӧм йылысь, но чӧв олӧ.

²⁵ Йӧзысь полӧм – лэчкӧ шедӧм кодь, а Господь вылӧ лача кутысь повтӧг олӧ.

²⁶ Унаӧн виччысьӧны бурсӧ юралысьсянь, но веськыда мыждӧмыс – Господьсянь.

²⁷ Веськыда олысь зывӧктӧ лёк вӧчысьӧс, а лёк вӧчысь – веськыда олысьӧс.