Шусьӧгъяс 27 - Коми Библия 2023

Морт мортӧс веськӧдӧ

¹ Аскиа луныс мый ваяс – он тӧд, сідзкӧ, водзвывсӧ эн ошйысь.

² Тэнӧ мед ошкӧ мӧд, а он ачыд асьтӧ, мӧд вомсянь мед петӧ тэнӧ ошкӧмыс, а оз аслад вомсянь.

³ Изйыд сьӧкыд и лыаыд абу кокньыд, но вежӧртӧмлӧн дӧзмӧдӧмыс сьӧкыдджык на.

⁴ Чорыда скӧрмӧм-ярмӧмтӧ сувтӧдны сьӧкыд, вежӧгтӧмтӧ нинӧм оз сувтӧд.

⁵ Мыж эрдӧдысь бурджык чӧв олысь ёрт дорысь.

⁶ Радейтысьлӧн янӧдӧмыс веськыд, мустӧмтысьлӧн окыштӧмыс ылӧг.

⁷ Коді пӧт, сылы весиг маыд мустӧм, но коді тшыг, сылы и курыдыс юмов кажитчӧ.

⁸ Чужанінсӧ кольысь мортыд позсӧ эновтысь лэбач кодь.

⁹ Чӧскыд ӧвтанторъяс да мавтасъяс долыдмӧдӧны сьӧлӧмтӧ, тадзи ёртыдлӧн бур туйдӧдӧмыс долыдмӧдӧ тэнӧ.

¹⁰ Ассьыд ёрттӧ да батьыдлысь ёртсӧ эн вунӧд, шог дырйи вок ордад эн мун, ӧд ылысса вок дорысь бурджык матысса сусед.

¹¹ Пиӧй, ло мывкыд, сьӧлӧмӧс гажӧд, сэки ме верма воча кыв шуны менӧ лёкӧдысьлы.

¹² Вежӧра морт казялӧ лёксӧ да дзебсьӧ, вежӧртӧм водзӧ мунӧ да мыждӧма лоӧ.

¹³ Тӧдтӧм морт вӧсна кыв сетысьлысь босьт дӧрӧмсӧ да ас ордад видз, кытчӧдз уджйӧзыс оз ло мынтӧма.

¹⁴ Водз асывсянь кӧ ёрттӧ гораа бурсиан, кылысьяс чайтасны, мый ёран сійӧс.

¹⁵ Броткысь гӧтырыд – зэра лунӧ письтӧм керка вевт кодь,

¹⁶ сійӧс ӧлӧдӧм дорысь кокньыдджык тӧв ӧлӧдны либӧ киад вый чабыртны.

¹⁷ Кӧрт кӧртӧс кеслӧ, морт мортӧс веськӧдӧ.

¹⁸ Коді быдтас инжир пу, вотӧссӧ сэтысь сёяс, коді доръяс ассьыс ыджыдсӧ, сійӧс пыдди пуктасны.

¹⁹ Ваӧ видзӧдігӧн ассьыд чужӧмтӧ аддзан, мӧдлӧн сьӧлӧмӧ видзӧдігӧн – ассьыд сьӧлӧмтӧ.

²⁰ Пыдӧстӧминыс да кулӧмаяслӧн оланіныс – пӧтлытӧмӧсь, тадзи морт синмыд тшӧтш пӧтлытӧм. [Господьлы зывӧк ыкшаасьысь морт, ковтӧг ассьыс вомсӧ восьталысь – вежӧртӧм.]

²¹ Эзысьтӧ да зарнитӧ биын сывдӧны, а мортӧс тӧдмалӧны сійӧс ошкигӧн. [Мыж вӧчысьлӧн сьӧлӧмыс корсьӧ лёксӧ, а веськыд сьӧлӧм корсьӧ тӧдӧмлун.]

²² Вежӧртӧмӧс кӧть шобді тусьӧс моз гырйын той – йӧйлуныс сыысь оз торъяв.

²³ Видзӧд ыжъясыд бӧрся, бура тӧждысь на вӧсна.

²⁴ Озырлуныд ӧд абу пыр кежлӧ, дай юралан пуклӧсыд оз век аслад рӧдлы вудж.

²⁵ Кор турун заптӧм бӧрын выль турун петӧ, кор ыбвывса турун ытшкӧма,

²⁶ сэки ыжъястӧ шыран да паськӧмтӧ вуран, кӧзаястӧ вузалан да му ньӧбан,

²⁷ кӧза йӧлыд тырмымӧн лоас аслыд да гортсаясыдлы, сыӧн пӧткӧдчасны тшӧтш кесйӧг аньясыд.