Шусьӧгъяс 24 - Коми Библия 2023

Енмыс тӧдмалӧ сьӧлӧмтӧ

¹ Лёк йӧзлы эн вежав, накӧд эн ӧтувтчы.

² Найӧ олӧны лёк мӧвпъясӧн, лёк вӧчӧм йылысь сёрнитӧны.

³ Мывкыдлуныд керкатӧ лэптӧ, вежӧрыд видзӧ-кутӧ сійӧс,

⁴ тӧдӧмлуныд тыртӧ вежӧсъяссӧ мича дона эмбурӧн.

⁵ Мывкыд мортыд вына, вежӧра мортыд асьсӧ ёнмӧдӧ.

⁶ Туйдӧдтӧг тышӧ эн пет, туйдӧдысьыд кор уна, верман.

⁷ Вежӧртӧмлы мывкыдлуныс гӧгӧрвотӧм, карса дзиръя дорын чукӧртчӧм йӧз водзын сылы нинӧм шунысӧ.

⁸ Коді мӧвпалӧ лёк вӧчӧм йылысь, сійӧс шуӧны лӧгалысьӧн.

⁹ Вежӧртӧмлӧн кӧсйӧмыс – мыж, Енмӧс омӧльтысь – йӧзыслы зывӧк.

¹⁰ Сьӧкыд кадӧ кӧ лолыд нюкыртчӧ, сідзкӧ, выныд тэнад этша.

¹¹ Мезды мыжтӧм мортӧс, кодӧс нуӧдӧны вины, дорйы кулӧм вылӧ мыждӧмаӧс.

¹² Тэ шуан: «Ме нинӧм ог тӧд та йылысь», но Енмыс тӧдмалӧ сьӧлӧмъяс. Сійӧ видзӧ тэнсьыд олӧмтӧ да тӧдӧ тэнӧ, Сійӧ мынтысяс быдӧнлы уджъясыс серти.

¹³ Пиӧй, сёй ма, ӧд сійӧ бур, горшыдлы сійӧ юмов.

¹⁴ Мывкыдлуныс татшӧм жӧ бур: аддзин кӧ мывкыдлунсӧ, тэнад эм аскиа луныс да лачаыс.

¹⁵ Лёк вӧчысь, эн кыйӧдчы веськыда олысьлӧн керкаыс бӧрся, сылысь оланінсӧ эн кушты.

¹⁶ Веськыда олысь сизимысь усьлас, но бӧр чеччас, а мыж вӧчысь лёкас крукасяс.

¹⁷ Эн нимкодясь, тэнӧ мустӧмтысь кӧ усьӧ, сылӧн крукасьӧмысь мед оз долыдмы сьӧлӧмыд,

¹⁸ ӧд Господь аддзас тайӧс да чайтас лёкӧн – и вештас сы вылысь Ассьыс скӧрлунсӧ.

¹⁹ Лёк морт вылӧ эн лӧгав, мыж вӧчысьлы эн вежав.

²⁰ Ӧд лёк мортлӧн аскиа луныс абу, мыж вӧчысьлӧн биыс кусӧ.

²¹ Пиӧй, Господьысь да ӧксыысь пов, паныд кыпӧдчысьяскӧд эн волысь,

²² ӧд виччысьтӧг найӧс шог суас, и код тӧдас, кыдзи найӧс Господь да ӧксы мыждасны.

²³ Мывкыд йӧзсянь нӧшта шусьӧгъяс. Ёрдысь мед мыждӧ веськыда, оз чужӧм вылӧ видзӧдӧмӧн.

²⁴ Коді мыжаӧс шуӧ веськыдӧн, сійӧс йӧзыс ёрасны, сійӧс пондасны мустӧмтны чужанкотыръяс.

²⁵ Веськыда мыждысьлӧн ставыс артмас, сійӧс лоӧ бурсиӧма.

²⁶ Веськыда вочавидзӧм – вомдортӧ окыштӧм кодь.

²⁷ Медводз град йӧрад уджав, муястӧ вӧч, сэсся керкатӧ лэпты.

²⁸ Матыссаыд йылысь ылӧгсӧ эн висьтав – мыйла тэныд пӧръясьнысӧ?

²⁹ Эн шу: «Кыдзи сійӧ меным вӧчис, ме сылы сідзи жӧ вӧча, мынтыся сылы меным вӧчӧм серти».

³⁰ Ме муні дыш мортлӧн му бокті, вежӧртӧм мортлӧн виноград йӧр пӧлӧн

³¹ да аддзи: йӧрыс ставнас вӧлі тырӧма ёгӧн, пасьтала быдмӧма петшӧр, изйысь вӧчӧм потшӧсыс киссьӧма.

³² Видзӧді-мӧвпалі да со мый гӧгӧрвои:

³³ узьыштан, вугралыштан, китӧ сюркнялӧмӧн пукалыштан,

³⁴ да он и казяв, кыдзи шӧйтысь моз гӧльлуныд локтас, гусясьысь моз тшыгъялӧмыд пырас.