Шусьӧгъяс 23 - Коми Библия 2023

Эн волысь мыжа йӧзкӧд

¹ Юралыськӧд сёйны пуксигӧн видзӧд ныр увсьыд, мый пызан вылас.

² Азымлунтӧ потшӧсав, тэ кӧ весиг тшыгъялан.

³ Эн ышты сылӧн чӧскыд сёян вылӧ – та сайын ылӧдлӧм.

⁴ Эн мудзты асьтӧ, медым озырмӧдчыны, эновт татшӧм мӧвпъястӧ.

⁵ Чӧвтан синтӧ озырлун вылад, а сійӧ абу нин, сійӧ вӧчӧма аслыс бордъяс да кутш моз лэбзьӧма енэжлань.

⁶ Эн мун сёйны лёк сьӧлӧма морт дінӧ, эн ышты сылӧн чӧскыдторъяс вылӧ.

⁷ Сійӧ шуӧ, сёй пӧ да ю, а сьӧлӧмнас абу тэкӧд.

⁸ Сёян кӧ, восан, бур кывъястӧ весьшӧрӧ висьталан.

⁹ Вежӧртӧмкӧд эн сёрнит, ӧд сійӧ мустӧмтӧ тэнсьыд мывкыд кывъястӧ.

¹⁰ Важысянь пуктӧм мудор пассӧ эн вешты, батьтӧм-мамтӧмлысь мусӧ эн мырддьы,

¹¹ ӧд найӧс Дорйысьыс вына, Сійӧ доръяс найӧс, а тэныд паныд сувтас.

¹² Ассьыд сьӧлӧмтӧ велӧдӧмлань бергӧд, ассьыд пельтӧ тӧдӧмлунлань чошкӧд.

¹³ Питӧ чирышттӧг эн коль, ньӧръялӧмысь сійӧ оз кув.

¹⁴ Ньӧръялан кӧ сійӧс, сылысь ловсӧ мездан кулӧмысь.

¹⁵ Пиӧй, тэ кӧ мывкыд сьӧлӧма, таысь и менам сьӧлӧмӧй нимкодясьӧ.

¹⁶ Менам лолӧй нимкодясьӧ, кор тэ сёрнитан веськыда.

¹⁷ Эн вежав мыж вӧчысьяслы, но став олӧм чӧжыд пов Господьысь.

¹⁸ Сэки тэнад лоӧ аскиа луныс, тэнад лачаыд оз кус.

¹⁹ Кывзы, пиӧй, мывкыдсяв, веськыд туй вылӧ бергӧд сьӧлӧмтӧ.

²⁰ Эн пукав юысь-кодалысьяс пӧвстын да на пӧвстын, кодъяс горша сёйӧны яй.

²¹ Юысь-кодалысьяс да восмӧныс сёйысьяс гӧльмӧны, унзіль олӧмыд пасьтӧдас киссьӧм паськӧмӧ.

²² Кывзысь батьыдлысь, олӧмтӧ сетысьлысь, эн мустӧмт мамтӧ сылӧн пӧрысь кадас.

²³ Ньӧб збыльсӧ, эн вузав мывкыдтӧ, велӧдӧмтӧ да вежӧртӧ.

²⁴ Веськыда олысь пи вӧсна батьыс нимкодясьӧ, мывкыд пи долыдмӧдӧ батьсӧ.

²⁵ Мед нимкодясяс батьыд, тэнӧ чужтысь мамыдлы мед лоӧ долыд.

²⁶ Пиӧй, сьӧлӧмтӧ сет меным, ветлы менам туйӧд.

²⁷ Кырсалысь аньыд – джуджыд гу, йӧз гӧтырыд – векньыд юкмӧс.

²⁸ Гусясьысь моз пукалӧ кыйӧдчанінын, унаӧс кыскӧ гозъякост олӧм пежалӧмӧ.

²⁹ Кодлӧн тайӧ ойзӧм-ружтӧмыс? Кодлӧн тайӧ зыксьӧм-норасьӧмыс? Кодлӧн вир-яйыс помкатӧг доймалӧма? Кодлӧн тайӧ гырдмӧм синмыс?

³⁰ Сылӧн, коді кадсӧ коллялӧ вина юӧмӧн, коді корсьысьӧ унджык юны.

³¹ Эн видзӧд виналӧн гӧрд рӧмыс вылӧ, эн видзӧд юан дозйысь сылысь ворсӧдчӧмсӧ. Кокньыд сійӧс ньылыштнысӧ,

³² но бӧрыннас змей моз курччас, аспид моз чушкас.

³³ Синмыд пондас вӧтлысьны йӧз гӧтыр бӧрся, сьӧлӧмад чужасны пеж мӧвпъяс.

³⁴ Тэ лоан сэки саридз гыяс шӧрын узьысь кодь, шолга йылын узьысь кодь.

³⁵ Тэ шуан: «Нӧйтісны менӧ, а меным эз доймы, кучкалісны менӧ, но ме эг кывлы. Паляла да, бара тайӧс понда корсьны».